1. Ucatsti walja jakenacampir yatekerinacapampiruw mayisiñ tucuyapjjañapatac jupajj mayïna. Jupanacarusti camächit churaraquïna, chuymanacapan mayisiñ jan tucuyapjjañapataqui.

2. Jupanacarusti sartapjjañapataquiw mayïna, ucatsti saytʼapjjañapataquiw mayiraquïna. Jupanacasti sartasin saytʼapjjäna.

3. Ucatsti wasitat tʼantʼa pachinokasin uc yakhachäna, ucatsti yatekerinacaruw mankʼañapatac churaraquïna.

4. Mankʼapcän ucapachasti jupanacaruw mayïna, jupanacan tʼantʼa pachinokapjjañapataqui, walja jakenacar laquipjjañapataqui.

5. Jupanacan walja jakenacar laquitap khepatsti, jupajj jupanacarojj umapjjañapataquiw vino churaraquïna. Jupanacarusti camächit churaraquïna walja jakenacar laquipjjañapataqui.

6. Yatekerinacajja janiw tʼantʼsa vinsa apanipcänti, janiraquiw walja jakenacas apanipcänti.

7. Ucampis jupajj chekpachaw jupanacan mankʼapjjañapataquejj tʼantʼa churäna, umapjjañapataquisti vin churaraquïna.

8. Jupasti jupanacarojj saraquïnwa: Aca tʼantʼa mankʼerejja, janchijjat jupataquiw mankʼe. Aca vin umiristi, wilajjat jupa quipcataquiw umi. Jupasti janipiniw awtjayascaniti, janiraquiw pharjayascanisa, jan ucasti, sistʼatäniwa.

9. Ucatsti, take uca walja jakenac mankʼepana, umipana, jupanacan Ajayojj phokhantatänwa. Qhitirutejj uñjapcäns istʼapcäns uca Jesusarojja, mä arutjam artʼasaquiw jachʼar aptapjjäna.

10. Ucatsti, take jupanacajj Jesusar jachʼar aptipanjja, jupajj jupanacarojj siwa: Aca Israelan utapat jiltʼir jakenacatac Awquejj churquitu uca camächit jichhajj tucuyä.

11. Amtasipjjtawa, nayajj jumanacar aqhäm sasaw arsupjjsma: Cunapachatejj Isaiasan arunacapajj phokhascanejja – jïsa, uca arunacajj kellkatawa, jumanacan nayrakataman utjaraqui, ucat ucanacan thaktapjjam –

12. Ucat chekpach chekpachaw sapjjsma: Ucanacajj phokhasipcan ucapachajja, Awquejj jakenacapatac lurcänsa uca amtäwejj phokhasiniwa, Israelan utapa.

13. Ucapachajja, orakjjan take tokensa chʼeketatatäpcani uca jiltʼir jakenacajj mayachthapitäpjjaniwa, inti jalsu toketa, inti jalanta toketsa, aynach toketsa, alay toketsa. Jupanacar cutsuyqui uca Dios Tatitupat yatiyatäpjjaniwa.

14. Awquisti nayaruw camächit churitu, aca orak jumanacar tutjam churañajjataqui.

15. Nayajj sapjjsmawa: Gentilenacan qhuyapayañ catokañap khepatjja, jakenacajjar chʼeketatayatap khepatjja, jupanacajj janitejj juchanacat cutiquipstapcanejja,

16. Jumanaca, Jacobon utapat jiltʼir jathanacajj jupanac taypiruw sarapjjäta; waltʼatäpcän ucanac taypincapjjaraquïtawa. Jupanac taypincapjjätawa, cunjämatejj leonajj chʼumi lakʼonac taypincqui, cunjämatejj leon kallojj ovej tamanac taypincquejj uqhäma. Ucatejj taypinjam sarcaspajja, tacjjataspawa, wiqhanokaraquispawa, janiraquiw qhitis ucanacar khespiycaraquispati.

17. Amparamajj take uñisirinacamjjar aytatäniwa. Take timanacamasti phatʼanucutäpjjaraquiniwa.

18. Cunjämatejj mä jakejj callchanacap jawkʼañawjar apthapquejja, uqhämaw jakenacajjar nayajj apthapï.

19. Qhitinacampitejj Awquejj mä amtäwir mantcänjja uca jakenacajjaruw turcayä. Jïsa, wajjram jiruruw tucuyä, sillunacamjj kʼellu alquimiaruw tucuyaraquï. Jumasti walja jakenacar jawkʼasaw tʼunjäta. Jupanacan irjjatäwipsti Tatitutaquiw yakhachä, takpach oraken Tatitupataquiw yänacapjja yakhachä. Amuyapjjaraquim, uc lurqui ucajja, nayätwa.

20. Ucatsti siw Awquejja: Chekaparjamaw taripäwijjan espadapajj ucürun jupanacjjar aytatäni. Janitejj jupanacajj juchat cutiquipstapcanejja, ucajj jupanacjjaruw jaljjat-tani –siw Awquejja, jïsa, take gentilenacan marcanacapjjaru.

21. Ucatsti nayajj jakenacajjaruw ut-tʼayä, Israelan utapa.

22. Jïsa, aca jakenacjja aca oraken ut-tʼayä, cuna amtäwirutejj Jacob awquimampejj mantctjja uca amtäwir phokhañataqui. Ucasti mä Machak Jerusalenäniwa. Alajjpachan chʼamanacapajj aca jakenac taypincaniwa; jïsa, nayas jumanac taypincäwa.

23. Nayätwa qhitit-tejj Moisesajj arscän ucajja: Jilanacamatjja mä nayjam Diosan arjir jumanacatac Dios Tatitumajj sartayani. Take cunanactejj jupajj jumanacar sapcätamjja, take ucanacan jupar istʼapjjäta. Ucatsti take qhitinacatejj uca arjirir jan istʼapcanejja, take ucanacajj jakenac taypit jakorpayatäpjjaniwa.

24. Chekpachaw sapjjsma: Jïsa, Samuelan urupat take ucapach arjirinacajja, uqhämaraqui take Samuel khepat utjir arjirinacajja, arsupquis take uca arjirinacajj nayat ircatapjje.

25. Jumanacasti arjirinacan wawanacapäpjjtawa; jumanacajj Israelan utapanquirinacäpjjtawa; jumanacajj uca amtäwinacapjjtawa, cuna amtäwirutejj Awquejj awquinacamamp mantcän ucäpjjtawa, cunapachatejj Abrahanar säna: Juman jathaman take acapach orakenquir wila masinacajj qhuyapayatäni.

26. Awquejj nayaruw aptitu nayrakat jumanacar jutañataqui, ucat nayar qhitanitu sapakat mayni jumanacar ñankhanacamat cutiquipstayas qhuyapayañataqui. Jumanacan amtäwin wawanacapäpjjatam laycuw ucajj lurata.

27. Jumanacan qhuyapayatätam khepatjja, Awquejj phokhaniwa, cuna amtäwirutejj Abrahanampi aqhäm sas mantcän ucajja: Juman jathaman take acapach orakenquir wila masinacajj qhuyapayatäni, naya toket gentilenacjjar Kollan Ajay wartañcama. Uca gentilenacjjar qhuyapayañasti jupanacaruw chʼamañchani take yakhanacat sipana, jakenacajjar jupanacan chʼeketatayañapataqui, oh, Israelan utapa.

28. Jupanacasti jawkʼäcaspas uqhämaniw aca orakenquir jakenacataquejja. Ucampisa, phokhatpach asqui yatiyäwijjar catokatap khepat-tejj naya contra chuymanacap chʼollkheptayasipcaquinejja, ñankha luräwinacap quipca pʼekenacapjjaruw cut-tayä –siw Awquejja.

29. Nayan jakenacajjamp mantctsa uca amtäwit amtasï. Jupanacampiw amtäwir mant-ta, cunapachatejj suma amuyujjarjam waquiscan ucapach jupanacar mayachthapiñajjataqui, wastat awquinacapan orakep tutjam jupanacar churañajjataqui. Uca orakesti Jerusalen orakewa; ucasti jupanacatac wiñayatac arsut orakewa –siw Awquejja.

30. Ucatsti cunüruntejj phokhatpach asqui yatiyäwijjajj jupanacar yatiyatäcan ucürojj purininiwa.

31. Jupanacasti nayaruw iyawsapjjetani, nayan Jesucristötajjaru, Diosan Yokapätajjaruw iyawsapjjaraquini. Nayan sutijj-jjaruw Awquit mayisipjjaraquini.

32. Ucatsti uñjirinacapajj jachʼat artʼapjjani. Mä arutjam kʼochupjjani, cunalaycutejj jupanacajj ajanuy ajanuw uñjapjjani.

33. Ucapachaw Awquejj wastat jupanacarojj apthapini, jupanacarusti Jerusalen catuyjjaraquini, jupanacan tuti orakepataqui.

34. Ucatsti cusisthapipjjaniwa. Uqhämasti, mayachthapisis chicpach kʼochupjjam, juma Jerusalenan chʼusawjanacapa. Awquejj jakenacaparojj chuymachiwa, Jerusalenarusti cutsuyiwa.

35. Take orakenacan uñjcañaw Awquejj kollan amparap uñstayi. Take orak thiyanacasti, Awquin khespiyañaparuw uñjapjjani. Awquimp nayampisti, mayaquïpjjtwa.

36. Ucapachaw phokhasini, cunatejj aqhäm kellkatäc ucajja: Pʼarjjtam, wastatamp pʼarjjtam, chʼaman cancañamp isthapisim, Siona. Jiwaquïqui uca isinacamp isthapisim Jerusalena, kollan marca, cunalaycutejj jichhürut ucsarojja, jan circuncidatanacamp kʼañunacampejj janiw jumar maqhatapcätamti.

37. Lakʼat thalarasim; sartam, kontʼasim Jerusalena. Cunca chinuñamat antutayasim, Sionan catuntat phuchapa.

38. Cunalaycutejj aqhäm siw Tatitojja: Jumanacajj jan cunaruw aljasipjjtajja; ucatsti, jan kollkempiw cutsuyatäpjjaraquïta.

39. Chekpach chekpachaw sapjjsma: Jakenacajjajj sutijjaruw uñtʼapjjani. Jïsa, parlqui ucan nayätajj ucürun yatipjjani.

40. Ucapachaw jupanacajj sapjjani: Qhititejj suma yatiyäwinac jupanacar apanqui, sumancañ yatiyqui, asqui suma yatiyäwinac jupanacatac apanqui, khespiyañ yatiyqui, Sionarojj Diosamaw sarayi –sisqui ucan cayunacapajj kollunacjjan cunja jiwaquisa!

41. Ucapachaw aqhäm artʼäwejj mistuni: Jithektapjjam, jithektapjjam, ucqhat mistupjjam; kʼañüqui ucjja jan llamctʼapjjamti; uca taypit mistupjjam; kʼomäpjjamay Tatitun kerunacap apirinaca.

42. Janiw lak sarapjjätati, janiraquiw jaltasas sarapjjätati, cunalaycutejj Tatituw jumanacan nayrakatam sarani. Israelan Diosapaw khepam sararaquini.

43. Jïsa, lokerijjajj suma amuyasisaw take cun lurani. Jupajj aytatäniwa, wakaychatäniwa, wali alayancaraquiniwa.

44. Cunjämatejj waljanejj jumat muspharapquejja – jupan uyñakapajj sinti mayjtʼatänwa, take jaket sipana, janchipasti jaken wawanacapat sipansa –

45. Uqhämaw jupajj walja marcanacjjar chʼalljjatani. Cunatejj orak pʼekechirinacar jan yatiyatäc uc jupanacajj uñjapjjani; jan istʼapqui ucjjat jupanacajj lupʼipjjaraquini; ucat orak pʼekechirinacajj jupatac lacanacap jistʼthapisipjjani.

46. Chekpach chekpachaw sapjjsma: Cunjämatejj Awquejj nayar camächit churquitojja, uqhämaw take ucanacajj chekpach phokhasini. Ucatsti, Awquejj jakenacapamp arscän uca amtäwejj phokhasiniwa. Ucat Jerusalenan jakenacajjajj wastat utjapjjani. Ucasti jupanacan tuti orakeparaquïniwa.