1. Ucatsti, cunatejj aqhäm kellkatäqui ucajj puriniwa: Kʼochum machura, juma jan wawachasirïct uca; kʼochutatam, jachʼat artʼam, juma jan usurïct uca. Cunalaycutejj machuran wawanacapajja, jakechasit warmin wawanacapat sipan jucʼamp waljäniwa, –siw Tatitojja.

2. Chʼujllamajj utjqui ucawjitar jachʼaptayam; utanacaman carpa perkanacap jithitatayapjjpan. Jan cunans michʼasimti; wiscanacam jachʼaptayam; chʼacurunacam chʼamañcham.

3. Cupi toker chʼeka tokeruw jilatatäta. Jathanacamasti gentilenacaruw tutjam catokapjjani, chʼusa jaytanucut marcanacan jacapjjaraquini.

4. Jan ajjsaramti, janiw jumajj pʼenkachatäcätati, janiraquiw pejjtuyatäcätati, janiw jiscʼachatäcätati; tawaköcäyät ucapach pʼenkamat armasïtawa, nayrapach tokenokatätamat janiw amtcätati, ijma warmi cancañamp tokenokatätamat janiw jucʼamp amtcätati; uqhämasti, jan ajjsaramti.

5. Cunalaycutejj jumar utjayctam ucajja, chachamäcaspas uqhämawa, Arctirinacan Tatitupa – satawa. Khespiyirimasti Israelan Kollanapawa, take acapach oraken Diosapa –satäniw jupajja.

6. Cunalaycutejj jumajj jan catokatäcta ucapachajja, mä qhitanucuta, chuyman llacthapit warmirjama, mä tawako warmirjamaraquiw Tatitojj jumar jawstamjja, –siw Diosamajja.

7. Mä jucʼa pachajj jumaruw qhitanucsmajja, ucampis jachʼa qhuyapayäwinacampiw jumar irpthapïma.

8. Mä jucʼa colerasisaw jumat ajanujj imantasta, ucampis wiñay munasiñampiw jumar qhuyapayäma –siw Cutsuyir Tatitumajja.

9. Cunalaycutejj, nayataquejj Noen umanacapjamäniwa. Cunjämatejj Noen umanacapan jan wastat orakjjar mantaniñapatac chekpach arstjja, uqhämaraquiw chekpach arsta, jan jumatac colerasiñajjataqui.

10. Kollunacajj jithektaniwa, jiscʼa kollunacajj apakataraquïniwa, ucampis munasiñajjajj janiw jumat jithektcaniti, janiraquiw jakenacajjan amtäwipajj apakatäcaniti –siw jumar qhuyapayir Tatitojja.

11. Juma tʼakhesita, khoru thayan liwita, jan chuymachata! Kalanacamjja jiwa suma coloranacampiw uscöjja. Takananacam munat zafiro kalanacampiw luräjja.

12. Ventananacamsti munat agata kalanacampiw lurä, puncunacamsti munat rubi kalanacampi, take chutanacamsti suma kalanacampiw luraraquï.

13. Take wawanacamajj Tatitun yatichatäpjjaniwa; wawanacaman sumancañapasti jachʼaraquïniwa.

14. Asqui cancañan ut-tʼayatäyätawa; janiw ajjsarcätati, ucat tʼakhesiyañat jayancätawa. Ajjsarthapiñajj janiw jumar jacʼachascätamti, ucat ajjsarthapiñat jayancäta.

15. Jïsa, jupanacajj chekpachaw juma contra nuwasir mayachthapipjjani, ucampis janiw nayampïquiti. Take qhitinacatejj juma contra nuwasir mayachthapipcan ucanacajja, tincupjjaniwa juman sumancañamataqui.

16. Ninanquir sancʼanacar phusqui, uqhämaraqui, luräwip lurañapatac mä irnakañ lekʼsqui, uca jiru lekʼeriruw nayajj lurta. Nayaraquiw tucqhirirojj luraracta, tucqhañataqui.

17. Janiw cuna juma contra nuwasiñatac nuwasir irnakañanacajj jachʼaptcaniti. Take jumar juchañchañatac sartir lajjraruw jumajj juchañchäta. Acajja, Tatitun lokerinacapan tuti catuyäwipawa; jupanacan asqui cancañapasti nayat juti –siw Tatitojja.