1. Chekpach chekpachaw sapjjsma: Jan aca orakenquir yakha ovejanacajj utjaraquituwa. Janiw Jerusalen orakenquiritaqui, janiraquiw cunawjarutejj yatichir sarcta uca oraken muytatanacapatäquisa.

2. Qhitinacjjat-tejj arscta ucanacajja, janïraw arujj istʼapquiti. Janiraquiw mä cutis jupanacar nayajj uñstcti.

3. Ucampis Awquijjat mä camächit catokta jupanacar sarañajjataqui, arujj istʼapjjañapataqui, ovejanacajj taypin jaqhutäñapataqui, mä sapa tama, mä sapa awatir utjañapataqui. Uqhämasti, naya pachpaw uñachayasir sarä.

4. Saratajj khepatsti aca arunac kellkañamataquiw camächit churapjjsma. Acanac kellkapjjäta, ucat qhitinacatejj nayar uñjapquitäna, nayan kollan luräwinac luripan nayampïpcaraquïna, Jerusalenanquir uca jakenacajjajj Kollan Ajay toket jumanacjjat yakha jupanacan jan yatit tamanacjjat yatiñanacapataqui, janitejj sutijj-jjar Awquit mayisipcan ucqhajja, cuna satanactejj kellkapcät ucanacajja, imatäniwa, gentilenacar uñstayataraquïniwa. Ucanacan gentilenacar uñstayatap laycu, cawquïr Jerusalenanquir jakenacajjan jathapat jiltʼirinacatejj jan iyawsatap laycu, take acapach orakjjar chʼeketatatäpcan ucanacajja, gentilenacan phokhatäñap toket irpthapitäpjjani; ucasti sañ muni, naya Khespiyiripat yatiñar irpanitäpjjaniwa.

5. Ucapachasti nayaw jupanacar oraken pusi thiyanacapatpach irpthapï. Ucatsti, cuna arusjäwtejj Awquejj take Israelan utapanquir jakenacamp lurcän uca amtäw phokhä.

6. Nayamp Awquimpi gentilenacar ircatqui uca Kollan Ajayu toket gentilenacan nayar iyawsatap laycojja, qhuyapayataw jupanacajja.

7. Jïsa, jupanacan nayar iyawsatap laycuw –siw Awquejja, uqhämaraqui juma Israelan utapan jan iyawsatam laycojja, khep khepürunacanjja chekajj gentilenacaruw purini, acanacjjat jupanacar phokhatpach yatiyañataqui.

8. Ucampisa, ay jan iyawsir gentilenacata –siw Awquejja, cunalaycutejj jupanacajj aca orakjjar jutapc-chïnsa, Israelan utapanquir nayan jakenacajjar chʼeketatayapc-chïnsa, uqhämaraqui Israelan utapanquir nayan jakenacajj jupanac taypit alis-sutäpc-chïnsa, cayunacapan taquisitäpc-chïnsa,

9. Awquin gentilenacar qhuyapayäwinacap laycu, Awquin Israelan utapanquir jakenacajjar taripäwinacap laycuraqui, chekpach chekpachaw sapjjsmajja: Take ucanac khepatjja, uqhämaraqui Israelan utapanquir jakenacajjar nayan jawkʼayatajja, tʼakhesiyatajja, jiwayayatajja, jupanac taypit alis-suyatajja, jupanacan uñisiyatajja, jupanac taypin mä ajjtcañ ñankha arjamar tucuyatajj khepatsa –

10. Aqhäm Awquejj nayan jumanacar sañajjatac camächit churitu: Cunüruntejj gentilenacajj asqui yatiyäw toke juchachasipcani, aytat chuymanacapan aytatäpcani take marcanacat sipana, take acapach orakenquir jakenacat sipansa, cunüruntejj jupanacajj take cunayman cʼarinacampi, sallkjañanacampi, thijwäwinacampi, take cunayman cʼari chuymanïñanacampi, kʼañusiñ wachokañanacampi, jamas ajjtcañanacamp ucürun phoktʼasipcani, ucatsti jupanacatejj take ucanac lurapjjani, phokhatpach asqui yatiyäwijjar janitejj catokapcaraquinejja, ucat aqhäm siw Awquejja: Phokhatpach asqui yatiyäwijj jupanac taypit apsusjjäwa.

11. Ucapachajja, Israelan utapa, jakenacajjamp mantctjja uca arusjäwijjat amtäjja, ucatsti asqui yatiyäwi jupanacar aparaquï.

12. Gentilenacan jumanacjjar jan chʼamanïñapjja jumanacarojj uñachayapjjämawa, Israelan utapa. Jumanacataquiw amtäwijjat amtasï, Israelan utapa, jumanacasti phokhatpach asqui yatiyäwijjat yatjjapjjätawa.

13. Ucampis gentilenacatejj juchat cutiquipstapjjanejja, nayar cutiquipstapcaraquinejja, –siw Awquejja, jupanacajj nayan jakenacajjamp jaqhutäpjjaniwa, Israelan utapa.

14. Janiraquiw Israelan utapanquir jakenacajj jaytcäti jupanac taypir sarañapataqui, jupanacjjar tacjjatañapataqui –siw Awquejja.

15. Ucampis jupanacajj janitejj nayar cutiquipstapcani, arujjar jan yäkapcaraquinejja, jakenacajjaruw jaytäjja, jïsa, Israelan utapa, jakenacajjaruw jaytäjja jupanac taypir sarañapataqui, jupanacjjar tacjjatañapataqui. Jupanacasti chʼaphak tucuta jayjamäpjjaniwa, cunatejj ucqhat ucsarojj jan cunatac walïcani, jan ucajja, jakonucuñataquiqui, uqhämaraqui jakenacajjan cayunacapan taquisitäñataquiqui, Israelan utapa.

16. Chekpach chekpachaw sapjjsma: Aca jakenacar nayan aca orak tutjam churañajjataquiw Awquejj camächit churitu.

17. Ucatsti Isaiasan aqhäm sir arunacapajj phokhasiniwa:

18. Uñjirinacamajj jachʼat artʼapjjani. Mä arutjam kʼochupjjani, cunalaycutejj Tatitojj wastat Sion cut-taycan ucapachajja, jupanacajj quipcjam amuyapjjani.

19. Cusisthapipjjam, mayatjam kʼochupjjam, juma Jerusalenan chʼusawjanacapa. Tatitojj jakenacaparojj chuymachiwa, Jerusalenarusti cutsuyiwa.

20. Take orakenacan nayraparuw Tatitojj kollan amparap uñstayi. Take acapach orak thiyanacajj Diosan khespiyañapar uñjapjjaniwa.