1. Ucatsti cawquïr Awquin Malaquiasar churat arunactejj jupajj jupanacar arsuspa, uca arunac kellkapjjañapataquiw camächit churäna. Ucatsti uca arunacajj kellkatäcän ucapachaw jupajj ucanacjjat khanañchäna. Jupajj jupanacaruw aca arunac arsüna, aqhäm sasa: Aqhämaw Awquejj Malaquiasarojj säna: Nayajj qhitajjaruw qhitä; jupasti nayrakat sarasaw thac waquichani; qhitirutejj thakapcta uca Tatitojj acatjamat kollan utapar jutaraquini, jïsa, qhitit-tejj jumanacajj cusisipcta, uca amtäwi qhitajja. Jïsa, jupaw jutani –siw Arctirinacan Tatitupajja.

2. Ucampis, qhitis jutañap urun thurtʼasispajja? Jupajj uñstcan ucapachajja, qhitis saytʼasispajja? Cunalaycutejj jupajj jiru umatatayir ninjamawa, wali kʼomachir jabonjamaraquiwa.

3. Kollke umatatayiri, kʼomaptayir jakjamaw jupajj kontʼani. Levin yokanacaparusti jupajj kʼomaptayaniwa, koritjam kollketjam jupanacat kʼañjj apsuni, jupanacan mä asqui cancañ loktäwi Tatitur loktapjjañapataqui.

4. Ucatsti nayra pachanacanjama, nayra maranacanjamaw Judampin Jerusalenampin loktäwipajj Tatitur cusisiyani.

5. Taripañataquisti nayaw jumanacar jacʼachasinipjjäma. Ucatsti laykanac contra, wachokerinac contra, cʼari juräwi luririnac contra, mincʼanacaru, ijama warminacaru, jan tataninacar jucʼa payllas tʼakhesiyirinac contra, jan uñtʼat jakenacar jithektam – sas arusirinac contra, jan nayar ajjsaririnac contrasa, nayajj mä laka ircatirïyaw –siw Arctirinacan Tatitupajja.

6. Cunalaycutejj nayajj Tatitütwa; janiw nayajj yakhar turc-cti; ucatjja, juma Jacobon yokanacapajj janiw tucqhatäpctati.

7. Awquinacaman urunacapatpach jumanacajj kollan luräwinacajjat saranucupjjta; janiw ucanacar phokhapctati. Nayar cut-tanipjjeta, ucat nayajj jumanacar cut-tanipjjämaw –siw Arctirinacan Tatitupajja. Ucampis jumanacajj sapjjtawa: Cuna toketsa cut-tanipjjäjja?

8. Mä jakejj Diosat lunthataspati? Ucampis jumanacajj nayat lunthatapjjestawa. Ucat jumanacajj sapjjtawa: Cunsa jumat lunthatapjjsma? Tuncat maya churañanaca, loktäwinacampina.

9. Jumanacajja, jïsa, take aca marcpachaw nayat lunthatapjjesta; ucat mä ñankhachäwimpiw jumanacajj ñankhachatäpjjta.

10. Tuncat maya churäwinac uta sejjer apanipjjam, utajjan juyra utjañapataqui. Jichhasti, uc lurasajj nayar yantʼapjjeta –siw Arctirinacan Tatitupajja, uñjapjjañamataqui alajjpachan puncunacap jumanacatac nayan jistʼarañajjsa, jumanacjjar jachʼa qhuyapayir churäw wartaniñajjsa, uc jilarquir catokañamcama jumanacan mä chekan uc catokañataqui jan utjañapcama.

11. Tucqhirirojj jumanac laycuw tokenokä; jupasti janiw yapuman achunacap tucjcaniti. Janiraquiw uva alimajj janïr pokotäcasin achup yapunacaman liwirtaycaniti –siw Arctirinacan Diosapajja.

12. Take marcanacaw jachʼaptayata –sasajja, jumaruw sutichapjjätam. Cunalaycutejj orakemajj mä qhusa orakëniwa –siw Arctirinacan Tatitupajja.

13. Arunacamajj naya contrajj khoruwa –siw Tatitojja. Ucampis jumanacajj sapjjtawa: Cuns juma contrajj arsupjjsma?

14. Jumanacajj sapjjtawa: Diosar loktañajj inamayawa. Cunataquis wali jiwasanacan jupan kollan luräwinacap lurapjjatasajja, Arctirinacan Tatitup nayrakatan llaquisit sarnakapjjatasajja?

15. Jichhasti jachʼa jachʼa tucurinacarojja, cusisitäpjjewa –sapjjtanwa; jïsa, ñankh luririnacajj aytatäpjjewa; jïsa, Diosar yantʼirinacasti antutataraquiwa.

16. Ucatsti Diosar ajjsaririnacajj jupanac puraw wal parlasipjjäna. Tatitusti ucarojj yäkänwa, istʼaraquïnwa. Jupan nayrakatapansti amtasiñataquiw mä kellkajj kellkatäna Tatitur ajjsaririnacataqui, jupan sutipat lupʼirinacataquiraqui.

17. Jupanacajj nayancaniwa, cunüruntejj munat kalanacajjar asquichcä ucürunjja –siw Arctirinacan Tatitupajja. Cunjämatejj mä jakejj jupar loker yokaparojj qhuyapayaspajja, uqhämaraquiw nayajj jupanacarojj qhuyapayä.

18. Ucatsti jumanacajj cut-tasinjja, yatipjjätawa, asqui jakets ñankha jaketsa, Diosar loker jaketsa jupar jan loker jaketsa.