23ri Jalja
Khespiyirejj camächit churi mä kawkha jan kellkat cunanacan Nefi jakenacan kellkäwinacapar kellkatäñapataqui – Samuel sat Laman jaken arjäwipajj kellkatawa.
1. Jichhasti, nayajj jumanacaruw sapjjsma: Take acanacjj yatjjatapjjañamawa. Jïsa, mä camächit churapjjsma ucanac take chuymamp thakapjjañamataqui, cunalaycutejj Isaiasan arunacapajj jachʼawa.
2. Jupajj Israelan utapanquir jakenacajjan take cunanacapjjat chekpachaw arsüna. Uqhämasti gentilenacar arsuñapajj waquisiraquiwa.
3. Take cunanactejj jupajj arscän ucanacajja, jupan arsut arunacaparjamaw phokhasi, phokhasiraquini.
4. Uqhämasti, arunacajjar yäkapjjam; yatiyapcsma ucanac kellkapjjam. Ucatsti Awquin munañaparjamaw waquiscan ucapachajj gentilenacar ucanacajj mistuni.
5. Take qhitinacatejj arunacajjar yäkapcani, juchat cutiquipstapcani, bautisasipcaraquin ucanacajja, khespiyatäpjjaniwa. Diosan walja arjirinacaw ucanacjjat ircatapjje, Uqhämasti, arjirinacan thakapjjam.
6. Ucatsti Jesusan uca arunac jupanacar arsutap khepatsti, wastat jupanacarojj parlänjja; cuntejj jupanacajj catokapcän take uca kellkatanacjjat jupanacar khanañchatap khepata, jupanacarojj säna: Yakha kellkatanac kellkañam munirista. Ucanacasti janiw jumanacan utjquiti.
7. Ucatsti jupajj Nefiruw säna: Imctajj uca kellkat apanim.
8. Nefin uca kellkatanac apanitapatjja, jupan nayrakatapar ucanac uchatapatjja, jupajj nayrapamp ucanacjjar uñjjatasaw säna:
9. Chekpachaw jumanacar sapjjsma: Nayan Samuel sat Laman jake lokerijjaruw mä camächit churäyäta, jupan aqhäm sas ircatañapataqui: Cunüruntejj Awquejj sutipar Criston khapakaptaycani ucürunjja, walja kollan jakenacaw jiwatat jactapjjani, jupanacasti waljaniruw uñstapjjani, jupanacarusti chʼamampiw tumpapjjaraquini. Cristosti jupanacarojj sänwa: Janit uqhäm lurascänjja?
10. Yatekerinacajj ucjjaruw sapjjäna: Jïsa, Tata, Samuelajj arunacamarjamaw arjäna; take ucanacasti phokhasiraquiwa.
11. Jesusasti jupanacarojj sänwa: Cunjämats ucjjat jan kellkapcta, walja kollananacan jactatanacapjjata, waljanir uñstatanacapjjata, jupanacar chʼamamp tumpatanacapjjatsa?
12. Ucatsti Nefejj ucan jan kellkatätap amtasïna.
13. Ucatsti Jesusajj uc kellkañataquiw camächit churäna; ucatsti camächitaparjamaw ucajj kellkasïna.
14. Ucatsti take jupanacan kellkat kellkatanacjja, mayar apthapisaquiw Jesusajj khanañchäna. Ucatsti cuntejj jupajj khanañchcän ucanacjja, jupanacan yatichañanacapataquiw camächit churäna.