1. Ucatsti Jesusajj uca sañanac tucuyasinjja, walja jakenacar uñatatasaw jupanacarojj sï: Awquijjar janïr maqhatcta ucapachajj cunanactejj yatichtʼawayctjja ucanac niy istʼapjjtawa. Uqhämasti, qhitinacatejj aca arsutanacajj amtasipcan lurapcaraquin ucanacarojja, khep khepa urun aytä.

2. Uca arunac arsusinjja, Jesusajj yakhepanacan muspharañapat amuyäna. Cuntejj jupajj Moisesan leyipat muncaspa uc jupanacajj yatiñ munapjjäna. Cunalaycutejj janiw arjj amuyapcänti, nayra cunanacajj sarakatajjänwa machakar tucutäjjaraquïnwa, take cunanacasti machakaruw tucjjäna.

3. Jupasti jupanacarojj siwa: Merkʼe cunanacajj niy sarakatäjjewa; take cunanacaw machakar tucjjaraqui –satajj laycojj jan muspharapjjamti.

4. Jichhasti, nayajj jumanacaruw sapjjsma: Cuna leyitejj Moisesar churatäcän uca leyejj phokhatpach tucutawa.

5. Jïsa, qhititejj ley churcän ucajja, nayätwa. Qhititejj Israel jakenacajjampi mä amtäwir mantcän ucajja, nayätwa. Uca laycuw nayan leyejj phokhatpach tucuyata. Nayajj leyirojj phokhatpach tucuyiriw jut-ta; ucat leyejj tucusi.

6. Amuyapjjam, chekpachaw sapjjsma: Nayajj janiw Diosan arjirinacar tucjcti, cunalaycutejj cawquïr arunacapatejj janïr nayan phokhasqui take uca arjirinacan arunacapajj phokhasiniwa.

7. Jumanacarusti merkʼe cunanacajj sarakatäjjew satajj laycojja, janiw tucjcti, cunanacatejj jutir cunanacjjat arsutäqui ucanacjja.

8. Cunalaycutejja, cuna amtäwtejj jakenacajjamp lurcta uca amtäwejj janïraw phokhatpach phokhasquiti. Ucampis Moisesar churat leyejja, nayan tucusi.

9. Nayajj leyïtwa, khanaraquïtwa. Nayar uñjapjjeta, tucusiñcam nayar arcasipcaquita, ucat jacapjjätawa. Qhititejj tucusiñcam nayar arcquitan ucarojja, wiñay jacañ churä.

10. Nayajj camächitanac churapjjsma; uqhämasti, camächitanacajjar phokhapjjam. Ucasti leyiwa, Diosan arjirinacaraquiwa, cunalaycutejj ucanacaw chekpach nayat ircatapjjäna.

11. Jesusasti uca arunac arsusinjja, jupan ajllit tunca payanirojj siwa:

12. Jumanacajj yatekerinacajjäpjjtawa. Aca Josean utapat jiltʼir jakenacataquejja, jumanacaw mä khanäpjjtajja.

13. Acasti jumanacan tuti orakemawa. Awquisti uc churapjjtam.

14. Janiraquiw cunapachas Awquejj nayar camächit churquituti, Jerusalenanquir jilanacamar ucjjat yatiyañajjataqui.

15. Janiraquiw cunapachas Awquejj nayar camächit churcaraquituti, jupanacar yatiyañajjataqui Israelan yakha utapanquir tamanacjjata, qhitinacatejj Awquejj uca oraket irpsunqui ucanacjjata.

16. Ucampis acaquiw utji jupanacar sañajjataqui: Awquejj nayar camächit churitu;

17. Jan aca tamanquir yakha ovejanacajj utjaraquituwa; ucanacar irpaniñajjajj waquisiraquituwa; ucanacasti nayan arujj istʼapjjani; ucatsti mä sapa tama, mä sapa awatiriquiraquiw utjani.

18. Ucampisa, jupanacan jan altʼat chuymanïpjjatapata, jan pʼekenïpjjatapata, jan iyawsirïpjjatap laycojja, janiw arujjat amuyapcänti. Uca laycuw Awquejj camächit churitäna jan jucʼamp ucjjat jupanacar sañajjataqui.

19. Ucampis chekpachaw sapjjsma: Awquejj camächit churitu, ucat acjja jumanacar sapjjsma: Jupanacan ñankhätap laycuw jumanacajj jupanacat jaljtatäpjjtajja. Uqhämasti, ñankhäpjjatap laycuw jumanacatjj jan yatipquiti.

20. Chekpachaw sapjjsma: Awquejj jupanacatjja yakha tamanac jaljaraqui. Jan jupanacjjat yatiñapasti jupanacan ñankhätap laycuraquiwa.

21. Chekpachaw jumanacar sapjjsma, ac sasajja, jumanacat parläyätjja: Jan aca tamanquir yakha ovejanacajj utjaraquituwa; ucanacar irpaniñajjajj waquisiraquituwa; ucanacasti arujj istʼapjjani; ucatsti mä sapa tama, mä sapa awatiriquiraquiw utjani.

22. Ucanacajj gentilenacäcaspas uqhäm jupanacajj amuyasipjjäna, cunalaycutejj janiw amuyapcänti, jupanac pachpan yatichañap toket gentilenacajj Diosar cutiquipstañ amuyayatäpjjani. Uca laycuw jupanacajj arsutajj jan amuyapcänti.

23. Nayan arujj istʼapjjani –sasin satajjatjja, janiraquiw amuyapcänti. Janiraquiw amuyapcaraquitänti gentilenacan jan cunapachas arujj istʼañapjjata, nayan jan jupanacar uñachtʼayasiñajjata, jan ucasti, Kollan Ajayu toketaqui.

24. Ucampis jumanacajj arujj niy istʼjjapjjtawa, nayarus uñjapjjaraquistawa. Jumanacasti ovejanacajjäpjjtawa; cawquïrinactejj Awquejj nayar churquitän ucanacamp jaqhutäpjjaraquïtawa.