1. Ucatsti Jesusan alajjpachar maqhatatapatjja, walja jakenacaw sarawayapjjäna. Sapa jakesti warmipamp wawanacapampejj quipca utanacaparuw cut-tawayapjjaraquïna.

2. Janïr chʼamacthapquipana, mäquiw marcarojj yatiyasïna, walja jakenacan Jesusar uñjapjjatapata, jupan jupanacar chʼamampi tumpatapata, jupan khepärmanthejj wastat walja jakenacar uñachayasiñapjjata.

3. Jïsa, arum pakariw Jesusjjat take token yatiyapjjäna. Jakenacar yatiyiriw waljanir qhitapjjäna; ucat waljanipuniwa, jïsa, sinti waljaniw arum pakarejj sint irnakapjjäna, cawqhantejj Jesusajj walja jakenacar uñstañapäcän ucawjar khepärmanthejj puriñanacapataqui.

4. Ucatsti uca khepärmanthejja, walja jakenac tantachthapitäcän ucapachaw Nefimpi, jiwatat sartaycäns uca Timoteo sat jilapampi, jupan Jonas sat yokapampi, Mathonimpi, Mathoniha jilapampi, Kumenampi, Kumenonhimpi, Jeremiasampi, Shemnonampi, Jonasampi, Sedeciasampi, Isaiasampejja – cawquïr yatekerinacarutejj Jesusajj ajllcän ucanacan sutinacapaw ucanacajja, ucat jupanacaw nayrakatar uchasipjjäna, uca waltʼat jakenac taypin saytʼapjjaraquïna.

5. Uca walja jakenacasti sinti waljänwa, ucat jupanacajj jakenacarojj tunca payan tamaruw jaljtayapjjäna.

6. Tunca payanisti jakenacaruw yatichapjjäna. Jïsa, walja jakenacaruw orakjjan konkortʼasiyapjjäna, Jesusan sutipjjar Awquit mayisipjjañapataqui.

7. Yatekerinacajja Jesusan sutipjjaruw Awquit mayisipjjaraquïna. Ucatsti jupanacajj saytʼasaw jakenacar yatichapjjaraquïna.

8. Jesusajj arscän uca quipca arunac yatichapcän ucqhajja, Jesusajj arscän uca arunac jan cuns turcasaw wastat konkortʼasisin Jesusan sutipjjar Awquit mayisipjjäna.

9. Take cunat sipan munapcän ucataquiw mayisipjjäna. Kollan Ajayun jupanacar churatäñap munapjjäna.

10. Uqhäm mayisitap khepatsti, uma lacaruw sarakapjjäna. Walja jakenacaw jupanacar arcapjjaraquïna.

11. Ucatsti, Nefejj umaruw mantäna, ucat bautisatäna.

12. Jupasti umat mistüna, ucat bautisañ kalltäna. Cawquïrinacarutejj Jesusajj ajllcän ucanacaruw bautisäna.

13. Ucatsti takenin bautisasitapatjja, umat mistsutap khepatjja, Kollan Ajayuw jupanacjjar purïna. Kollan Ajayump ninampejja, jupanacan phokhantatänwa.

14. Jïsa, ninampïcaspas uqhämaw jupanacajj muytatäpjjäna; ucasti alajjpachat sarakänjja. Walja jakenacaw ucjj uñjapjjäna, ucjjat ircatapjjaraquïna. Alajjpach qhitanacasti alajjpachat sarakanisaw jupanacar tumpapjjäna.

15. Ucatsti alajjpach qhitanacajj yatekerinacaruw chʼamamp tumpapcäns uc-chañcamaw Jesusajj jutäna, jupanac taypin saytʼaraquïna, jupanacarusti chʼamampiw tumparaquïna.

16. Ucatsti walja jakenacaruw arsüna, wastat orakjjan konkortʼasipjjañapataqui, jupanacarojj camächit churäna, yatekerinacapan orakjjan konkortʼasipjjañapataquiraqui.

17. Cunapachatejj takenejj oraken konkortʼasipcän ucapachaw yatekerinacarojj camächit churäna, jupanacan mayisiñapataqui.

18. Ucatsti jupanacajj mayisiñ kalltapjjäna. Jesusarusti mayisipjjänwa: Tata, Diosajja –sas sutiñchasa.

19. Ucapachajj Jesusajj jupanac taypit mistusajj jupanacat mä jucʼa jithektasin oraker quilltʼasiraquïna. Jupasti siwa:

20. Tata, qhitinacarutejj ajllctsa ucanacar Kollan Ajay churatamat yuspagarsma. Jupanacan nayar iyawsapjjatap laycuw jakenac taypit jupanacar ajllta.

21. Tata, jupanacan arunacapar take iyawsirinacarojj Kollan Ajay churañamataquiw jumat mayis-sma.

22. Tata, nayar iyawsapjjatap laycuw jupanacarojj Kollan Ajay churtajja. Nayat mayisir istʼatam laycuw jupanacan nayar iyawsañap uñjtajja. Nayan jupanacampïtajj laycuw nayat mayisipjjetu.

23. Jichhajj Tata, jupanacataquiw jumat mayis-sma, uqhämaraqui take jupanacan arunacapar iyawsirinacataqui, jupanacan nayar iyawsapjjañapataqui, nayan jupanacancañajjataqui, cunjämatejj juma Awquejj nayanc-ctajja, jiwasanacan mayäpjjañasataqui.

24. Ucatsti Jesusajj uqhäm Awquit mayisisinjja, yatekerinacaparuw jutäna. Jupanacasti jan tucuyasaw jupat mayisisipcaquïna. Cuntejj mayisipjjañapäcän uc yatiñajj jupanacar churatänwa. Uqhämaraqui jupanacanjja mayisiñ munañajj phoktʼatänwa. Ucat jupanacajj janiw walja arunac jiljjatayapcänti.

25. Ucatsti jupanac Jesusat mayisipquipan jupajj jupanacar bendicïna. Uyñakapasti lliphipquiriw khantäna. Uyñakapan khanapasti jupanacjjaruw khanjjatäna. Cunjämatejj Jesusan uyñakapampi isinacapampejj jankʼöcänjja, uqhäm jankʼopjjaraquïn jupanacajja. Uca jankʼosti take jankʼonacat sipan jucʼampïnwa. Jïsa, acapach orakenjja uca jankʼjamajj janiw cuna jankʼos utjcaspati.

26. Jesusasti jupanacarojj, mayisisipcaquim –sänwa. Ucampis jupanacajj janiw mayisiñ tucuyapcänti.

27. Ucatsti jupanacat wastat mä jucʼa jithektasaw oraker quilltʼasïna, ucatsti wastat Awquit mayisïna, aqhäm sasa:

28. Tata, qhitinacarutejj ajllctsa ucanacan iyawsañap laycu juman jupanacar kʼomaptayatamat yuspagarsma. Nayasti jupanacataquiw mayirapta uqhämaraqui arunacapar iyawsirinacataqui, acanacan arunacapar iyawsatap laycu jupanacan nayanjja kʼomaptayatäñapataqui, cunjämatejj acanacajj nayan kʼomaptayatäpqui uqhäma.

29. Tata, janiw takenitac mayiscsmati, antisas jupanacat nayar churquistajja ucanacataquiw mayis-sma, ucanacan iyawsatap laycu, ucanacan nayan kʼomaptayatäñapataqui, nayan jupanacancañajjataqui, cunjämatejj juma Awquejja, nayanc-cta uqhäma, jiwasanacan mayäpjjañasataqui, nayan jupanacan khapakaptayatäñajjataquiraqui.

30. Jesusajj uca arunac arsusinjja, wasitat yatekerinacar jutäna. Jupanacasti take chuymampiw jan tucuyas jupat mayisisipcapunïna. Jupasti wasitat jupanac laycojj cusisïna. Jupanacasti Jesusjam jankʼöpjjänwa.

31. Ucat wastat mä jucʼa jithektasinjja, Awquit mayisïna.

32. Cuna arumpitejj mayisis arscäns uca arunacjja, janiw lajjrajj arscaspati. Mayisis arscäns uca arunacasti, janiw qhiti jakens kellkañjamäquiti.

33. Jan jaqhcay jakenacaw ucjj istʼapjjäna, ucjjat ircatapjjaraqui. Chuymanacapasti jistʼartatäpjjänwa; ucat jupajj mayisis arscän uca arunacjja chuymanacapan amuyapjjäna.

34. Ucampis cuna arunacampitejj mayisis arscän uca arunacajja, sinti jachʼa muspharcañänwa; ucat janiw kellkañjamäquiti, janiraquiw qhiti jakens arsuñjamäquiti.

35. Ucatsti Jesusan mayisiñ tucuyatapatjja, wastat yatekerinacar jutäna ucat jupanacarojj saraquïna: Take judionac taypinjj janiw cunapachas aqhäm jachʼa iyawsañjj uñjcti. Uca laycuw jupanacarojj jan aqhäm jachʼa muspharcañanac uñachaycti, jan iyawsapjjatap laycu.

36. Chekpachaw sapjjsma: Cunanactejj jumanacajj uñjapcta uqhäm jachʼa cunanacjja, janiw qhitis jupanacat uñjapquiti; cunanactejj istʼapcta uqhämanacs janiraquiw istʼapquiti.