1. Chekpachaw jumanacar sapjjsma: Israelan utapa, jakenacajjar jayapach chʼeketatatapat irpthapcä, wastatamp jupanac taypin Sionajjar ut-tʼaycaraquï, uca cunanacan cunapach niy jutirjamätapat yatipjjañamataquiw mä unañch churapjjäma.

2. Jichhasti, aca unañch churapjjsma, acat kheparojja, naya pachpaw take cunanac arsupjjaraquïma; uqhämaraqui, Awquejj jumanacar churapcätam uca Kollan Ajayun chʼamap toketsa cunanac arsupjjaraquïma. –cunapachatejj uca arsutanacajj gentilenacar yatiyatäpcani jupanacan yatiñanacapataqui aca Jacobon utapat jiltʼir jakenacjjata, aca nayan jakenacajjataraqui, qhitinacatejj gentilenacamp chʼeketatayatäcan ucanacjjata –

3. Chekpach chekpachaw sapjjsma: Cunapachatejj ucanacajj jupanacar Awquin yatiyatäpcani, uqhämaraqui jupanacat jumanacarojj Awquin mistuyatäcani –

4. Cunalaycutejj jupanacan aca oraken ut-tʼayatäñapampi, mä antutat marcjam Awquin chʼamap toke ut-tʼayatäñapampejja, Awquin suma amuyuparjamawa, aca cunanacan jumanacan jathamat mä jiltʼir jakenacar jupanacat mistuñapataqui, Awquejj jakenacapamp lurcän uca amtäwin phokhasiñapataqui, oh, Israelan utapa,

5. Uqhämasti, cunapachatejj aca luräwinacajja, uqhämaraqui jichhürut ucsarojj jumanac taypin luratäcan uca luräwinacajj mistupcan gentilenacat jathamarojja, qhitinacatejj ñankha cancañ laycu jan iyawsas tʼuqhartapcan ucanacaru –

6. Cunalaycutejj ucan gentilenacat mistuñapajj Awquin amuyuparjamaw wactʼi, jupan chʼamap gentilenacar uñachayañapataqui. Gentilenacatejj chuymanacapar jan chʼollkheptayasipcanejja, jupajj uc lurani jupanacan juchat cutiquipstañanacapataqui, nayar jutañanacapataqui, sutijj-jjar bautisasiñanacapataqui, yatichäwijjan cheka cunanacap yatiñanacapataqui, nayan jakenacajj taypin jaqhutäñanacapataqui, oh, Israelan utapa;

7. Ucatsti cunapachatejj ucanacajj lurascani jathaman aca cunanacjjat yatiñ kalltañanacapataqui – ucajj jupanacataquejj mä unañchäniwa, jupanacan yatiñanacapataqui Awquin luräwipan niy kalltatapjjata, jupajj Israelan utapanquir jakenacatac lurcän uca amtäwir phokhañataqui.

8. Cunapachatejj ucürojj purcan ucapachajja, cunatejj orak pʼekechirinacar jan yatiyatäqui uc jupanacajj uñjapjjani; jan istʼapqui ucjjat jupanacajj lupʼipjjaraquini; ucat orak pʼekechirinacajj lacanacap jistʼthapisipjjani.

9. Cunalaycutejj ucürunjja nayataquiw Awquejj mä luräw lurani. Ucasti jupanac taypinjja mä jachʼa muspharcañ luräwïniwa. Mä jakejj uc jupanacar yatiyc-chinisa, jupanac taypin uc jan iyawsirinacajj utjascaquiniwa.

10. Ucampis lokerijjan jacañapajj amparajjancaniwa; ucat jupanacajj janiw jupar usuchjapcaniti, ucampis jupanac laycojj jupajj mayjtʼatäniwa. Ucampis juparojj cʼumaraptayäwa, cunalaycutejj supayan sallkja amuyupat sipansa nayan suma amuyunïtajjan jachʼätap jupanacar uñachayä.

11. Ucatsti, jupa toket Awquejj nayan arunacajj gentilenacar uñstayani, juparusti uca arunac gentilenacar uñstayañatac chʼam churaraquini; ucat qhitinacatejj naya Jesucriston arunacajjar jan iyawsapcanejja, (cunjämatejj Moisesajj arscän uqhäm luratäniwa), jupanacajj nayan amtäwinquir jakenacajj taypit jakorpayatäpjjaniwa.

12. Nayan Jacobot jiltʼir jakenacajjajj gentilenac taypincapjjaniwa; jïsa, jupanac taypincapjjaniwa, cunjämatejj leonajj chʼumi lakʼonac taypincquejja, cunjämatejj ancut leonajj ovej tamanac taypincquejj uqhäma. Ucatejj ucanac taypinjam saraspajja, tacjjataspawa, wiqhanokaraquispawa; janiraquiw qhitis ucanacar khespiycaraquispati.

13. Amparapajj take uñisirinacapjjar aytatäniwa. Take timanacapasti phatʼanucutäpjjaraquiniwa.

14. Jïsa, janitejj gentilenacajj juchat cutiquipstapcanejja, ay jupanacata! cunalaycutejj ucürunjja caballonacamarojj jumanac taypit apakäwa, carronacamarusti tʼunjaraquïwa –siw Awquejja.

15. Orakemanquir marcanac saparstʼayä; take chʼaman pucaranacam tincuyä.

16. Laykantañanacjj orakemat phatʼsüwa, janiw chektʼirinacajj jumanac taypin utjcjjaniti.

17. Lekʼsut wacʼanacamarojj tʼunjäwa, uqhämaraqui saytʼat wacʼanacam jumanac taypin phatʼsöjja; janiw jucʼamp amparamamp lurat cunanacar yupaychapcätati.

18. Chʼuminacam jumanac taypit jiqʼirä, uqhämaraqui marcanacam tucqhä.

19. Ucatsti take cʼarisiñanacampi, sallkjañanacampi, kʼenasiñanacampi, chʼajjwäwinacampi, sallka sacerdotëñanacampi, kʼañusiñanacampi, wachokañanacampejj tucusiniwa.

20. Cunalaycutejj Awquejj siwa: Ucürunjja, qhitinacatejj juchat jan cutiquipstascani, Munat Yokajjar jan jutapcaraquin ucanacarojja, jakenacajj taypit jakonucü, oh, Israelan utapa.

21. Timasiñamp khoru kʼapisiñampiw jupanacampir chʼunchʼunacampirojj tumpä, janipin cunapachas istʼapjjerïcän uqhäma.

22. Ucampis jupanacatejj juchat cutiquipstasin arunacajjar yäkapjjani, jan chuymanacapar chʼollkheptayasisa, nayajj jupanac taypiruw iyawsir tamajj ut-tʼayä, jupanacasti amtäwiruw mantapjjani; qhitinacarutejj aca orak tuti orakepatac churctjja, aca Jacobot jiltʼir jakenacamp jaqhutäpjjaraquiniwa.

23. Jupanacasti Jacobot jiltʼir jakenacajjaru, uqhämaraqui kawkha Israelan utapanquirinacatejj jutapcan ucanacaruw mä marc lurañapatac yanapapjjani. Uca marcasti Machak Jerusalen satäniwa.

24. Ucatsti, cawquïr jakenacajjatejj take orakjjan chʼeketatatäpcan ucanacaruw jupanacajj yanapapjjani, Machak Jerusalenar mayachthapisiñapataqui.

25. Ucatsti alajjpachan chʼamapajj jupanac taypiruw sarakani; nayasti jupanac taypincaraquïwa.

26. Cunüruntejj aca asqui yatiyäwejj aca jakenacan jathachat jiltʼirinac taypin yatiyatäcan ucürun, Awquin luräwipajj kalltani. Chekpachaw sapjjsma: Ucürunjja, Awquin luräwipajj take chʼeketatat jakenacajj taypin kalltani; jïsa, Awquejj Jerusalenat irpscän uca chhaktat tamanac taypin kalltani.

27. Jïsa, take nayan chʼeketatat jakenacajj taypin luräwejj Awquimpiw kalltani, jupanacan nayar jutañanacapatac thac waquichañataqui, jupanacan Awquit mayisiñanacapataqui nayan sutijj-jjaru.

28. Jïsa, ucapachaw take marcanac taypin luräwijj Awquimpejj kalltani, thac waquichañataqui jupan jakenacapan wasitat utaparu, tuti churat orakepar mayachthapiñapataqui.

29. Jupanacasti take orakenacat mistupjjani jan jancʼachasa, jan jaltasa, cunalaycutejj nayajj jupanacan nayrakataparuw sarä, khepapanjam sararaquï –siw Awquejja.