1. Nanacan kellkatajjarjamajj aqhamänwa. Mä asqui jakew kellkatanac imascäna, ucat uca kellkatanacan chekätap yatipjjta. Chekpachaw jupajj Jesusan sutipjjarojj walja muspharcañ luräwinac luräna. Janiraquiw qhitis Jesusan sutipjjarojj muspharcañ luräw lurcaspati, jan ñankhätapat kʼal kʼomaptayatäsinjja.

2. Ucatsti, janitejj uca jakejj maranac jaqhusajj pantjascänjja, quimsa tunc quimsan marajj niyaw sarakjjäna.

3. Jakenacasti take chuymampiw suyañ kalltapjjäna Samuel sat Lamanat sarakari arjirin yatiyat unañcharu, jïsa, chʼamacan quimsa uru orakjjan utjañaparu.

4. Sinti walja unañchanacas churatäc-chïnsa, jakenac taypinjja jachʼa pächasiñanacampi chʼajjwañanacampiw utjañ kalltäna.

5. Ucatsti quimsa tunc pusin marana, nayrïr phajjsina, pusïr uruna, mä jachʼa ajjsarcay chhijchhejj sartäna. Janipuniw cunapachas uca oraken uqhäm jachʼa chhijchhejj utjirïcänti.

6. Mä ajjsarcañ chʼaman thayaw thaytaraquïna. Ajjsarcañ khejjokhejjojj utjaraquïnwa. Ucasti take acapach orakeruw onjjtayäna, payar payar jaljtcaspas uqhäma.

7. Sinti jachʼa llijullijunacaw utjaraquïna. Janipuniw cunapachas aca orakenjja uqhäm llijullijunacajj utjirïcataynati.

8. Zarahemla marcarusti ninaw naqhantäna.

9. Moroni marcasti jachʼa kota lamar mankharuw jithintäna; ucanquir jakenacasti ajjscatapjjaraquïnwa.

10. Moroniha marcjjarusti lakʼaw chhaktayäna. Cawqhantejj uca marcajj utjcän ucawjarojja mä jachʼa kolluw uñstäna.

11. Aynach tokenquir orakensti jachʼa ajjsarcañ kʼala tʼunjäwiw utjäna.

12. Ucampis alay tokenquir orakenjja, jucʼamp jachʼa ajjsarcañ kʼala tʼunjäwiw utjaraquïna. Take uca orakejja mayjaruw tucjjäna, uca jachʼa ajjsarcay thayampi, tutucanacampi, khejjokhejjonacampi, llijullijunacampi, uc-chʼpach oraken sintipun onjjtatap laycu.

13. Jachʼa thaquinacajj kontu kontuptayatäsin chhaktayatänwa. Pampa thaquinacasti chhaktayatänwa. Walja pampawjanacaw tʼimphuraquïna.

14. Walja jachʼa aytat marcanacaw uma taypir orak mankhar jithintäna; waljaraquiw naqhantäna, waljaraquiw onjjtäna utanacan oraker tincurañapcama, ucan utjasirinacan jiwarañapcama, uca marcanacan chʼusar tucutäñapcama.

15. Mä kawkha marcanacajj achtʼaraquïnwa, ucampis ucanacanjja tʼunjäwejj sinti jachʼänwa, walja ucan utjasirinacaw jiwayatäpjjaraquïna.

16. Yakhepanacasti tutucan apatäpjjänwa. Cawqhar apatätaps janiw qhitis yatquiti. Jupanacan apatätapaquiw yatitajja.

17. Uqhämaw uc-chʼpach orakejj cunaymanar tucuyatänjja, jachʼa ajjsarcay thayanacampi, khejjokhejjonacampi, llijullijunacamp oraken onjjtatap laycu.

18. Jïsa, karkanacajj payaruw jaljtäna, uqhämaraqui cunayman chʼijutanacaruw tucuraquïna. Take orakjjan tʼun tʼunjatänwa, ucat uca karkanacasti chamkaruw tucüna uc-chʼpach orakjjana.

19. Ucatsti uca khejjokhejjonacampi, llijullijunacampi, ajjsarcay chhijchhimpi, ajjsarcay thayampi, orak qhathatïwinacampejj quimsa horas utjasin tʼacuräna. Yakhepanacajj quimsa horat jucʼampiw sapjjaraquiwa, ucampis take uca jachʼa ajjsarcañ tʼunjäwinacajj quimsa horasanjamaw lurasïna. Ucatsti take uca tucqhäwinac khepatsti, uc-chʼpach orakjjan chʼamacajj utjäna.

20. Ucatsti tuta chʼamacaw uc-chʼpach orakjjan utjäna, ucanquir jan liwitat-tat jakenacan uca chʼamac urpunac llamctʼañapcama.

21. Uca chʼamacan utjatap laycusti, janiw khanajj utjcänti; janiw velas nina wiyas khan utjaycänti. Janiraquiw sinti phara llakanacampis ninajj aktayañjamäcänti. Uqhämasti janiw cuna khanas utjcänti.

22. Janiraquiw cuna khanas uñstcänti; ninasa, khantir cunasa. Janiw intis phajjsis warawaranacas uñstcänti, uca orakjjan chʼamac urpunacan sinti chʼamacätap laycu.

23. Quimsürpachaw jan cuna khanarus uñjapcänti. Jachʼa jaqhusiñampi warariñampi jachañampiw take jakenac taypin sapa cut utjäna. Jïsa, cunatejj jakenacar purcäna, uca chʼamac laycu, uca jachʼa tʼunjäw laycuraquiw ayköwinacapajj jachʼäna.

24. Mayawjanjja jakenacarojj aqhäm sas waraririw istʼasïna: Janïr aca jachʼa ajjsarcañ urojj purquipanac juchanacasat cutiquipstapjjasäna; ucat jilanacasajj janiw jiwarayatäpcasapänti, uca jachʼa Zarahemla marcanjja janiraquiw naqhantapcasapänti.

25. Yakhawjanjja jupanacajj jachir jaqhusir istʼatäpjjaraquïna, aqhäm siri: Janïr aca jachʼa ajjsarcañ ur purquipanjj cutiquipstapjjaquisäna, janic Diosan arjirinacaparojj kalamp cʼupjasin jiwayapcasänti, janirac alis-supcasänti. Uqhämat mamanacasampi suma uynaktʼan phuchanacasampejj jan jiwarayatäpcasapänti, janiraquiw orakemp imantatäpcasapänsa uca jachʼa Moroniha marcanjja. Uqhämaw jakenacan ayköwinacapajj jachʼäna ajjsarcañaraquïna.