9ri Jalja
Diosan arupajj tucqhäwin jachʼätapjjat yatiyi, cunat-tejj purcän uc yatiyaraqui – Moisesan leyipajj phokhasiwa – Pʼaquintat altʼat chuym loktañajj waliquiwa.
1. Ucatsti take acapach utjasirinac taypina, take aca orakjjana, mä arojj aqhäm siriw istʼasïna:
2. Ay, ay, ay aca jakenacata! Ay take oraken jaquir jakenacata! Cutiquipstapjjasp ucqhaquiw jan uqhamäcaspati; cunalaycutejj supayajj arusiwa, lokerinacapasti cusisipjjewa, suma uynaktʼan yokanacapampin phuchanacapampin jiwarapjjatapatjja, ñankha luräwinacap laycu, ajjtcañ luräwinacap laycuw jupanacajj tincupjje!
3. Jïsa, uca jachʼa Zarahemla marcarojja, ucan utjasirinacamp-pacharuw ninamp naqhantayta.
4. Ucatsti, jachʼa Moroni marcaruw lamar pʼiyanacar jithintayaracta; ucan utjasirinacsti uman ajjscatayaracta.
5. Jïsa, uca jachʼa Moroniha marcjjar ucan utjasirinacjjaruw orakemp chhaktayta, ñankha luräwinacapamp ajjtcañ luräwinacapamp ajanujjat imantañataqui, arjirinacampin kollan jakenacampin wilanacapajj jupanacjjat ircatiri jan jucʼamp nayar jutañapataqui.
6. Gilgal marcsti orak mankharuw imant-ta; ucan utjirinacasti orak mankhanacaruw imantaracta.
7. Jïsa, Onia marcjjaru, ucan utjasirinacjjaru, Mocum marcjjaru ucan utjasirinacjjaru, Jerusalen marcjjaru ucan utjasirinacjjarojja, umanac maqhatayaracta, ñankhätapa ajjtcañ luräwinacap ajanujjat imantañataqui, arjirinacampin kollan jakenacampin wilanacapan jupanacjjat ircatir jan jucʼamp nayar maqhataniñapataqui.
8. Jïsa, Gadiandi marca, Gadiomna marca, Jacobo marca, Gimgimno marcjja orak mankharuw imant-ta; ucanacajj utjcän ucawjanacaruw kollunacs vallenacs luraracta. Ucanacan utjasirinacsti orak mankhanacaruw imant-ta, ñankhätapa ajjtcañ luräwinacap ajanujjat imantañataqui, arjirinacampin kollan jakenacampin wilanacapan jupanacjjat ircatir jan jucʼamp nayar maqhataniñapataqui.
9. Jïsa, Jacob pʼekechirin jakenacapajj utjapcänsa, uca Jacobugat marcarojj ninampiw naqhantayta juchanacapan ñankhätap laycu. Ucanacasti take oraken ñankhätapat sipan jucʼampïnwa, jupanacan jamasat jake jiwayäwinacapa, arustʼäwinacap laycu, cunalaycutejj jakenacajjan sumancataparu, aca oraken gobiernopar tucqhapcän ucanacän jupanacajja. Ucatsti jupanacaruw naqhantayta, ajanujjan nayrakatapat jupanacar tucqhañataqui, arjirinacampin kollan jakenacampin wilanacapan jupanacjjat ircatir jan jucʼamp nayar maqhataniñapataqui.
10. Jïsa, Laman marcaru, Jos marcaru, Gad marcaru, Quiscumen marcaru, uqhämaraqui ucanacan utjasirinacarojja ninampiw naqhantayaracta, jupanacan ñankhätap laycu, cawquïr arjirinactejj jupanacar ñankhätapjjat ajjtcañ luräwinacapjjat yatiyir qhitcäyät ucanacar jupanacan kalamp cʼupjatapata, alis-sutapata.
11. Jupanacan take ucanacar alis-supjjatap laycu, asqui jakenacan jupanac taypin jan utjañapcama. Jupanacjjarojj nin apayanta, jupanacar tucqhañataqui, ñankha luräwinacapamp ajjtcañ luräwinacapamp ajanujjat imantatäñapataqui, cawquïr arjirinacamp kollan jakenacamptejj jupanac taypir qhitcäyät ucanacan wilanacapan jan oraket jupanacjjat ircatir nayar maqhataniñapataqui.
12. Walja tʼunjäwinacampiw aca orakerojj usuchnokta, aca orakenquir jakenacjjarus puriyaracta, jupanacan ñankha luräwinacap laycu, ajjtcañ luräwinacap laycuraqui.
13. Take jumanaca, qhitinacatejj jan jiwayatäpcta ucanaca: Jupanacat sipan asquïtam laycuw puchuyatäpjjta, jichhajja, janit nayan ucar maqhatanipquitäta? Janit juchanacamat cutiquipstasin iyawsapquitäta? Janit nayan jumanacar cʼumaraptayañatac cutiquipstapquitäta?
14. Chekpachaw sapjjsma, jumanacatejj nayar jutapjjätajja, wiñay jacañanïpjjätawa. Uñjapjjam, qhuyapayir amparajjajj jumanacatac lokatatatawa. Qhitinacatejj jutapcan ucanacaruw catokä. Nayar jutirinacasti qhuyapayataraquiwa.
15. Jïsa, nayajj Jesucristötwa, Diosan Yokapa. Alajjpachanacampi acapach orakempi, take ucanacan utjquis ucanacampjja, nayaw lurta. Kalltäwitpachaw nayajj Awquimpïta. Nayajj Awquinctwa; Awquisti nayancaraquiwa. Nayan Awquejj sutipar khapakaptayi.
16. Nayanquirinacaruw jutäyäta. Nayanquirinacasti janiw catokapquituti. Nayan jutatajj-jjat yatiyir kellkatanacajj phokhasjjaraquiwa.
17. Take qhitinacatejj nayar catokapquit ucanacarojja, Diosan wawanacapar tucuñapataquiw churta. Take qhitinacatejj sutijjar iyawsapcan ucanacarusti uqhämaraquiw churaraquï, cunalaycutejj naya toket cutsuyañajj juti; nayanarac Moisesan leyipajj phokhasi.
18. Nayajj acapach oraken khanapätwa, jacañaparaquïtwa. Nayajj Alfa satätwa, Omega sataraquïtwa; kalltäwimpïtwa, tucuyäwimpïtwa.
19. Wil wartasin loktäwinac janiw nayarojj jucʼamp lokapquitätati. Jïsa, loktäwinacamamp naqhat loktäwinacamampjj janiw jucʼamp catokcäti, ucatjja loktäwinacamajja naqhat loktäwinacamajj janiw jucʼamp utjcaniti.
20. Pʼaquintat altʼir chuym nayarojj loktäwin loktapjjetäta. Qhitinacatejj pʼaquintat altʼir chuyman jutapquitan ucaruw ninamp Kollan Ajayump bautisä, cunjämatejj Laman jakenacajj nayar cutiquipstasin iyawsañap laycu ninamp Kollan Ajayump bautisatäcän uqhäma. Jupanacasti janiw ucjj yatipcaraquïnti.
21. Nayaw acapach oraker jut-ta, oraker cutsuyañataqui oraker juchat antutayañataqui.
22. Uqhämasti, qhitinacatejj juchat cutiquipstapqui, mä jiscʼalaljam nayar jutapcaraquitu ucanacaruw nayajj catokä, cunalaycutejj uqhäm jakenacat Diosan khapak marcapajj ut-tʼayatawa. Jïsa, uqhäm jakenacataquiw jacañajj catuyta jacañajjar wasitat catjjaruracta. Uqhämasti juchat cutiquipstapjjam, nayar jutapjjaraquim, take juma orak thiyanacanquirinaca, ucat khespiyatäpjjätawa.