1. Ucatsti tunca quimsakallkon mar tucuyanjjas uca lunthatanacan nuwasiri tamanacapajj nuwasiñatac waquichatänwa. Ucatsti jiscʼa kollunacata, jachʼa kollunacata, wasarata, pucaranacapata, jamasawjanacapat sarakaniñ mistuniñ kalltapjjäna. Aynach tokenquir orakenacampi alay tokenquir orakenacamp catuntañ kalltapjjäna. Take Nefi jakenacan jaytat orakenacapamp jaytanucut marcanacapamp catuntapjjaraquïna.

2. Ucampis uca Nefi jakenacan jaytat orakenacanjja, janiw lakʼonacajj utjcänti. Janiw lunthatanacatac mankʼañajj utjcänti, jan ucasti wasaranac utjäna.

3. Mankʼañan pisïtap laycusti, lunthatanacajj jan cunaniw jacañatac jicjjatasipjjäna, jan ucajja, wasaranac ucanacajj utjäna, cunalaycutejj Nefi jakenacajja, orakenacapar chʼusac jaytanucupjjäna; uywa tamanacarojj mä jachʼa tamaruquiw mayachthapipjjaraquïna. Take yänacap mayachthapipjjäna. Jupanacasti mayachthapitäpjjaraquïnwa.

4. Ucat lunthatanacajj janitejj Nefi jakenacamp nuwasir jutapcasapänjja, janiw cunjämats mankʼa catuñatac lunthatapcasapänti. Nefi jakenacasti mayar mayachthapisitäpjjänwa, waljanïpjjaraquïnwa. Jupanacataquiw juyranaca, caballonaca, vacanaca, take casta uywa tamanac imapjjäna, pakallk mar uqhäm jacañapataqui. Uca pakallk maran lunthatanacarojj uc-chʼpach orakjjat tucqhañ suyapjjäna. Uqhämaw tunca quimsakallkon marajj sarakäna.

5. Ucatsti tunca llätuncan maranjja, Gidianejja jupanacan Nefi jakenacamp nuwasir sarañapan waquisitap amuyäna, cunalaycutejj jupanacajj jan lunthatjasa, jan lunthatasa, jan jake jiwayasaw jan cunjämats jacañapatac utjcänti.

6. Janiraquiw yaran phawañatac orakjjan chʼeketatañ munapcänti, Nefi jakenacan jupanacar jiwarayir jutañapat ajjsaratap laycu. Ucatjja uca maran Gidianejj nuwasiri tamanacapar waytʼäna, jupanacan Nefi jakenacamp nuwasir maqhatañapataqui.

7. Ucatsti sojjtïr phajjsina, jupanacajj nuwasir maqhatapjjäna. Jïsa, nuwasir jutapcän ucürojja, jachʼa ajjsarcañänwa. Jupanacajj lunthatanacan lurataparjamaw wacʼantatäpjjäna. Ovej lipʼichimpiw wacʼantasipjjäna. Wilamp pintsutäpjjänwa; pʼekenacapasti kʼala mururatänwa. Pʼeke casconac apasipjjäna. Nuwasiñ isinacapat jupanacan wilamp pintsutätapata, Gidianin nuwasiri tamanacapajj jachʼa ajjsarcañänwa.

8. Ucatsti Nefi jakenacan nuwasiri tamanacapajja, Gidianin nuwasiri tamapar uñjasinjja, oraker winctʼasaw Dios Tatitupar jachʼat artʼapjjäna, jupan jupanacar qhuyapayañapataqui, timanacapan amparanacapat khespiyañapataqui.

9. Ucatsti Gidianin nuwasiri tamanacapajj uc uñjasinjja, jupanacan ajjsarcañätapat Nefi jakenacajj ajjsarasas wincupcaspas uqhäm amuyapjjäna. Ucat jupanacajj jachʼa arumpiw artʼapjjäna, cusisitanacap laycu.

10. Ucampis janiw cunjämatejj amuyasipcän uqhamäcänti. Nefi jakenacajj janiw jupanacat ajjsarapcänti, antisas Diosaparuw ajjsarapjjäna; jupan yanapap thakapjjaraquïna. Ucat Gidianin nuwasiri tamanacap jupanacamp nuwasir saripanjja, jupanacamp jiquisiñataquejj waquichatäpjjänwa. Jïsa, Tatitun chʼamapampiw jupanacampejj jiquintasipjjäna.

11. Nuwasïwisti uca sojjtïr phajjsin kalltäna. Nuwasïwejj jachʼanwa ajjsarcañaraquïnwa. Jïsa, ucqhan jiwarayäwejj jachʼänwa ajjsarcañaraquïnwa. Lehejj Jerusalenat mistcänsa ucapachat take jakenacap taypinjja janipiniw cunapachas uqhäm jachʼa jiwarayäwejj utjcänti.

12. Gidianin arsut ajjsarayäwinacapamp juräwinacapampis utjc-chïnjja, Nefi jakenacajj jupanacarojj atipjapjjänwa, jupanacan nayrakatapat cutekañapcama.

13. Ucatsti Gidgidonejj sänwa, nuwasiri tamanacapan jupanacar wasar thiyanac-cam alisnucuñapataqui, qhitinacatejj amparanacapar jaltʼcaspa take ucanacar jiwayañapataqui. Uqhämaw wasar thiyanac-cam jupanacar alisnucupjjäna jiwarayapjjaraquïna, Gidgidonin camächitap phokhañapcama.

14. Ucatsti, kamasamp saytʼasin nuwascän uca Gidiani jaltipan Nefi jakenacajj jupar arctapjjäna. Jupan wal nuwasisin karjatätap laycuw jupanacajj catjapjjäna jiwayapjjaraquïna. Uqhamän Gidiani lunthatan tucusïwipajja.

15. Ucatsti Nefi jakenacan nuwasiri tamanacapajj chʼamañchat chekaparuw cut-tanipjjäna. Ucatsti uca tunca llätuncan maraw sarakäna; lunthatanacasti janiw nuwasir jutapcänti. Pä tunc marans janiraquiw jutapcänti.

16. Pä tunc mayan maransti janiw nuwasir jutapcänti, antisas Nefi jakenacar muytiriw jutapjjäna, Nefi jakenacan mistuñanacapar jarcʼañataqui, cunalaycutejj jupanacatejj Nefi jakenacar orakenacapat jarcʼakapjjaspa, take toket muyuntapjjaspa, ankar mistuñat kʼal jarcʼakapjjaraquisp ucqhajja, Nefi jakenacan catuyasiñapcama, ucat munañaparjam chʼamaniptapcaspas uqhäm amuyasipjjäna.

17. Jupanacasti yakha sarayiriruw ajllipjjäna. Ucan sutipasti Zemnaria satänwa. Zemnariaw uca jarqʼir muytäwjj utjayäna.

18. Ucampis Nefi jakenacan walja imantat juyranacanïtap laycu, lunthatanacajj janipiniw Nefi jakenacan jan walir puriñapcam muytasajj suyapcasapänti. Ucat ucajj Nefi jakenacataquejj mä yanapänwa.

19. Cunalaycutejj lunthatanacan juyranacapajj pisïnwa. Jupanacanjja janiw cunas mankʼañapatac utjcänti, jan ucajja, wasaran catupcänsa uca aychaquiw utjäna.

20. Ucatsti wasaranjja, ajjsarcañ lakʼonacajj pistʼänwa, lunthatanacan mankʼatjam niy jiwarirjam tucuñapcama.

21. Nefi jakenacasti urus arumas sapa cuti mistusaw nuwasiri tamanacap contra nuwasirejj sarakapjjäna, jupanacarusti warankanacaru, tunca warankanacaruw sucʼtapjjaraquïna.

22. Ucat Zemnarian jakenacapajj lurañatac arustʼapcän ucjj armasiñ munapjjäna, uruns arumans jupanacjjar purcän uca jachʼa tucqhäw laycu.

23. Ucatsti Zemnariajja jakenacaparojj mayïnwa, jarqʼirïc uca muytatapat jupanacan mistuñapataqui, alay tokenquir oraken jaya thiyanacar sarapjjañapataqui.

24. Ucatsti Gidgidonejja, arustʼäwipjjat yatisina, mankʼan pisïtapat karjatäpjjatap yatisina, jupanac taypin jachʼa jiwarayäwjjat yatisinaracjja, jupajj arumjaruw ejercitonacap qhitäna. Jupanacan jaltañapar jarcʼakasa, jaltañ thaquipansti nuwasiri tamanacap uchäna.

25. Arumanjja jupanacajj uc lurapjjäna, lunthatanacan nayrakataparuw jalaquipapjjäna. Ucatsti khepärmanthejj lunthatanacajj sarjjañ kalltasajja, nayrakatapana, khepapana, Nefi jake nuwasiri tamanacapan jarcʼantatäpjjänwa.

26. Aynachanquir lunthatanacan jaltañapajj jarcʼakataraquïnwa. Take uca luräwinacajja Gidgidonin sarayäwiparjam luratänwa.

27. Walja warankanacaw jupanac pachpajj Nefi jakenacamp catuntayasipjjäna. Jiltʼirinacasti jiwarayatäpjjänwa.

28. Jupanacan Zemnaria sarayiripasti catuntatänwa, mä kokan jaychcatataraquïnwa. Jïsa, koka alayan jiwañapcam jaychcatatänwa. Ucatjja, jupan jiwañapcam jupar jaychcatasinjja, jupanacajj kokaruw qhuchhunucupjjäna oraker tincuñapcama. Ucatsti jachʼat artʼapjjaraquïna, aqhäm sasa:

29. Asquïñansa, kollan chuymanïñansa Tatitojj jakenacapar impan, jupanacan lakʼar qhuchhunucuñapataqui take qhitinacatejj chʼamampi jamas arustʼäwinacamp jupanacar jiwayañ chʼamtʼapqui ucanacaru, cunjämatejj aca jakejj lakʼar liwinucutäqui uqhäma.

30. Ucatsti sint cusisipjjäna, wastat mä arutjamac artʼapjjaraquïna, aqhäm sasa: Abrahanan Diosapa, Isaacan Diosapa, Jacobon Diosapajja, asqui cancañan aca jakenacar impan, jupanacatejj imatäñapatac Diosapan sutipar artʼasipcan ucqhajja.

31. Ucatsti takeniw mayjamac kʼochutatapjjäna. Cuntejj Diosapajj jupanacar imasin jupanacatac lurcäna, timanacapan amparapar jan jalantañapataqui, ucat jupar yupaychapjjaraquïna.

32. Jïsa, jupanacajj aqhäm sasaw artʼapjjäna: Hosanna Take Cunat sipan Alay jachʼa Diosaru. Take Chʼaman Dios Tatitu, Take Cunat sipan Alay jachʼa Diosan sutipajj bendicitäpan.

33. Chuymanacapansti cusisiñajj jachʼänwa, cusisiñatsti wal jachapjjäna, Diosan sinti sumätap laycu, timanacapan amparanacapat jupanacar khespiyatap laycu. Jupanacasti yatipjjänwa, jupanacan juchanacat cutiquipstatapata. Llampʼu chuymanïtap laycuw mä jan tucusir tucqhäwit khespiyatäpjjäna.