Jesucristojj Nefin jakenacaparojj jupa pachpaw uñachayasi, uca walja jakenacajj Jilarquir oraken mayachthapitäpcän ucapachajja. Jupasti jupanacarojj chʼamampiw yanapäna. Uqhämat jupanacarojj jupa pachpajj uñachayasïna.
11ri jaljat 26ri jaljan tucuyäwipcama.
11ri Jalja
Wiñay Awquejja Cristot yatiyi – Jiwatat jactat Cristow uñsti – Walja jakenacaruw chhojjrinacap llamctʼayasi – Bautisañan cunjamätapat yatiyatawa – Camächit churi jan chʼajjwäwinacan utjañapataqui – Cristow karkajja.
1. Ucatsti Nefin jakenacapat walja jakenacaw mayachthapisipjjäna, Jilarquir orakenquir kollan uta muytatanacanjja. Jupanac puraw muspharasipjjäna, lupʼisipjjaraquïna, cunatejj lurascän uca jachʼa muspharcañ turcäwjja, jupanac puraw uñachayasipjjaraquïna.
2. Qhitin jiwäwipjjat-tejj uca unañchajj churatäcän uca Jesucristjjat parlasipjjaraquïna.
3. Ucatsti uqhäm jupanac pur parlasina, mä ar istʼapjjäna alajjpachats jutcaspajj uqhäma. Cawquïr artejj istʼapcän uca arjja janiw amuyapcänti, ucat nayranacapampiw take toker uñatatapjjaraquïna. Arusti janiw khoru arücänti, janiraquiw jachʼa arücänsa. Ucampis llampʼu arüc-chïnsa, uca arur istʼapcän ucanacan chuymanacap mankhacamaw arojj purïna, kʼal jupanacan janchinacapar qhathatiyañapcama. Jïsa, quipca chuymacamaw purïna; chuymanacaparuw naqhayaraquïna.
4. Ucatsti wasitat jupanacajj uca arur istʼapjjäna, janiraquiw ucjj amuyapcänti.
5. Ucatsti quimsïr cutiw arur istʼapjjäna, ucat jinchunacap jistʼarapjjäna, uc istʼañataqui. Arojj cawcsat-tejj jutcäns ucsarojja, nayranacapampiw uñtapjjaraquïna. Alajjpach tokeruw uñchʼuquipjjäna, cawqhat-tejj arojj jutcän ucsaru.
6. Ucatsti, quimsïr cutin uca arur istʼasajj uca ar amuyapjjäna. Arusti jupanacarojj sänwa:
7. Munat Yokajjar uñjapjjam. Jupat wal cusista. Jupa tok sutijjarojj khapakaptayta. Jupar istʼapjjam.
8. Ucatsti amuyasinjja, nayranacap wastat alajjpach toker aptapjjäna. Ucatsti mä Jakeruw alajjpachat sarakanir uñjapjjäna. Jupasti mä jankʼo isimp isthapitänwa. Sarakanisinjja jupanac taypin saytʼäna. Take uca walja jakenacasti nayranacapampiw jupar uñchʼuquipjjäna; lacanacap maynit maynir jistʼarañ ajjsarapjjänwa. Qhititejj jupanacar uñstcän ucajja, mä alajjpach qhitäcaspas uqhäm jupanacajj amuyasipjjäna, ucat cuntejj ucajj sañ muncäns ucjj janiw yatipcänti.
9. Ucatsti amparap loktasin jupajj jakenacar aqhäm sas arsüna:
10. Nayajj Jesucristötwa; qhitjjat-tejj Diosan arjirinacajj oraker jutaniw –sas khanañchapcän ucätwa.
11. Jïsa, nayajj acapach oraken khanapätwa, jacañaparaquïtwa. Awquejj churquit uca cʼallcʼu kerut umta. Acapach oraken juchanacap nayjjar catjjarusaw Awquir khapakaptayta. Uc lurasinjja, take cunanac kalltäwitpach Awquin munañaparjam lurta.
12. Ucatsti Jesusajj uca arunac arsquipan, take uca walja jakenacajj oraker liwirtapjjäna, cunalaycutejj Criston alajjpachar maqhatatap khepatjja, jupa pachpan uñachayasiñapan jupanac pur arjatapjjat jupanacajj amtasipjjäna.
13. Ucapachajj Tatitojj aqhäm sasaw jupanacarojj arsüna:
14. Sartapjjam, nayar jutapjjam, amparamamp chʼillajj mankhar lokantañanacamataqui, uqhämaraqui amparajjan cayujjan clavo chhojjrinac llamctʼañanacamataqui. Ucjj lurapjjam yatipjjañamataqui, nayan Israelan Diosapätajjata, take acapach oraken Diosapätajjatsa, acapach oraken juchanacap laycu jiwayatätajjatsa.
15. Ucatsti uca walja jakenacaw nayrakatar jacʼachasisin amparanacapamp chʼillap mankhar lokantapjjäna, amparapan cayupan clavo chhojjrinac llamctʼapjjaraquïna. Uqhämaw ucjj lurapjjäna, maynit maynit nayrakatar sarasa, sapakat maynin ucar sarañapcama, sapakat maynin nayrapamp uñjañapcama, amparapamp llamctʼañapcama, qhitit-tejj Diosan arjirinacajj jutaniw –sas kellkapcän ucan jupan ucätapjjat chekpach yatiñapcama, ucjjat ircatañapcama.
16. Ucatsti take jupanacan jacʼachasipjjatap khepatjja, jupanac pachpa uñjasinjja, mayjamaquiw jupanacajj artʼapjjäna, sasina:
17. Hosanna! Take Cunat Alaya Diosapan sutipajj jachʼar aptatäpan! Ucatsti, Jesusan cayunacapar liwirtasin jupanacajj yupaychapjjäna.
18. Ucatsti jupajj Nefiruw jawsäna. (Nefisti uca walja jakenac taypincänwa). Juparusti nayrakatar jutañapataquiw mayïna.
19. Sartasinsti Nefejj juparuw jacʼachasïna. Ucat Tatitun nayrakatapan quilltʼasïna cayupar jampʼatiraquïna.
20. Tatitusti jupan saytʼañapataquiw arsüna. Jupasti sartasin jupan nayrakatapan saytʼäna.
21. Ucat Tatitojj juparojj säna: Jumaruw chʼam chursma nayajj wasitat alajjpachar maqhatcä ucapachatjja, aca jakenacar bautisañamataqui.
22. Ucatsti Tatitojj yakhepanacaruw jawsaraquïna, jupanacar uqhäm saraquïna. Jupanacarojj chʼam churaraquïna bautisañataqui. Ucat jupanacarojj säna: Aqhäm bautisapjjäta; janiraquiw jumanac pur chʼajjwäwinacajj utjcaniti.
23. Chekpacha chekpachaw jumanacar sapjjsma: Qhititejj arunacam laycojj juchanacapat cutiquipstcani, nayan sutijj-jjar bautisasiñ muncaraquin ucanacarojja, aqhäm bautisapjjäta: Umaruw mantapjjäta; uca uma taypin saytʼapjjaraquïta; ucatsti nayan sutijjaruw jupanacar bautisapjjäta.
24. Jichhasti, aca arunac jumanacajj sapjjäta. Sutipat jupanacar sasaw aqhäm sapjjäta:
25. Jesucriston nayar chʼam churipana, jumar bautissma; Awquimpina, Yokampina, Kollan Ajayumpin sutipjjaru. Uqhamäpan.
26. Ucapachaw uma mankhar kʼal chhaktayapjjäta, wasitat umat mistupjjaraquïta.
27. Uqhäm lurasaw jumanacajj sutijj-jjar bautisapjjäta, cunalaycutejj chekpachaw jumanacar sapjjsma: Awquimpi, Yokampi, Kollan Ajayumpejj mayaquiwa. Nayasti Awquinctwa; Awquisti nayancaraquiwa. Awquimp nayampejj mayaquïpjjtwa.
28. Cunjämatejj camächit churapcsma uqhämarjamaw bautisapjjäta. Cunjämatejj jichhacam utjcän ucanacjam chʼajjwäwinacajj janiraquiw jumanac taypin utjcaniti. Janiraquiw yatichäwijjan cunanacapjjat chʼajjwäwinacajj jumanac taypin utjcaraquiniti, cunjämatejj jichhacam utjcäns ucanacjama.
29. Cunalaycutejja, chekpach chekpachaw jumanacar sapjjsma: Qhititejj chʼajjwañ cancañanïqui ucajja, janiw nayancquiti, antisas chʼajjwañan awquipäqui uca supayanquiwa. Jupaw jakenacan chuymanacapar tircuyi, jupanacan purapat kʼapisiñamp chʼajjwañanacapataqui.
30. Amuyapjjam: Jakenacan chuymanacapar jupanac pur kʼapisiñamp tircuyañajj janiw nayan yatichäwijjäquiti. Jan ucasti ucanacar jakonucuñajj nayan yatichäwijjawa.
31. Chekpacha chekpachaw jumanacar sapjjsma: Yatichäwijj jumanacar yatiyapjjäma.
32. Acaw yatichäwijjajja. Cawquïr yatichäwtejj Awquejj nayar churquitu uca yatichäwiraquiw acajja. Nayajj Awquit ircat-ta; Awquisti nayat ircataraqui; Kollan Ajayusti Awquimpit nayampit ircataraqui. Nayajj ircataractwa, Awquin take jakenacar take chekan camächit churatapata, jupanacan juchat cutiquipstañapataqui nayar iyawsañapataquiraqui.
33. Qhititejj nayar iyawsquitani bautisascaraquin ucajja, khespiyatäniwa; ucanacaw Diosan kollan marcap tutjam catokapcan ucanacajja.
34. Qhititejj jan nayar iyawsquitani, janirac bautisascaraquin ucajja, juchañchatäniwa.
35. Chekpacha chekpachaw jumanacar sapjjsma: Acajj yatichäwijjawa. Nayajj ucjjat Awquin ircat-ta. Qhititejj nayar iyawsquitu ucajja, Awquirojj iyawsaraquiwa. Awquisti juparojj nayat ircatani, cunalaycutejj juparojj ninamp Kollan Ajayumpiw sartʼani.
36. Uqhämaw Awquejj nayat ircatani. Kollan Ajayusti Awquimpit nayampit jupar ircatani, cunalaycutejj Awquimp nayamp Kollan Ajayumpejj mayaquïpjjtwa.
37. Wasitat jumanacar sapjjsma: Juchat cutiquipstapjjañamawa; mä jiscʼalaljam tucupjjañamawa, nayan sutijj-jjar bautisasipjjañamawa, jan ucajja, janiw cunjämats ucanacjj catokapcätati.
38. Wasitat jumanacar sapjjsma: Juchat cutiquipstapjjañamawa, nayan sutijj-jjar bautisasipjjañamawa, mä jiscʼalaljam tucupjjañamaraquiwa, jan ucasti, janiw cunjämats Diosan khapak marcap tutjam catokapcätati.
39. Chekpach chekpachaw jumanacar sapjjsma: Ucaw yatichäwijjajja. Qhitinacatejj ucjjar ut-tʼayapqui ucajja, karkajj-jjaruw ut-tʼayapjje. Mankhapachan puncunacapasti janiw jupanacarojj aticaniti.
40. Qhitinacatejj ucat jucʼampsa jan ucajj ucat pis-sa arnakapjjanejja, nayan yatichäwijjar uñtat ucanac ut-tʼayapcaraquinejja, ucanacajj ñankhat jutapjje, janiraquiw karkajj-jjar ut-tʼayatäpquiti. Antisas jupanacajj chʼalla takanjjan ut-tʼayapjje. Mankhapachan puncunacapasti jistʼarataw suyasqui llumirir umanacajj purcani, thayanacajj chʼamamp phustʼcani ucapach ucanacar catokañataqui.
41. Uqhämasti, aca jakenac taypir sarapjjam. Cawquïr arunactejj arsctsa uca arunac arnakapjjam acapach oraken thiyanacapcama.