1. Ucatsti take uca orakenquir jakenacajj uca säwinac istʼapjjäna, ucjjat ircatapjjaraquïna. Uca säwinac khepatsti, chʼüjtañaw uca oraken walja horanacatac utjäna.

2. Cunalaycutejj jakenacan muspharañapajj sinti jachʼänwa, jupanacan jiwat familianacapat jan jucʼamp jaqhusiñapcama aykoñapcamasa. Ucat chʼüjtañajj uc-chʼpach oraken walja horanacaw utjäna.

3. Ucatsti mä aruw wasitat jakenacar puri. Take jakenacaraquiw uca arjj istʼapjjäna, ucjjat ircatapjjaraquïna. Arusti aqhäm sänwa.

4. Oh, uca jachʼa tincut marcanacanquir jakenaca! Jacobot sarakerinacäpctas ucanaca, jïsa, Israelan utapanquirinaca, kawkha cutis juchat antutayañataquejj nayajj jumanacar anthapipjjsma, mankʼayapjjaracsma, cunjämatejj wallpajj chhiwchhinacapar chhekhap taypir apthapqui uqhäma.

5. Uqhämaraqui, kawkha cutis jumanacar anthapiñ munapjjsma, cunjämatejj wallpajj chhiwchhinacapar chhekhap taypin apthapqui uqhäma, jïsa, juma Israelan utapanquir tincut jakenacaru; jïsa, juma Israelan utapanquir jakenaca, Jerusalenanquirinaca, uqhämaraqui tincupctas ucanaca, jïsa, kawkha cutis jumanacar apthapiñ munapjjsma, wallpajj chhiwchhinacapar apthapqui uqhäma. Ucampis jumanacajj janiw munapctati.

6. Jumanaca Israelan utapa, qhitinacarutejj jan tucqhapcsma ucanaca, kawkha cutis jumanacar apthapipjjäma, wallpajj chhiwchhinacapar chhekhap taypin apthapqui uqhäma, jumanacatejj juchat cutiquipstapjjätajja, take chuymamp nayar jutapcätajj ucqhajja.

7. Ucampis, Israelan utapa, janitejj uc lurapcätajja, utjapctas uca utanacamajj chʼusa jaytanucutäniwa, awquinacamamp arsut arsüwejj phokhascan ucapachcamajja.

8. Ucatsti jakenacajj uca arunac istʼasinjja familianacapan masinacapan chhaktatapat wasitat jachañ aykoñ kalltapjjäna.

9. Uqhämaw uca quimsa urojj sarakäna. Uca alwataw uca chʼamacajj orakjjat apjtjjäna. Orakesti janiw jucʼamp qhathatcänti. Karkanacasti janiw jucʼamp jaljtcänti, ajjsarcañ aykoñanacajj janiw jucʼamp utjcaraquïnti. Take uca khojjokerinacas janiraquiw jucʼamp utjcaraquïnti.

10. Orakesti wastat mayar mayachthapisïna, sum saytʼañapcama. Jan jiwayat jakenacan llaquisiñapamp jachañapamp aykoñapampejj tucusïnwa. Llaquisiñapajj cusisiñaruw tucüna. Jaqhusiñapajj jachʼar aptañaru, Tatit Jesucristo Cutsuyiripar yuspagarañaruw tucuraquïna.

11. Ucqhacamajja, Diosan arjirinacapan parlatäqui uca kellkatanacajj phokhasïnwa.

12. Jan jiwayatäpcän uca jakenacajja, marcat jucʼamp asqui jakenacäpjjänwa. Arjirinacar kalamp jan cʼupjas catokapcäna, kollananacan wilap jan wartapcän ucanacaw jan jiwayatäpcänti.

13. Jupanacajj janiw jiwayatäpcänti; orak mankhar utjarant-tañampit orakemp alljjatatäñampit imatäpjjänwa. Janiw lamar pʼiyanacan ajjscatapcänti, janiraquiw ninamp naqhantatäpcänti; janiw cunanacas jupanacjjar llokjjatcänti. Janiw jupanacajj tutucan apatäpcänti. Janiraquiw chʼamac jiwkʼe urpojja jupanacjjar atipjcänti.

14. Jichhasti, qhititejj leequi ucajja, amuypan. Qhititejj kellkatanacanïqui ucajja, ucanac uñjjatañapatac thakpan aqhäm amuyañapataqui: Uca ninampi, jiwkʼempi, ajjsarcañ thaya thaytañanacampi, tutucanacampi, oraken jupanacar mankʼantañatac jistʼartäwipamp jiwäwinacana, tucqhäwinacansa, take ucanacan phokhasiñapajj walja kollan arjirinacan jutir urunacat yatïwinacaparjamawa.

15. Jïsa, nayajj jumanacar sapjjsmawa, Cristojj jutcän ucapachajj waljaniw ucanacjjat ircatapjjäna, ucanacjjat ircatatap laycusti jiwayatäpjjaraquïnwa.

16. Jïsa, Zenos arjirijj ucanacjjat ircatäna. Uqhämaraqui Zenocajj ucanacjjat arsuraquïna, cunalaycutejj jupanacajja, nanacjjat ircatapjjäna. Nanacasti jathapat jiltʼirinacäpjjtwa.

17. Jïsa, Jacob awquisajj Josean jathapat mä jiltʼirinacjjat ircataraquïna. Janit nanacast Josean jathapat jiltʼirinacäpcta? Uca nanacjjat ircatir cunanacajj janit Lehi awquijjan Jerusalenat apsut bronce tʼalpha lekʼetanacjjar kellkatäqui?

18. Ucatsti uñachayämawa, quimsa tunc pusin mar tucusïwinjja, take jan jiwat Nefi jakenacjjaru, uqhämaraqui jan jiwat Laman jake satäpcän ucanacjjarojja, jachʼa qhuyapayäwinacaw uñachayatäna, pʼekenacapjjarusti, jachʼa qhuyapayäwinacaw wartataraquïna. Ucatjja, Criston alajjpachar maqhatatapat jucʼa pacharojj chekpachaw jupa pachpajj jupanacar uñachayasïna.

19. Janchip jupanacar uñachayäna, jupanacar chʼamampiw yanaparaquïna. Uca jupan chʼamamp jupanacar yanapatapjjatjja, khepa tokeruw kellkatäni. Uqhämasti, cuntejj siscäyät uca sañampejj tucuytwa.