1. Jichhasti sapjjsmawa: Cunapachatejj Tatitojj yatiñ cancañapan aca arunacan gentilenacar waquisit pachar puriñap munani, cunjämtejj jupajj arscän uqhämarjamajja, ucapachaw amuyapjjäta, cuntejj Awquejj Israelan wawanacapamp arusjcän ucan phokhasiñap kalltatapa. Uca arusjäwisti, tuti orakepar wasitat cut-tjjañawa.

2. Ucatsti yatipjjätawa, Tatitun arunacap parlir kollan arjirinacan parlatapajj takpach phokhascan uca. Ucatsti, janiw jumanacan sañamajj utjcaniti: Tatitojj janiw jancʼas jutquiti, Israelan wawanacaparojja –sasa.

3. Janiraquiw jumanacajj chuymanacaman amuyapjjañamäquiti, cuna arunacatejj parlasqui ucan inamay parlasitapa. Tatitojj cuna arusjäwtejj Israelan utapanquir jakenacapampejj lurqui ucat amtasini.

4. Cunapachatejj jumanacajj aca arunacan jumanac taypin uñstatap uñjapjjätajja, janiw Tatitun luratanacap jucʼampitac jiscʼachañjj muncjjapjjätati, cunalaycutejj chekapar uñjañ espadapajj cupëjjapanquiwa. Uca uruntejj luräwinacap jiscʼachapjjätajja, jupajj jancʼaquiw uca espadan jumanacjjar puriñap munani.

5. Ay cawquïr jaketejj Tatitun luratanacap jiscʼachqui uca jaketa! Jïsa, ay, cawquïritejj Cristompir luratanacapampir jan iyawsqui uca jaketa!

6. Ay, qhititejj Tatitun amuyayäwinacapar jan iyawsqui ucata! Qhititejj sisqui: Tatitojj janiw amuyayäwi tokejj lurcjjeti, churäwinac tokesa, lajjranac parläwi tokesa, cʼumaraptayäw tokesa, Kollan Ajayun chʼamapamp lurañ toke utjatapar jan iyawsqui uca jaketa!

7. Ay, qhititejj uca urun jupa quicpan asquipatac siscani: Jesucristojj janiw cuna muspharcañ luräws lurcaspati – sir jaketa! Uqhäm parlir jakejja, chhaktañan wawaparuw tucuni, Criston aruparjamasti, janiw qhuyapayäwejj utjquiti.

8. Uqhämasti, janiw judionacarojj jucʼamp tʼakhesiyapjjañamäquiti, jiscʼachapjjañamäquisa. Janiraquiw jupanacats sawcasipjjañamäquiti, Israelan utapat jiltʼirïqui ucanacat cawquïritsa; cunalaycutejj Tatitojj jupanacamp arusjcän ucatjja, amtasisquiwa, ucatsti cunjämtejj arsqui uc jupanac laycojj lurani.

9. Uqhämasti, janiw amuyapjjañamäquiti, Tatitun cupi amparap catusin chʼeka amparar cutiquipstayañjja, cuna arusjäwtejj Israelan utapamp lurqui uc phokhasiñapcam taripäwip jan lurañapataquejja.