1. Ucatsti Jesusajj yatekerinacaparuw arsüna, tʼantʼamp vinomp jupan ucar apaniñapataqui.

2. Ucatsti, tʼantʼamp vinomp aptir sarapquipan jupajj walja jakenacarojj oraker kontʼapjjañapataquiw mayïna.

3. Yatekerinacapasti tʼantʼamp vinomp aptʼataw cut-tanipjjäna. Jupasti tʼantʼa catusajja, tʼantʼa pachinokäna, yakhacharaquïnwa. Ucat yatekerinacapar ucjj churäna, ucatsti mankʼañapataquiw camächit churaraquïna.

4. Jupanacan mankʼatap sistʼasitap khepatsti, walja jakenacar uc laquipjjañapataquiw mayïna.

5. Walja jakenacan mankʼapjjatapata, sistʼasipjjatap khepatsti, yatekerinacarojj jupajj siwa: Jumanac taypinjja mayniw chʼamamp ut-tʼayatäni. Juparuw chʼam churä tʼantʼa pachinokañapataqui, yakhachañapataqui, iyawsir tamajjanquir jakenacar laquiñapataquiraqui, take qhitinacatejj sutijj-jjar iyawsapcani, bautisasipcaraquin take ucanacaru.

6. Cunjämtejj nayajj lurcta, tʼantʼa pachinokctsa, yakhachctsa jumanacar churapcaracsma uqhäm jumanacajj jichhürut ucsarojj lurañ amtapjjäta.

7. Ucsti lurapjjätawa, jumanacar uñachayapcsma uca janchijjat amtasiñanacamataqui. Uca lurañajja, Awquir mä ircatäwïniwa, jumanacan wiñay nayat amtasipjjatamata. Jumanacatejj wiñay amtasipjjetätajja, Ajayujjajj jumanacampiw wiñay utjapunini.

8. Uca arunac arsusinsti, yatekerinacaparuw camächit churäna, vinon keru asjjarusin umtʼapjjañapataqui, ucatsti walja jakenacar churapjjañapataqui, jupanacan umtʼapjjañapataquiraqui.

9. Ucatsti uqhäm jupanacajj lurapjjäna; ucat umtʼasajj sistʼasipjjänwa. Waltʼat jakenacaruw laquipjjaraquïna; jupanacasti umtʼasajj sistʼasipjjaraquïnwa.

10. Yatekerinacan uc luratap khepatsti, Jesusajj jupanacarojj siwa: Cuntejj lurapcta uca laycuw qhuyapayatäpjjta, cunalaycutejj ucajj camächitanacajjar phokhañawa; lurañamatac camächit churapcsma uc lurañ munatamat ucajj Awquir ircataraqui.

11. Qhitinacatejj juchat cutiquipstapqui, nayan sutijj-jjar bautisatäpcaraqui ucanacataquiw ucjja sapa cut lurapjjäta. Nayan jumanac laycu wartat wilajjat amtasiñanacamataquiw ucjj lurapjjäta, nayat wiñay amtasitamat Awquir ircatañamataqui. Jumanacatejj wiñay amtasipjjetätajja, Ajayujjajj jumanacampiw utjapunini.

12. Ucanac lurapjjañamataquiw camächit churapjjsma. Jumanacatejj ucanac wiñay lurapjjätajja qhuyapayatäpjjätawa, nayan karkajj-jjar ut-tʼayatäpjjatam laycu.

13. Ucampis qhitinacatejj jumanacat ucanacat jucʼampsa, jan ucajj pis-sa lurapjjan ucanacajja, janiw karkajj-jjar ut-tʼayatäpquiti, antisas chʼalla takanjjar ut-tʼayatäpjjewa. Ucatsti cunapachatejj jallojj purintani, ucat llumirir umanacajj mantani, thayanacasti phustʼanipcani, ucanacjjar tinc-catcaraquin ucqhajja, ucanacajj tincuniwa. Mankhapachan puncunacapasti jupanacar catokañataquejj niy jistʼaratäjjewa.

14. Uqhämasti, Awquejj jumanacar churañajjatac camächit churquitus uca camächitanacajjarutejj phokhapjjätajja, qhuyapayatäpjjätawa.

15. Chekpach chekpachaw jumanacar sapjjsma: Uñjapjjañamawa, sapa cutiw Diosat mayisipjjañama, supayan jan jumanacar yantʼañapataqui, catuntasin jumanacar jan irpsuñapataqui.

16. Cunjämatejj nayajj jumanac taypin Diosat mayisctjja, uqhämaraquiw jumanacajj iyawsir tamajjan mayisipjjäta, nayan juchat cutiquipstir, sutijj-jjar bautisat jakenacajj taypinjja. Nayajj khanätwa; lurasaw jumanacar uñachayapjjsma cunjäm lurañsa.

17. Ucatsti uca arunac yatekerinacapar arscän ucapachajja, Jesusajj wastat walja jakenacar uñcatasajj jupanacar säna:

18. Chekpach chekpachaw sapjjsma: Sapa cut uñchʼuquipjjañamajj waquisipuniwa, ucatsti Diosat mayisipjjañamapuni yantʼäwir jan mantapjjañamataqui, cunalaycutejj Satanasajj jumanacarojj catuntasiñ muni, jipjam jumanacar susuñataqui.

19. Uqhämasti, nayan sutijj-jjaruw Awquit sapa cut mayisipjjañama.

20. Take asqui cunanacataquitejj nayan sutijj-jjar Awquit mayisipjjätajja, catokañamar iyawsasa, asquïch ucajja, ucanacajj jumanacar churatäniwa.

21. Familianacamanjja nayan sutijj-jjarupun Awquit mayisipjjam, warminacaman wawanacaman qhuyapayatäñapataqui.

22. Jïsa, sapa cutiw tantachasipjjäta. Cunapachatejj tantachasipcät ucapachajja, janiw qhiti jakerus jumanac taypir jutañap jarcʼapjjätati, antisas jupanacan jumanacar jutapjjañap munapjjam, janirac jupanacarojj jarcʼapjjamti.

23. Jan ucasti, jupanacataquiw mayipjjäta, janiw jupanacar alis-supjjätati. Jupanacatejj jumanacar sapa cut jutapjjanejja, nayan sutijj-jjaruw Awquit jupanacatac mayipjjäta.

24. Uqhämasti, khanam aptapjjam oraker khantañapataqui. Jïsa, cawquïr khantejj aptapcätasa uca khanajj nayätwa; cuntejj nayar lurir uñjapquistajja, ucajj khanawa. Nayan Awquit mayisitajjarojj uñjapjjtawa; takeniw ucjjat ircatapjjaracta.

25. Jumanacatjja, janiw qhitirus saram siscti. Ucsti yatipjjtawa. Antisas jumanacarojj camächit churapjjsma, nayar jutapjjañamataqui, llamctʼañanacamataqui uñjañanacamataqui. Uqhämaw jumanacajj orakenquirinacataquejj lurapjjäta. Qhititejj jan aca camächit phokqui ucajja, jupa pachpaw yantʼäwimp irpayasisqui.

26. Uca arunac arsusinsti, Jesusajj jupan ajllit yatekerinacaruw wastat uñcatäna, ucat jupanacar saraquïna:

27. Chekpach chekapachaw sapjjsma: Yakha camächit churapjjäma. Ucat Awquir sarañajjawa, nayar churquitu uca yakha camächitanac phokhañajjataqui.

28. Jichhasti, churapcsma uca camächitajj aqhämawa: Cunapachatejj janchijjamp wilajjamp laquipcätas ucapachajja, janiw qhitirus antutapjjätati, jan kʼomätap yatisin ucat mankʼañapataqui, umañapataqui.

29. Cunalaycutejja, qhititejj jan kʼomäcasin janchijj mankʼqui wilajj umcarac ucajja, jupa pachpataquiw juchañchäw mankʼe umaraqui. Ucatjja, nayan janchijjat wilajjat mankʼañatac umañatac mä jaken jan kʼomätap yatipcät ucqhajja, janiw mankʼañap umañap munapjjätati.

30. Ucampisa, jumanac taypit janiw juparojj alis-supjjätati, antisas juparojj yanapapjjätawa, jupataquiw Awquit mayipjjäta nayan sutijjaru. Ucat jupatejj juchat cutiquipstanejja, ucat sutijj-jjar bautisascanejja, juparuw catokapjjäta, nayan janchijj wilajj jupar churapjjaraquïta.

31. Ucampis janitejj jupajj juchat cutiquipstcanejja, janiw nayan jakenacajjamp jaqhutäcaniti, jakenacajjar jan tucqhañapataqui, cunalaycutejj nayajja, ovejanacajjar uñtʼtwa; ucanacajj jaqhutaraquiwa.

32. Ucampis janiw juparojj sinagoganacamata, yupaychäwi utanacamat alis-supjjätati; ucampis uqhäm jakenacarojj yanapasipcaquïtawa, cunalaycutejj inas jupanacajj juchat cutiquipstapjjchini, take chuymamp inas nayar jutapjjchitani; ucat nayajj jupanacarojj cʼumaraptayäwa; jumanaquïpan jupanacajj khespiyatäpjjaraquini, ucjjat janiw yatipctati.

33. Ucalaycu, jan juchañchatäñamataqui, churapcsmas uca camächitanacajj phokhapjjam, cunalaycutejja, ay qhitirutejj Awquejj juchañchqui ucata!

34. Jumanac taypin chʼajjwäwinacan utjatap laycuw uca camächitanac churapjjsma. Janitejj jumanac purajj chʼajjwasipcätajja, qhuyapayatäpjjtawa.

35. Jichhasti, jumanacatac Awquir sarañajjajj waquisiwa. Ucat Awquir saräjja.

36. Ucatsti uca arsüwinac arsutapatjja, ajllit yatekerinacaruw amparapampejj maynit maynit llamctʼäna, takenir llamctʼañapcama. Jupanacar llamctʼasasti jupanacarojj parlaraquïnwa.

37. Arscän uca arunacjja, walja jakenacaw jan istʼapcänti, ucat janiw jupanacajj ucjjat ircatapcänti. Ucampis yatekerinacan Kollan Ajayu churañapatac chʼam jupanacar churatapjjat ircatapjjäna. Acat kheparojja uca ircatatan chekätapjjat jumanacar uñachayapjjäma.

38. Cunapachatejj Jesusajj take ucanacar llamctʼcän ucapachaw mä kenayajj walja jakenacjjar purïna, jupanacan Jesusar jan uñjapjjañapataqui.

39. Jupanacajj uqhäm urpjjatatäpcän ucapachajja, jupajj jupanac taypit mistusaw alajjpachar maqhatjjäna. Yatekerinacasti jupan wastat alajjpachar maqhatatap uñjapjjäna, ucjjat ircatapjjaraquïna.