1. Parlapcänsa take uca kollan arjirinacan arunacaparojja, janiw jucʼas pächasir ni mayni jakes utjcänti take Nefi jakenac taypinjja. Uca arunacan phokhasiñapan waquisitap jupanacajj yatipjjäna.

2. Arjirinacan arunacaparjam walja churat unañchanac laycuw jupanacajj Criston niy jutatapan waquisitap yatipjjaraquïna. Niy purincänsa ucanac laycusti, parlatäcän ucarjam take cunanacan puriniñapan waquisitapjjat yatipjjaraquïna.

3. Uca laycuw jupanacajja, take juchanacapa, ajjtcañ luräwinacapa, kʼañusiñ wachokäwinacap ñankhasïwinacap jaytanucupjjäna. Diosarusti take chʼamampiw uruns arumans yupaychapjjaraquïna.

4. Ucatsti, jan jiwayatäc uca lunthatanacarusti catuntapjjänwa, janiraquiw qhitirus jaltayapcänti. Uca lunthatanacar catuntasinsti, carcelaruw jakontapjjäna. Ucat Diosan arupat yatichayapjjaraquïna. Take qhitinacatejj juchanacapat cutiquipstapcäna, jan jucʼamp jak jiwayañataqui arsüw lurapcaraquïna take ucanacajja, antutatäpjjänwa.

5. Ucampis take qhitinacatejj jan mä arsüwir mantapcäna, uca jamasat jak jiwayäwinac chuymanacapan catjjäsisipcaquïna, jïsa, take qhitinacatejj jilanacap contra ñankha arusisquir jicjjatatäpcäna, take ucanacajj leyirjamaw juchañchatäpjjänwa, mutuyatäpjjaraquïnwa.

6. Uqhämaw take uca ñankha, jamas ajjtcañ arustʼäwinaca, cunanacat-tejj sinti ñankha cancañajj utjcäna, sinti jiwayäwinacajj utjcaraquïna uca arustʼäwinac jupanacajj kʼal tucqhapjjäna.

7. Uqhämaw pä tunc payan marajj sarakäna, uqhämaraqui pä tunc quimsan marajja, pä tunc pusini, pä tunc pheskani marampejja. Uqhämaw pä tunc pheskan marajj sarakjjaraquïna.

8. Yakhepanacan nayranacapataquejj jachʼäcaspasa, muspharcañäcaspas uqhäm walja cunanacaw lurasiraquïna. Ucampis take ucanacajj janiw acaru kellkañjamäquiti. Jïsa, take uqhäm walja jakenac taypinjja cunanacatejj pä tunc pheskan maran luratäcän ucanacatjja, janiw patacat mayas acaru kellkañjamäquiti.

9. Ucampis kellkatanacajj utjiwa; ucanacan take aca jakenacan sarnakäwinacapajj utji. Nefisti mä jiscʼa kellkat luraraquiwa, ucampis uca kellkatajj chekawa.

10. Uqhämasti Nefin kellkataparjamaw nayajj ucanacjjat kellkta. Ucasti kellkatänwa Nefin tʼalpha lekʼetanacap sata tʼalphanacjjaru.

11. Jïsa, quipca amparajjan lurata tʼalpha lekʼetanacjjaruw aca kellkat lurta.

12. Nayasti Mormon satätwa. Mormon oraket sutijj catokta; uca orakensti Almajj jakenac taypin iyawsiri tama ut-tʼayäna, jïsa, jakenacan juchar saranucutap khepatjja, nayrïr ut-tʼayat iyawsiri tama ut-tʼayäna.

13. Diosan Jesucristo Yokapan yatekeripätwa. Jupan jawsatätwa, arup jakenacap taypin arnakañataqui, jupanacan wiñay jacañanïñapataqui.

14. Niy sarakapcänsa uca kollan jakenacan iyawsataparjamaw mayisïwinacapan phokhasiñapataqui, Diosan munañaparjamajja nayan uca luratanacat mä kellkat lurañajjajj waquisi.

15. Jïsa, Lehejj Jerusalenat mistuncäns ucapachat jichhacamajj cunanacatejj camächcän ucjjat mä jiscʼa kellkatawa.

16. Ucat nayat nayrakat sarakerinacan nayar churat kellkatanacapat kellkatajj kellkta, nayan urunacajjan kalltapcama.

17. Ucat cunanactejj quipca nayrajjamp uñjcta ucanacjjat mä kellkat kellkaraquëjja.

18. Lurctsa uca kellkatajj chekans chekapawa. Ucampis waljanacaw lajjrajjarjamajj jan kellkañjamäquiti.

19. Jichhasti naya pachpjjat parlañ tucuytwa. Cunanacatejj nayat nayrakatäcän ucanacjjat niy kellkaraquï.

20. Nayajj Mormonätwa, Lehit chekpach sarakerïtwa. Nayan Diosajjaru, Jesucristo Khespiyirijjar bendiciñajjataquiw utji, cunalaycutejj jupaw awquinacajjar Jerusalen oraket irpsunïna. (Janiraquiw qhitis ucjj yatcänti, jan ucajja jupampi, jupajj irpscän ucanacampiquiwa). Uqhämaraqui, jupajj nayampir jakenacajjampirojj walja yatiñanac churapjjetu, almanacajjan khespiyasiñapataqui.

21. Chekpachan jupajj Jacobon utaparojj qhuyapayiwa, Josean jathaparusti qhuyapayaraquiwa.

22. Lehin wawanacapan jupan camächitanacap phokhapjjañaparjamajja, jupajj aruparjamaw qhuyapayi, jachʼaptayaraqui.

23. Chekpachawa, jupajj Josean jathapat mä jiltʼirinacaruw wasitat Dios Tatitupat yatiñar cut-tayani.

24. Tatitojj chekpachaw jacasqui. Uca pachpa chekampiw oraken pusi thiyapat jupajj Jacobon take acapach orakjjan chʼeketatat jathapat take jiltʼirinac apthapini.

25. Jupajj Jacobon take utapar arscän uca arsüwirjam phokhasïnjja, uqhämaw Jacobon utapamp mantcän uca arsüwejj waquiscan ucqhajj phokhasini, jupajj jupanacamp mantcän uca arsüwjjat yatiñar take Jacobon utap cut-tayañataqui.

26. Ucapachaw Cutsuyiriparojj uñtʼapjjani; ucasti Diosan Jesucristo Yokapawa. Ucapachaw oraken pusi thiyapat jupanacajj quipca orakenacapar apthapitäpjjani, cawqhanacat-tejj chʼeketatatäpcäns ucawjaru. Jïsa, Tatitojj chekpachaw jacasqui. Uca pachpa chekampejj uqhamäniwa. Uqhamäpan.