1. Ucatsti, uca arunac arsusin Jesusajj maynit mayniruw yatekerinacaparojj parläna, aqhäm sasa: Nayajj Awquin ucar sarcä uca khepatjja, cuns munasma?

2. Ucjjarusti takenjamaw aqhäm sapjjäna, quimsaniquiw jan uqhäm sapcänti: Kawkhacamatejj jakejj jacañapäqui uca jacañ tucuyasina, lurañajjatac jawsquista uca kollan luräwinac lurañajjan tucusiñap munapjjerista, nanacan juman ucar lak khapak marcaman jutapjjañajjataqui.

3. Jupasti jupanacarojj sänwa: Uc nayat munapjjatam laycuw qhuyapayatäpjjäta. Uqhämasti, pakallk tunc payan maranïtam khepat nayan ucaruw jutjjapjjetäta, marcajjana; nayampisti samarañ jicjjatapjjäta.

4. Jupanacar parlañ tucuyat khepatsti, quimsanir uñcatasin jupajj säna: Nayan Awquir saratajj khepatjja, cuns lurañajj jumanacatac munapjjta?

5. Jupanacasti chuymanacapan llaquisipjjänwa, cunalaycutejj cuntejj catokañ munapcän uc arsuñjj ajjsarapjjänwa.

6. Jupasti jupanacarojj sänwa: Nayajj lupʼïwinacamjj yat-twa. Nayajj judionacan janïr aytatäcäyäta, jupanacampïcäyät ucapachajj nayampïcän uca Juan munatajjajj cuntejj nayat muncänjja, uc jumanacajj munapjjaractajja.

7. Uqhämasti, jucʼamp qhuyapayatäpjjätaw jumanacajja. Janipiniw jiwañ malltʼapcätati, jan ucasti, jacapjjätawa, jaken wawanacapatac Awquin take lurañanacap uñjapjjañamataqui, take cunanacan Awquin munañaparjam phokhasiñapcama, nayan khapak cancañajjan alajjpachan chʼamanacapamp jutañajjcama.

8. Janiw cunapachas jiwañan usunacapamp tʼakhesipcätati; antisas nayajj khapak cancañajjan jutcä ucqhajja, nayra mä chʼipjjtan turcatäpjjätawa, jiwir cancañata jan jiwquir cancañaru. Ucatsti Awquijjan khapak marcapan jachʼaptayatäpjjätawa.

9. Uqhämaraqui, janchin jacasajja, janiw usupcätati; janiraquiw llaquisiñajj utjapcätamti, jan ucasti, oraken juchanacap laycuquiw utjani. Cuntejj nayat munapcta uca laycuw take uc lurä, cunalaycutejja, jakenac nayar irpaniñ munapjjtajja, orakejj utjcan uc-chañcamajja.

10. Uca laycuw phokhat cusisiñajj jumanacan utjani. Ucatsti, Awquijjan khapak marcapan kontʼapjjäta; jïsa, cusisiñamajj phokhatpachäniwa, cunjämatejj Awquejj nayarojj phokhatpach cusisiñ churquit uqhäma. Jumanacasti nayjamäpjjätawa; nayasti Awcjamätwa; Awquimp nayampejja mayaquïpjjtwa.

11. Kollan Ajayusti, Awquimpit nayampit ircati. Naya laycusti Awquejj Kollan Ajay jaken wawanacapar churi.

12. Ucatsti uca arunac arsusinjja, Jesusajj sapakat mayniruw lucʼanapamp llamctʼäna. Cawquïrinacatejj kheparañapäcän uca quimsaniruquiw jan llamctʼcänti. Ucatsti, sarjjänwa.

13. Ucatjja, alajjpachanacaw jistʼartäna; jupanacasti alajjpachar aptatäpjjaraquïnwa; uqhämaraqui jan arscay cunanac uñjapjjäna, istʼapjjaraquïna.

14. Ucjjat jan arsuñapataquiw camächit catokapjjäna, janiraquiw chʼamajj jupanacar churatäcänti, uñjapcäns istʼapcäns ucanac arsuñapataqui.

15. Janchincapc-chïnsa janchit ankancapc-chïns ucjjatjja, janiw jupanacajj yatipcänti. Jupanacajj yakha cancañar tucupcaspas uqhäm amuyapjjäna. Diosan cunanacap uñjapjjañapataquejj aca jiwir janchita, jan jiwquir cancañar tucuyatäpcaspas uqhäm amuyapjjäna.

16. Ucampis wastat aca orakjjan yatichapjjäna. Ucampis alajjpachan jupanacar churat camächit laycojja, cuntejj istʼapcäna, uñjapjjaraquïn ucanacjjat janiw yatichapcänti.

17. Jichhasti, uca yakha cancañar tucutapat ucsarojja, jupanacajj jiwir cancañancapc-chis jan jiwquir cancañancapc-chisa, janiw ucjjat nayajj yatcti.

18. Ucampisa, churat kellkatarjamajja, ac yat-ta: Orakjjaruw sarapjjäna, ucatsti, take jakenacaruw yatichapjjaraquïna, take qhitinacatejj yatichäwipar iyawsapcän take ucanacar bautisasaw iyawsir tamar mantayapjjäna. Kawkhanitejj bautisatäpcän take ucanacasti, Kollan Ajay catokapjjaraquïna.

19. Jan iyawsir tamanquirinacasti jupanacarojj carcelaruw jakontapjjäna. Carcelanacasti janiw jupanacarojj catjjäsirjamäpcänti, cunalaycutejj ucanacajj payaruw jaljtäna.

20. Ucatsti, oraker allintatapjjänwa. Ucampis jupanacajj Diosan arupampiw orakerojj jawkʼantapjjäna, ucat orak pʼiya mankhanacat jupan chʼamapan antutayatäpjjänwa. Uqhämasti, jupanacar catjjäsiñataquejj janiw jakenacajj pʼiya putunac allsurjamäpcänti.

21. Quimsa cutiw akquir nina hornor jakontatäpjjäna. Ucampis janiw ninajj jupanacar camächcänsa.

22. Pä cutiw ajjsarcañ lakʼonacan putupar jakontatäpjjäna. Ucansti, cunjämatejj mä jiscʼalalajj ovej kallump anatqui uqhämaw jupanacajj ajjsarcañ lakʼonacampejj anatapjjäna; janiraquiw usuchjatäpcänti.

23. Uqhämaw Nefin jakenacap taypin sarnakapjjäna, take uca orakenquir jakenacarusti, Criston asqui yatiyäwip yatichapjjaraquïna. Jakenacasti Tatituruw cutiquipstapjjäna, Criston iyawsir tamapampiw mayachthapipjjaraquïna. Uqhämaw uca mitajj jachʼaptayatäna, Jesusan aruparjama.

24. Jichhasti naya Mormonajja, ucanacjjat arsuñ tucuytwa, mä kawkha pachataqui.

25. Jan jiwañ malltʼañapäcan ucanacan sutinacap niy kellkerjamäscäyätwa, ucampis Tatituw jarcʼaketu; ucat nayajj jan ucanac kellkcti; cunalaycutejj ucanacajj oraket imantatäpjjewa.

26. Ucampis nayajj jupanacarojj uñjtwa. Jupanacasti chʼamampiw tumpapjjetu.

27. Jïsa, jupanacajj gentilenac taypincapjjaniwa; gentilenacasti janiw jupanacarojj uñtʼapcaniti.

28. Judionac taypincapjjaraquiniwa; judionacasti janiw jupanacarojj uñtʼapcaniti.

29. Ucatsti, cunapachatejj Tatitojj suma amuyuparjam amuycan ucapachajja, jupanacajj take Israelan chʼeketatat tamanacaparuw chʼamamp yanapapjjani, uqhämaraqui take marcanacaru, wila masinacaru, lajjranacaru, jakenacaru. Ucanac taypitsti jupanacajj walja jakenacaruw Jesusar irpapjjani, jupanacanquir Diosan amuyayir chʼamap laycu, jupanacan munañap phokhañataqui.

30. Jupanacajj Diosan alajjpach qhitanacapjamawa. Jupanacatejj Jesusan sutipjjar Diosat mayisipcaspa ucqhajja, cawquïr jakerutejj jupanac pachpajj uñachayasiñ munapqui ucarojj uñachayasispawa.

31. Uqhämasti, cuna jachʼa jutir uruntejj take jakenacajj Criston taripäw konuñap nayrakatar chekpach saytʼapcani ucürojj janïr purcan ucapachajja, jupanacajj jachʼa muspharcañ luräwinac lurapjjani.

32. Jïsa, janïr uca taripañ urojj purcan ucapachajja, gentilenac taypinsa, jupanacajj jachʼa muspharcañ luräwinac lurapjjani.

33. Criston take muspharcañ luräwinacap yatiyir take kellkatanacajj jumanacan utjcaspa ucqhajja, Criston aruparjamaw ucanacan chekpach puriñapan waquisitapjjat yatipjjasma.

34. Qhitinacatejj Jesusan arunacaparu, uqhämaraqui, jupan ajllita, jupanac taypir qhitanit jakenacar jan yäkapqui, ay ucanacata! Cunalaycutejj take qhitinacatejj Jesusan aruparu, uqhämaraqui qhitanacapan arunacapar jan catokapqui ucanacajja, janiw Jesusar catokapcaraquiti. Uqhämasti, khep khepa urunjja, janiw jupajj jupanacarojj catokcaraquiniti.

35. Janitejj jupanacajj yuripcasapänjja, jupanacataquejj jucʼamp sumäsapänwa. Khespiyasiñan utjañapataqui, jakenacan cayunacapan tacjjatata, chuym usuyat Diosan cheka taripañapar jarcʼapcasmas uqhäm amuyasipjjtati?

36. Jichhasti, Tatitojj ajllcän ucanacjjat parlasa, jïsa, alajjpachar aptatäcänsa uca quimsanjjat parlcta ucapachajja, jupanacan jiwir cancañat jan jiwquir cancañar kʼomachatätapats jan kʼomachatätapats janiw yatcäyät-ti.

37. Ucampis nayajj kellkcta uca khepat Tatiturojj jisctʼta. Jupasti nayarojj khanañchituwa, janchinacapar turcayañan waquisitapjjata; jan uqhamäcasapän ucajja, jupanacan jiwañ malltʼañapajj waquisisapänwa.

38. Uqhämasti, jan jiwañ malltʼapjjañapataquiw janchinacapajj turcayatäpjjäna, jan usump llaquisiñamp tʼakhesiñapataqui, jan ucasti, oraken juchanacap laycuqui.

39. Ucampis uca turcäwejja, janiw khep khepa urun lurascan uqhäm turcäwïcänti; jan ucasti, jupanacanjja, mä turcäwiw utjäna, Supayan jupanacar yantʼañatac jan chʼamanïñapataqui, ucat jupanacajj janchi token kollanaptayatäpjjäna, jupanacan kollanäpjjañapataqui, oraken utjir chʼamanac jan catjjäsipjjañapataqui.

40. Criston taripäw urupcamasti, uqhäman kheparapjjañapawa; ucürun jucʼamp jachʼa turcäw jicjjatapjjani. Ucatsti jan mayamp mistuñataquiw Awquin khapak marcapan catokatäpjjani, alajjpachan wiñayatac Diosamp utjasiñataqui.