1. Jichhasti nayajj uñachayämawa, jupanacan mä pʼekechir orakjjar jan ut-tʼayatapa. Ucampis uca pachpa maranjja, jïsa, uca quimsa tunc maranjja, uca oraken jilïr taripiriparuw taripañ konuñapjjan jiwayapjjäna.

2. Jakenacasti jupanac puraw chʼajjwasin jaljtapjjäna. Jupanac purasti maynit mayniruw yakha tamanacar jaljtapjjäna. Sapa mayniw jaljtäna familiaparjama, wila masinacaparjama, uñtʼat masinacaparjama. Uqhämat jupanacajj uca oraken gobiernopar tucqhapjjäna.

3. Sapa jake tamaw mä irpirir, jan ucajj mä sarayirir jupanacjjar ut-tʼayasïna. Uqhämat jupanacajj jake tamanacaru, jake tamjjar irpirinacar tucupjjäna.

4. Sapakat mayniw jupanacat walja familianïna, walja wila masinacanïna, walja uñtʼat masinacanïna. Ucat jakenacan tamanacapajj sinti jachʼar tucupjjäna.

5. Take ucanacaw lurasïna, jupanac taypin nuwasiñanac janïr utjquipana. Jakenacan supayan chʼamapar catuyasitapat take uca ñankha cancañajj jupanacjjar purïna.

6. Arjirinacar jiwayapcäns ucanacan familianacapan masinacapan, jamas arustʼäwir mantatap laycuw, gobiernon leyinacapajj tʼunjat uñjasïna.

7. Jupanacasti uca orakenjja jachʼa chʼajjwäw puriyapjjäna, jucʼamp asqui jakenacan niyapin kʼal ñankhar tucuñapcama. Jïsa, jupanac taypinjja, mä jucʼaniquiw asqui jakenacajj utjäna.

8. Uqhäma, janïraw sojjta maras sarakcänti ucqhaw niyapin take jakenacajj asqui cancañat saranucupjjäna, cunjämatejj anojj cutiysutapar cutjjatasqui, cunjämatejj awil qhuchejj ñekʼe taypin suntʼiñapar cut-tqui uqhäma.

9. Cawquïr jakenacatejj uca jachʼa ñankh puriycän uca jamas arustʼäwipampejj mayachthapisipjjänwa. Jupanacar sarayañataquisti mä jakeruw ut-tʼayasipjjäna. Juparusti Jacob sapjjänwa.

10. Juparusti pʼekechir sutimpiw uchapjjäna. Ucat jupajj uca ñankha jake tamjjaruw pʼekechirir tucüna. Jesusat ircatir arjirinacar juchañchir ircatapcän uca jakenacat jupajj mä jilïrïnwa.

11. Ucatsti jupanacajj janiw waljanïpcänti jakenacan tamanacapat sipana. Jakenacan tamanacapajj mayachthapitänwa. Ucampis sapa irpiripajj leyinac ut-tʼayäna quipca jake tamapataquiqui. Ucampis jupanacajj purapat timanacäpjjaraquïnwa. Jupanacajj jan asqui jakenacäpc-chïnsa, gobiernor tucqhañatac mä arsüwir mantat jakenac contraw jupanacajj uñisiñamp saytʼapjjäna.

12. Ucat Jacobojj timanacapan jupanacat sipan waljanïtap uñjäna. Jupasti, uca taman pʼekechiripäsaw jakenacapar säna, jupanacan jaltañapataqui uca oraken jucʼamp alay tokenquir thiyanacaparu, ucqhan jupanacan mä pʼekechirin marc ut-tʼayañapataqui, yakha marcat misturinacan jupanacamp chicäñanacapcama, jakenacan tamanacapar nuwasiñatac chʼamanïñapcama. (Jupajj kowachasaw jupanacarojj parläna, waljaniw marcat misturinacajj utjani –sasa). Jupanacasti uqhäm lurapjjäna.

13. Sinti lakaw sarjjapjjäna; ucat janiw jarcʼañjamäcänti, jakenacan amparapat jaltañapcama. Uqhämaw quimsa tunc marajj tucusïna. Uqhämaraquïn Nefi jakenacan sarnakäwinacapajja.

14. Ucatsti quimsa tunc mayan maranjja, jupanacajj tamat tamanacaruw jaljtatäpjjäna; sapa jakesti familiaparjama, masinacaparjamaw jaljtatäna. Ucampis jupanacajj arustʼapjjänwa, jupanac pur jan nuwasiñanacapataqui. Ucampis janiw leyinacapanjja, cunjäm tamar sarayäwinacapans chicapcänti, cunalaycutejj ucanacajj pʼektʼirinacapan irpirinacapan amuyunacaparjam ut-tʼayatänwa. Ucampis wali chʼaman leyinacap ut-tʼayapjjäna, mä taman yakha tamar jan walinac jan lurañapataqui. Ucat uca oraken mä jucʼa sumancañajj utjäna. Ucampis chuymanacapajj Dios Tatitupat mays uñtayatäpjjänwa, arjirinacarojj kalampiw cʼupjapjjäna, jupanac taypit jakonucupjjaraquïna.

15. Ucatsti Nefejj alajjpachanquirinacan Tatitun arupan tumpatänwa. Ucat jupajj alajjpach qhitanacar uñjäna, quipca nayrapampiw uñjäna. Chʼamajj jupar churataraquïnwa, Criston kollan luräwinacapjjat jupan yatiñapataqui. Uqhämaraqui, jupajj quipca nayrapampiw jakenacan asqui cancañat ñankha cancañar ajjtcañ luräwinacar lak tucutap uñjäna.

16. Ucatsti, chuymanacapan chʼollkhëtapata, amuyunacapan juyqhütapat jupajj wal llaquisïna; uca pachpa maran jupanac taypir saräna; Jesucrist Tatitur iyawsañ toket juchanacat cutiquipstañjjata, juchanac pʼampʼachañjjat jan ajjsarañampiw ircatañ kalltaraquïna.

17. Walja cunanac jupanac taypin chʼamamp luräna; take ucanacasti janiw kellkañjamäquiti; ucanacat mä jucʼanacac kellkañajja, janiraquiw walïcaspati. Ucat ucanacajj janiw aca libron kellkatäquiti. Nefisti kollan luräwinac chʼamampi, chʼaman cancañampiw luräna.

18. Jupan Jesucrist Tatitur iyawsatapajj sinti jachʼänwa, alajjpach qhitanacasti sapüruw yanapas tumpapjjäna. Janis jakenacajj iyawsañanïpcänjja, jupan arunacaparojj iyawsapjjañapänwa. Ucat jupan jupanacat sipan jucʼamp chʼamanïtapat jupatac colerasipjjäna.

19. Ucatsti, jupajj Jesusan sutipjjaruw supayanacampir ñankha ajayunacampirojj alis-süna. Mä jilaparus jiwatat jactayänwa. Ucarojj jakenacaw kalamp cʼupcäwejj jiwayapjjäna.

20. Jakenacasti ucjj uñjapjjänwa, ucjjat amuyapjjaraquïna. Ucat jupan chʼamapat jupanacajj colerasipjjäna. Jakenacan uñjatapanjja jupajj walja yakha muspharcañ luräwinac Jesusan sutipjjar luraraquïna.

21. Ucatsti quimsa tunc mayan marajj sarakänwa. Jucʼaniquiw Tatitur cutiquipstapjjäna. Ucampis take qhitinacatejj cutiquipstapcän ucanacajja, jakenacaruw chekpach yatiyapjjäna, Diosan chʼamapan Ajayupan jupanacar tumpatapjjata. Uca chʼamapamp Ajayupampisti Cristoncänwa; juparusti jupanacajj iyawsapjjänwa.

22. Uqhämaraqui, take qhitinacat-tejj supayanacajj alis-sutäpcäna, take qhitinacatejj usunacapata, tʼakhesïwipat cʼumaraptayatäpcän ucanacajja, jakenacaruw Diosan Ajayupan turcatapjjata, cʼumaraptayatapjjat chekpach yatiyapjjäna. Jupanacasti unañchanac uñachayapjjaraquïna, mä kawkha muspharcañ luräwinac jakenac taypin lurapjjaraquïna.

23. Uqhämaw quimsa tunc payan marajj sarakaraquïna. Quimsa tunc quimsan mara kalltanjja, Nefejj jakenacaruw artʼäna. Juchanacat cutiquipstañjjata, juchanac pʼampʼachañjjat jupanacar yatiyäna.

24. Jichhasti juman acjjat amtasiñam munaraquirista. Umampi jan bautisasisinjja janiw qhitis juchat cutiquipstañar irpatäcänti.

25. Ucatwa, Nefejj jakenacar chʼamamp ut-tʼayäna aca kollan luräw lurañapataqui, takpach jupanacar jutirinacar umamp bautisañapataqui. Ucasti Diosan nayrakatapansa jakenacataquisa mä ircatäwïcaspas yatiyäwïcaspas uqhämaw jupanacan juchanacat cutiquipstatapata, juchanacapan pampachatätapatsa.

26. Uca mar kalltanjja, waljaniw juchanacat cutiquipstañatac bautisasipjjäna. Uqhämaw jilpachajj uca marat sarakäna.