17ri Jalja
Khespiyirin jucʼamp yatichäwinacapa – Chhaktat tamanaca – Khespiyirejj usutanacaruw cʼumaraptayi, jiscʼalalanacaruw bendiciraqui – Mä muspharcañ chuymachir camachäwi.
1. Ucatsti, Jesusajj uca arunac arsusinjja, wastat walja jakenacar uñatatäna; jupanacarusti siwa: Pachajjajj niy purinjjaniwa.
2. Awquejj nayan jichhajj arsuñajjataquiw camächit churquitu, take uca arunacjjat amuyañatac jan chʼamanïtanacam amuyta.
3. Uqhämasti, utanacamar sarjjapjjam, cuntejj nayajj arsctsa ucanacjjat lupʼipjjam, nayan sutijj-jjar Awquit mayisipjjam amuyañanacamataqui. Kharürutaquejj amuyunacam waquichasipjjam, ucat wastat jutapjjäma.
4. Ucampis jichhajj Awquiruw sarä, uqhämaraqui Israelan chhakat tamanacaparu, naya pachpa uñachayasiriw sarä. Jupanacajj janiw Awquitaquejj chhaktatäpquiti, cawqharutejj jupanacarojj irpqui uc yatitap laycu.
5. Ucatsti uqhäm arsusinjja Jesusajj wastat walja jakenacjjar nayrapamp uñatatäna, ucatsti jupanacar jachir uñjaraquïna. Jupanacasti juparojj wal uñchʼuquipjjäna, jupan jucʼamp jupanacamp kheparañapatac mayisipcaspas uqhäma.
6. Jupasti sänwa: Jumanacar munañamp qhuyapayañampejj chuymajj mankhan phokhantatawa.
7. Jumanac taypin usutanacajj utjiti? Ucanac acsar irpanipjjam. Jumanac taypin utjiti; cayu cʼucʼunaca, juyqhunaca, amutunaca, usuchjas morokatanaca, sisu usuninaca, ancu thisthapitanaca, okaranaca, cunayman usuninacajja? Ucanac acsar irpanipjjam, cunalaycutejj jumanacaruw qhuyapayapjjsma ucat ucanacar cʼumaraptayä. Qhuyapayañajj chuymajj mankhan phokhantatawa.
8. Cunalaycutejj amuytwa, cuntejj jilanacamatac Jerusalenan lurctjja, jumanacajj ucjja, nayan uñachayañajj munapjjta. Uqhämaraqui iyawsañamajj utji nayan jumanacar cʼumaraptayañajjataqui.
9. Ucatsti, jup uqhäm arsquipana, take uca walja jakenacajj mä amuyumpiw nayrakatar jacʼachasipjjäna; usutanacapampi, tʼakhesiyatanacapampi, cayu cʼucʼunacapampi, juyqhunacapampi, amutunacapampi, take cunayman usuninacampi. Jupanacajj uqhäm jupan uc irpatäpcäns ucqhajja jupajj sapakat mayniruw cʼumaraptayäna.
10. Takeniw jupanacajja, cʼumaraptayatanacasa cʼumaranacasa, cayup nayrakatar quilltʼasisin juparojj yupaychapjjäna. Qʼiqʼi jakenaquïpana kawkhanirutejj wactʼcänsa, take ucanacajj cayup jampʼatipjjäna, cayupar jachanacapamp jurichañapcama.
11. Ucatsti jiscʼalalanacap irpaniñapataquiw jupajj arsüna.
12. Ucatjja, jiscʼalalanacap ichunipjjäna, ucatsti orakeruw kontʼayapjjäna jupar muyuntayasa. Jesusasti taypin saytʼatänwa. Qʼiqʼi jakenacasti jit-tapjjaraquïnwa takenin jupar ichunitäñapcama.
13. Ucatsti cunapachatejj takenejj ichunitäpcäna, Jesusajj jupanac taypin saytʼatäcaraquïn ucqhaw walja jakenacan oraker konkortʼasipjjañapatac jupajj mayïna.
14. Ucatsti taken konkortʼasipcän ucqhaw, Jesusajj chuyma mankhapan ayköna, ucat aqhäm arsuraquïna: Tata, Israelan utapanquir jakenacan ñankhätapat llaquista.
15. Uca arunac arsusinsti, jupa pachpaw orakerojj konkortʼasiraquïna. Ucatsti jupajj Awquit mayisïna; cunanactejj mayiscän ucanacajja, janiw kellkañjamäquiti. Walja jakenacajj istʼapcän ucanacaw ucjjat ircatapjjaraquïna.
16. Aqhäm sasaw jupanacajj ircatapjje: Cunanactejj nanacajj Jesucristo Awquirojj arsur uñjapcta, istʼapcta uqhäm jachʼa muspharcañ cunanacjja, janipuniw nayrapachans nayranacajj uñjquiti, janiraquiw jinchus istʼcaraquiti.
17. Nanacajj Jesusarojj arsur uñjapctsa, istʼapctsa uqhäm jachʼa muspharcañ cunanacajj janiw lajjran arsuñjamäquiti, janiw qhiti jakens kellkañjamäquiti, janiraquiw jakenacan chuymanacapan amuyañjamäquisa. Awquit nanacatac mayisir jupar uñjapcta ucqhajja, chuymanacajjan phokhäcän uca cusisiñjjat janiw qhitis amuycaspati.
18. Ucatsti Awquit mayisiñ tucuyasinjja, Jesusajj saytʼänwa; ucampis jakenacajj sinti jachʼa cusisiñan atipjatäpjjänwa.
19. Ucatsti Jesusajj jupanacaruw mayïna, saytʼapjjañapataqui.
20. Jupanacasti oraket saytʼapjjänwa; jupasti jupanacarojj sänwa: Qhuyapayatäpjjtawa iyawsapjjatamata. Jichhasti cusisiñajjajj phokhatawa.
21. Uca arunac arsusinsti jupajj jachänwa. Walja jakenacaw ucjjat ircatapjjaraquïna. Jupasti jiscʼalalanacaparojja, maynit maynit ichjjarusaw bendicïna, jupanacataquisti Awquit mayiraquïna.
22. Uc lurasinsti, wasitat jachäna.
23. Walja jakenacar parlasasti, jupanacarojj siwa: Jiscʼalalanacamar uñjapjjam.
24. Uñtasinsti, jupanacajj nayranacapampiw alajjpachar uñtapjjäna; ucatsti alajjpachanac jistʼartir uñjapjjäna; nina taypinc-caspas uqhäm alajjpach qhitanacar alajjpachat sarakanir uñjapjjäna. Alajjpach qhitanacasti sarakanipjjänwa, uca jiscʼalalanacaruw muytapjjaraquïna, ninamp muytatäpjjaraquïnwa. Uca alajjpach qhitanacasti jupanacar yanapañataquiw tumpapjjäna.
25. Walja jakenacaw uñjapjjäna, istʼapjjäna, ucjjat ircatapjjaraquïna. Takeniw jupanacat uñjapjjäna, istʼapjjaraquïna; sapakat mayniw jupa pachpataquejj uñjäna istʼaraquïna; ucat jupanacajj ircatatapan chekätapjjat yatipjje. Ucan utjäna pä warank pheska patacjam jakenacajja. Chachanacamp warminacamp wawanacampiw ucan utjäna.