1. Cunürutejj hornjam nakhcan ucürojj jutaniwa; take jachʼa jachʼa tucur jakenacasti, jïsa, take ñankha lurir jakenacampejj yawit alinacjamäniwa; uca jutir urusti jupanacaruw kʼal japuchrantani –siw Arctirinacan Tatitupajja; saphips laymips janiraquiw jupanacat jiltʼaycaniti.

2. Ucampis juma sutijjar ajjsaririnacataquejja, Asqui Cancañan Yokapaw jactani; chhekhapansti kollañaw utjani. Jumanacasti nayrakataruw sarapjjäta; cunjämatejj vaca kallojj uyun jiltquejja, uqhämaw jumanacajj jiltapjjaraquïta.

3. Ñankha jakenacarusti tacjjatapjjätawa. Cunüruntejj ac lurcä ucürun jupanacajj cayunacaman khelljamäniwa –siw Arctirinacan Tatitupajja.

4. Take Israelataqui leyinacampi camächinacamp Moisesar Horeban churcäyätjja, uca Moises lokerijjan leyip amtapjjam.

5. Amuyapjjam, Tatitun janïr jachʼa ajjsarcañ urupajj purcan ucqhaw Elias arjirjja, jumanacar qhitanipjjäma.

6. Jupasti awquinacan chuymap wawanacar cut-tayani; wawanacan chuymapsti awquinacaparuw cut-tayaraquini, nay jutasin oraker mä ñankhachäwimp jan jawkʼantañajjataqui.