1. Jesusajj uca arunacjj Nefimpiru uqhämarac qhitinacatejj jawsatäpcän ucanacampi arscän ucapachatjja, (qhitinacatejj jawsatäpcänsa, chʼamampi, chʼaman cancañamp bautisañatac catokapcänsa ucanacajj tunca payanïpjjänwa), ucat amparap walja jakenacar loktasaw jupanacar saraquïna: Jumanacatejj aca tunca payani, qhitinacatejj jumanacar yanapañataqui jumanacan lokerinacamäñapataqui jumanac taypit ajllcta ucanacan arunacapar yäkapjjätajja, cusisipjjätawa. Jupanacarusti nayajj chʼam churta jumanacar umamp bautisañapataqui. Jumanacan umamp bautisatätam khepatsti, nayaw jumanacarojj ninamp Kollan Ajayump bautisapjjäma. Uqhämasti nayar uñjasina, nayan utjatajj yatisintejj iyawsapjjetätajja, sutijj-jjar bautisasipjjätajja, qhuyapayatäpjjätawa.

2. Uqhämaraqui, qhitinacatejj jumanacan nayar uñjatamata, nayan utjatajj yatitamat ircatatam laycu arunacamar iyawsapcan ucanacajja, jucʼamp qhuyapayatäpjjaraquiniwa. Jïsa, cusisipjjaniw qhitinacatejj arunacamar iyawsapcani sinti llampʼu chuymanir tucupcani, bautisasipcaraquin ucanacajja. Jupanacajj tumpatäpjjaniw ninamp Kollan Ajayumpi; juchanacapasti pampachataraquïniwa.

3. Jïsa, cusisipjjaniw nayar jutir ajayun aynachtʼatanacajja, cunalaycutejj jupanacanquiw alajjpach khapak marcajja.

4. Cusisipjjaniw take jachirinacajja, cunalaycutejj jupanacajj chuymachatäpjjaniwa.

5. Cusisipjjaniw llampʼu chuymaninacajja, cunalaycutejj jupanacajj acapach orakjj tutjam catokapjjani.

6. Cusisipjjaniw take qhitinacatejj asqui cancañat awtjayasipqui pharjayasipcaraqui ucanacajja, cunalaycutejj jupanacajj Kollan Ajayump phoktʼatäpjjaniwa.

7. Cusisipjjaniw qhuyapayirinacajja, cunalaycutejj jupanacajj qhuyapayatäpjjaniwa.

8. Cusisipjjaniw take kʼoma chuymaninacajja, cunalaycutejj jupanacajj Diosaruw uñjapjjani.

9. Cusisipjjaniw take sumancayirinacajja, cunalaycutejj jupanacajj Diosan wawanacap satäpjjaniwa.

10. Cusisipjjaniw nayan sutijj laycu take arcnakatanacajja, cunalaycutejj jupanacanquiw alajjpach khapak marcajja.

11. Cusisipjjätaw jumanacajja, cunapachatejj jakenacajj ñankhachapcätam, arcanakapcaraquïtam, jumanacatsti cʼarisis take cunayman ñankhanac naya layc sapcaraquini ucapachajja.

12. Jumanacajj jachʼa cusisiñanïpjjätawa, sint cʼuchirtʼasipjjaraquïta, cunalaycutejj jumanacan catokañamajj jachʼäniw alajjpachanjja; cunalaycutejj nayra Diosan arjirinacarojj uqhäm arcnakapjjaraquïna.

13. Chekpach chekapachaw sapjjsma: Jumanacaruw uchapjjsma oraken jayupäñamataqui. Ucampisa, jayutejj chʼapak tucuspajja, cunampis orakejj jayuñchasispa? Ucat ucsarojja, jayojj janiw cunataquis walïcaspati, jan ucasti jakonucuñataquiquiwa, jakenacan taquisiñataquiquiraquiwa.

14. Chekpach chekpachaw sapjjsma: Jumanacaruw uchapjjsma aca jakenacan khanapäñamataqui. Mä kollu patan ut-tʼayat marcarojj janiw imantañjamäquiti.

15. Jakenacajj mecha nactayasajja, mä juyra tupu mankharut ucjj uchapjje? Janiwa, antisas mecha chuwjjaruw uchasi, ucasti take utanquirinacaruw khanti.

16. Ucatjja jumanacan khanamajj jakenacan nayrakatapan khantpan, asqui luräwinacam jupanacan uñjapjjañapataqui, alajjpachanquir Awquimar jachʼar aptapjjañapataqui.

17. Jan amuyapjjamti nayajj leyiru, jan ucajja, Diosan arjirinacar chhaktayir jutquirists uqhäma. Janiw chhaktayirit jutctjja, antisas phokhañataquiw jut-ta.

18. Cunalaycutejj chekpachaw sapjjsma: Janiw leyitjj mä jiscʼa kellkas jiscʼa arus chhaktquiti, antisas nayanjja take ucajj niy phokhatäjjewa.

19. Jïsa, Awquijjan leyipampi camächitanacapamp churapjjsma, nayar iyawsapjjañamataqui, juchanacamat cutiquipstapjjañamataqui, pʼaquintata, altʼat chuymampi nayar jutapjjañamataqui. Amuyapjjam, camächitanacajj nayrakatamanquiwa; leyisti phokhataraquiwa.

20. Uqhämasti nayar jutasin khespiyasipjjam; cunalaycutejj nayajj chekpachaw sapjjsma: Niy churapcsma uca camächitanacajjarojj janitejj phokhapcätajja, janiw cunjämats alajjpach khapak marcar mantapcätati.

21. Nayra jakenacan aqhäm satapar istʼapjjtawa, uqhämaraquiw uca kellkatajj nayrakatamanqui, sasina: Janiw jiwayätati; qhititejj jiwaycan ucajja, Diosan taripäwipan juchañchataw uñstani.

22. Ucampis nayajj sapjjsmawa: Qhititejj jilapatac colerasqui ucajja, jupar taripañjamäniwa. Qhititejj jilapar Raca siscan ucajja, jilïrinacan tantachasïwipan juchañchataw uñjasini. Qhititejj jilaparojj tʼajjmarätaw siscan ucajja, mankhapach ninar jakontañjamäniwa.

23. Uqhämasti, jumanacatejj nayar jutapjjätajja, jan ucajj nayar jutañ munapcätajja, ucat jilaman mä cunas juma toke utjatap amtasipjjätajja,

24. Jilaman uc saram, nayrakat jilamamp sumancthapinim, ucatsti take chuymamp nayar jutam; nayasti jumarojj catokämawa.

25. Timasirimampejj jancʼa sumancthapim, jupamp chic thaquincascasa. Jan ucajja, jupajj inas caturistam, ucat carcelar jakontaraquiristam.

26. Chekpach chekpachaw sapjjsma: Janiw ucatjj mistcätati, khepa senine phokhañamcama. Carcelancasajj mä senins phokhasmati? Chekpach chekpachaw nayajj –Janiw sapjjsma.

27. Jïsa, nayra jakenacan aqhäm kellkatawa: Janiw wachokätati.

28. Ucampis nayajj sapjjsmawa: Qhititejj mä warmirojj munapayañatac uñtqui ucajja, niyaw chuymapan wachokjje.

29. Uqhämasti, nayajj mä camächit churapjjsma: Ucanacat mays jan chuymamar mantañap munamti.

30. Cunalaycutejj jumanacan cruzam apjjarusin ucanac catokañ jarcʼasiñamajj jucʼamp sumawa, mankhapachar jakonucutäñamat sipana.

31. Kellkatänwa: Qhititejj warmipar qhitanuc-cani ucajja, jaljtañ kellka churpan.

32. Chekpach chekpachaw nayajj sapjjsma: Qhititejj warmipar qhitanuc-cani, jan kʼañusiñap laycüpanjja, jupajj warmiparuw wachokayi. Qhitanucut warmimp jakechasiristi, wachokañaruw puriraqui.

33. Kellkataraquiwa: Janiw cʼari jurament lurätati, jan ucasti Tatituruw juramentonacam phokhäta.

34. Ucampis chekpach chekpachaw nayajj sapjjsma: Jan cuna juraments lurapjjamti, janirac alajjpach laycus jurament lurapjjamti, cunalaycutejj ucajj Diosan sarayäwi konuñapawa.

35. Janirac acapach laycus jurament lurapjjamti, cunalaycutejj ucajj jupan cayunacapan jantʼacupawa.

36. Janiraquiw pʼeke laycus jurament lurätati, cunalaycutejj janiw mä ñicʼutjj jankʼorus chʼiyärarus tucuycasmati.

37. Ucatsipana, jumanacan arsuñanacamajj acaquïpan: Jïsa, jïsa, janiwa, janiwa, cunalaycutejj ucanacat jucʼampejj ñankhawa.

38. Kellkataraquiwa: Nayratjja nayra; laca chʼaqhatjja laca chʼaqha.

39. Ucampis nayajj sapjjsmawa: Jan ñankhachirirojj chʼurqhisipjjamti. Ucatsipana qhititejj cupi ajanumat tʼajjllcätam ucarojja, maysäjjamp-pach waycatam.

40. Mä jaketejj leyir juma contra yatiyascani awayusiñam aparañataqui, ucarojj jak-khatasiñamp-pach churaraquim.

41. Qhititejj mä tuputaqui kʼepjjaruycätamjja, pä tupu ucampejj saram.

42. Jumat mayirirojj churam, jumat maytʼasiñ munirirusti, jan ucsac qhitanucumti.

43. Kellkataraquiwa: Jake masimarojj munasïtawa; timamarusti uñisïtawa.

44. Ucampis nayajj jumanacaruw sapjjsma: Timanacamar munasipjjam; jumanacat ñankha arusirinacataquejj asc arsupjjam; jumanacar uñisirinacarusti asc lurapjjam; uqhämaraqui jumanacar ñankhachir arcnakerinacataquejj Diosat mayipjjam.

45. Ucjj lurapjjam alajjpachanquir Awquiman wawanacapäñamataqui, cunalaycutejj jupajj intipjja, ñankhanacjjar asquinacjjaruw jalsuyi.

46. Uqhämasti, leyinquir nayrapach take cunanacajj nayan phokhatäjje.

47. Merkʼe cunanacajj tucuyatäjjewa. Take cunaraquiw machakar tucjjaraqui.

48. Ucat jumanacan phokhatpach asquïñanacam munirista, cunjämatejj nayajja, jan ucajj, alajjpachanquir Awquimas phokhatpach asquïpctjja, uqhäma.