1. Ucatsti llätunc tunc pheskan marajj uqhäm sarakaraquïna. Jakenacasti istʼapcänsa uca unañchanacat musphäwinacat armasiñ kalltapjjäna. Alajjpach unañchata, musphäwits muspharañapajj jiscʼat jiscʼaruw tucüna. Ucat chuymanacapar chʼollkheptayasiñ amuyunacapar juyqhuptayaña, istʼapcäna uñjapcäna take ucanacar jan iyawsañ kalltapjjaraquïna.

2. Chuymanacapansti jan walinac lupʼipjjäna, jakenacampi supayan chʼamapampejj jakenacar irpanucuñatac chuymanacapar sallkjañatac uc lurapcasapäns uqhäma. Uqhämaw Satanasajj jakenacan chuymanacap wastat catuntäna. Ucat jupajj nayranacap juyqhuptayäna, jupanacaruw irpakaraquïna, Criston yatichäwipajj jan wali inamayäcaspas uqhäm lupʼiñanacapataqui.

3. Ucatsti ñankha luräwinacan ajjtcañ luräwinacan jakenacajj chʼamañchasipjjäna. Yakha unañchanacamp muspharcäwinacampejj janis churascaspajj uqhäm amuyapjjaraquïna. Satanasasti jakenacan chuymanacapar irpakasin, jupanacar yantʼasaw jachʼa ñankhanac uca oraken lurayasin ucs acs sarnakäna.

4. Uqhämaw llätunc tunc sojjtan marajj sarakäna; uqhämaraqui llätunc tunc pakallkon mara, llätunc tunc quimsakallkon mara, llätunc tunc llätuncan maras sarakaraquïna.

5. Uqhämaraqui Nefi jakenacjjar pʼekechirïcän uca Mosian urunacapatjja, patac maraw sarakatäjjaraquïna.

6. Lehejj Jerusalenat mistcän ucapachatjja, sojjta patac llätuncan maraw sarakatäjjaraquïna.

7. Cuna unañchat-tejj arjirinacajj parlapcäna, Criston acapach oraker jutañapjjat yatiycaraquïn uca unañchan churatätapatjja, llätunc maraw sarakatäjjaraquïna.

8. Uca unañchajj churatäcäna, jan ucajja, Criston jutañapäcän ucürut Nefi jakenacajj maranac jaqhuñ kalltapjjäna. Ucat llätunc maraw niy sarakjjäna.

9. Kellkatanacjjar wactʼäwinïcänsa uca Nefin Nefi awquipajj janiw Zarahemla oraker cut-tcänti. Uc-chʼpach orakenjja janiraquiw jupar jicjjatapcänti.

10. Walja yatichañajja jutir urunacat yatiyäwinacajj jakenac taypin apayatäc-chïnsa, jupanacajj ñankha cancañanjj khepaktasipcaquïnwa. Tunquïr marajj uqhämaw sarakäna. Tunca mayan marasti ñankha cancañan uqhäm sarakaraquïna.

11. Ucatsti tunca quimsan maranjja nuwasïwinacamp chʼajjwäwinacampiw uc-chʼpach oraken utjañ kalltäna, cunalaycutejj Gadianton lunthatanacajj niy sinti waljaniruw tucupjjäna, walja jakenacaruw jiwayapjjaraquïna, walja marcanacaruw tucqhapjjäna, uc-chʼpach orakjjan jiwarayapjjäna, janch qharinokapjjaraquïna. Uca laycuw take jakenacana, Nefi jakenacana, Laman jakenacanjja, jupanacjjar nuwasiñataquejj armanac catuñapajj waquisïna.

12. Ucat Tatitur cutiquipstata take uca Laman jakenacajj Nefi jake jilanacapamp chicapjjäna. Quipca jacañanacaparu, warminacaparu, wawanacapar arjjatañataquejj uca Gadianton lunthatanacamp nuwasiñataquejj armanac catuñapajj waquisïnjja. Jïsa, jupanacan lurañ wactʼäwinacap catuscaquiñapataqui, iyawsiri tamapancañapataqui, yupaychañapataqui, munañaparjam lurañapataqui, antutäwipan utjascaquiñapataquiw uca lurañajj waquisïna.

13. Ucatsti janïr uca tunca quimsan mar tucuscän ucqhajja, uca sinti jachʼa nuwasïw laycuw Nefi jakenacajj kʼala tucqhatäpcaspas uqhäm jicjjatasipjjäna.

14. Ucatsti, Nefi jakenacamp chicapcän uca Laman jakenacajj Nefi jakenacamp jaqhutäpjjänwa.

15. Ñankhachatapajj jupanacjjat apakatänwa. Janchipasti Nefi jakenacjam jankʼoruw tucüna.

16. Yokanacapamp phuchanacapampejj sinti suma uynaktʼaniruw tucupjjäna, Nefi jakenacamp jaqhutäpjjaraquïnwa, Nefi jakenac satäpjjaraquïnwa. Uqhämaw tunca quimsan marajj tucusïna.

17. Ucatsti tunca pusin mar kalltanjja, lunthatanacamp Nefi jakenacampejj nuwasisipcaquïnwa; nuwasïwisti sinti jachʼaruw tucuraquïna. Ucampis Nefi jakenacajj lunthatanacjjarojj mä jucʼa chʼamaniptapjjänwa; ucat orakenacapat jupanacar alisnucupjjäna kollunac taypiru, jamasawjanacaparu.

18. Uqhämaw tunca pusin marajj tucusïna. Tunca pheskan maransti Nefi jakenacjjaruw jupanacajj sarakapjjäna. Nefi jakenacan ñankhätap laycu, walja chʼajjwäwinacapa chʼurqhisïwinacap laycu, Gadianton lunthatanacajj jupanacjjar wal chʼamaniptapjjäna.

19. Uqhämaw tunca pheskan marajj tucusïna. Uqhämaraqui jakenacajj walja tʼakhesïwin jicjjatasipjjäna. Tucqhäwin espadapasti jupanacjjar aytatänwa. Jupanacan ñankhätap laycusti, uca espadamp niy jawkʼantatäñjamäpjjaraquïnwa.