1. Ucatsti, pä tunc sojjtan maranjja, Nefi jakenacajj quipca orakenacaparuw cut-tapjjäna, sapa jakejja familiapampi, uywa tamanacapampi, caballonacapampi, vacanacapampi, take jupanacancquis ucanacampi.

2. Jupanacasti janiw take juyranacap mankʼapcänti. Ucat take cunanactejj jan mankʼapcän ucanac jupanacajj apasjjapjjäna take casta yarananacapa, koripa, kollkepa, take jachʼa alaninacapsa. Ucat quipca orakenacaparuw utjäwinacapar cut-tapjjäna, alay tokena, aynach tokena, alay tokenquir orakena aynach tokenquir orakensa.

3. Sumancas kamañatac arsüwir mantapcän uca lunthatanacata, Laman jakenac kheparañ munapcän uca taman kawkhanïtaparjamaw jupanacar orakenac churapjjäna, cunanacatejj jupanacan jacañapatac munascän ucanacan trabajas jacañapataqui. Uqhämat jupanacajj takpach uca oraken sumancañ ut-tʼayäna.

4. Jupanacasti wasitat jachʼaptapjjäna, chʼamaniruw tucupjjaraquïna. Pä tunc sojjtan marampi, pä tunc pakallkon marampisti sarakjjänwa. Wali sumancañ luräwinacaw uca oraken utjäna. Leyinacapsti ut-tʼayapjjänwa, takenin quipcjam utjasipjjañapataqui, asqui taripäwinac utjañapataquiraqui.

5. Janiw cuna jarqʼiris take oraken utjcänti, jakenacajj munataparuw jan saytʼasajj jachʼaptapjjäna. Juchar puripjjasapän ucqhaquiw janejj jachʼaptapcasapänti.

6. Gidgidonimpi, Laconeo taripirimpi, yakha ut-tʼayat irpirinacampiw uca jachʼa sumancañ uca oraken ut-tʼayapjjäna.

7. Ucatsti walja machak marcanac ut-tʼayapjjäna; walja merkʼe marcanacsti asquichapjjaraquïnwa.

8. Walja jachʼa thaquinac lurapjjäna. Mä marcat marcaru, mayawjat yakhawjaru sarir thaquinac lurapjjaraquïna.

9. Uqhämaw pä tunc quimsakallkon marajj sarakäna. Jakenacasti sapa cutiw sumancapjjäna.

10. Ucampis pä tunc llätuncan maranjja, jakenac taypin chʼajjwäwinacaw uñstäna. Yakhepanacasti sinti jachʼa kamirïtap laycuw aytat chuymanir tucupjjäna, jupanac pachpaw aytasipjjaraquïna, jïsa, mayninacar wal alisnakañapcama.

11. Cunalaycutejj walja alaquipanacaw uca oraken utjäna, uqhämaraqui abogadonacas capitananacas utjaraquïna.

12. Jakenacajj kamirïtaparjama, yatekañatac kollkenïtaparjamaw yakha yakha jaker jaljtapjjäna. Jïsa, yakhepanacajj jan kollkenïtap laycojj janiw yatekatäpcänti. Yakhepanacasti wali kamirïtap laycojj wal yatekapjjäna.

13. Yakhepanacajja jachʼa jachʼa tucuñ chuyman phokhantatänwa. Yakhepanacasti sinti llampʼu chuymanïpjjänwa. Yakhepanacajj tokenokatajj tokenokañampiraquiw cut-tayapjjäna. Yakhepanacasti toketäpjjänwa, alisnakata, take cunayman tʼakhesiñanac catokapjjäna, jan ucanacar wasitat ñankh arusisa. Ucanacajj Diosan nayrakatapan llampʼu chuymanïpjjänwa, pʼampʼachañap mayisirïpjjaraquïnwa.

14. Uqhämat yakha yakha jakëñajj take uca oraken uñstäna, iglesian tucusiñ kalltañapcama. Jïsa, quimsa tunc maranjja, take uca oraken iyawsiri tamajj tucusïna. Cheka iyawsañar cutiquipstat mä kawkha Laman jakenac taypinac iyawsiri tamajj utjascäna. Jupanacajj wali thurtʼatäpjjänwa, jan tʼuqhartiri, jan ojjtayañjamaraquïnwa. Take chuymampiw Tatitun camächitanacap imañ munapjjäna. Ucatjja, jupanacajj janiw cunjämats iyawsiri tamat saranucupcänti.

15. Satanasasti jachʼa chʼamanïn jakenacar amtayañataqui, take cunayman ñankhanac lurañanacapataqui, jupanacan aytat chuymanir tucuyañapataqui. Jupanacarojja, chʼaman cancañanïñ munañapataquiw yantʼäna, uqhämaraqui mayninacjjar chʼamanïñataqui kamir yänacanïñataqui, acapach oraken inamay cunanacap thakañanacapataqui. Ucanacasti jakenacan ñankhätap laycünwa.

16. Uqhäm Satanasajj jakenacan chuymanacap irpakäna jupanacan take cunayman ñankhanac lurañanacapataqui. Ucat mä jucʼa maranacaquiw jupanacajj sumancasin cusisipjjäna.

17. Ucat quimsa tunc mar kalltanjja, jakenacajj walja pachatac jaytatäpjjänwa, supayan yantʼäwinacapan apnakatäñapataqui, cawqharutejj jupajj jupanacar apnakañ muncäna, cuna ñankhtejj jupanacan lurañapatac muncäna, uca ñankh lurañanacapataqui. Ucat uca quimsa tunc maran kalltapana, jupanacajj ajjtcañ ñankha cancañan utjapjjäna.

18. Diosajj jupanacan lurañap muncän ucajj jupanacar yatichatänwa, ucat jupanacajj ucjj yatipjjänwa, ucat jupanacajj yatcasaw juch lurapjjäna; amanut Diosar kallcatapjjäna.

19. Ucaw Laconeon Laconeo yokapan urunacapan lurasïna. Laconeosti awquip lantiw uca maranjj jakenacar sarayäna.

20. Ucapachatjja, alajjpachat amuyayat jakenacaw qhitanitäpjjäna. Uc-chʼpach oraken jakenac taypin saytʼasipjjäna; kamasampiw yatichapjjäna; jakenacan juchanacapata, ñankha luräwinacapat ircatapjjäna, Tatitun jakenacapataquiw cutsuyäwipjjat jupanacar ircatapjjaraquïna; ucasti Criston jiwañat jactañapjjatänwa. Jupanacasti jupan jiwañapat tʼakhesiñanacapat kamasampiw ircatapjjäna.

21. Ucanacjjat ircatirinacataquisti walja jakenacaw sint colerasipjjäna. Colerasipcäns ucanacajja, walja jilïr taripirinacäpjjänwa, uqhämaraqui nayran jilïr sacerdotenacäpcän ucanacäpjjaraquïnwa. Jïsa, ucanacjjat ircatirinacataquiw take abogadonacajj colerasipjjäna.

22. Janiw qhiti abogados, irpirisa, jilïr sacerdotes, mä jaker jiwañapatac juchañchirejj chʼamanïcänti, juchañchañ papelan uca orakjjar sarayirin sutipamp jan kellkatäquipanjja.

23. Waljaniw uca Criston cunanacapjjat ircatirinacajj kamasamp ircatapjjäna. Taripirinacasti jupanacar catuntasin jamasat jiwayapjjäna. Uqhämat uca jaken jiwatapajj orakjjar sarayirejj jan yatiyatäcänti. Jiwatapat jaya khepaquiw juparojj yatiyapjjerïna.

24. Ucampis uca orakjjar sarayirit chʼam jan catokasin jupanacan qhitir jiwayañas janiw uca oraken leyinacaparjamäcänti.

25. Uqhämasti, Zarahemla orakenjja, taripirinac contraw parlasiñajj utjäna, uca oraken sarayiriparu, cunalaycutejj taripirinacajj Tatitun arjirinacapan jiwayatäpjjañapataquiw juchañchapjjäna. Ucasti janiw leyirjam lurascänti.

26. Ucatsti jupanacajj catuntatäpjjänwa, ucatsti taripirin nayrakatapar irpatäpjjänwa, lurapcän uca juchat taripatäñapataqui, jakenacajj ut-tʼayapcän uca leyirjama.

27. Ucatsti uca taripirinacajj walja amigonacanïnwa, wila masinacanïpjjaraquïnwa. Jïsa, niyapiniw takpach jiltʼir abogadonacamp jilïr sacerdotenacampejj mayachthapisis chicapjjäna leyiparjam taripatïrjamapcän uca taripirinacan familianacapampi.

28. Nayra nayra jakenacan churatäcän uca arsüwiruw jupanacajj purapat mantapjjäna. Supayasti uca arsüw churcän ucaruw sarayaraquïna, take asqui cancañamp nuwasiñatac arustʼañataqui.

29. Ucatsti jupanacajj Tatitun jakenacap contra nuwasiñataquiw arustʼapjjäna, mä arsüwiruw mantapjjäna ucanacar tucqhañataqui, jak jiwayapcän ucanacar asqui taripäwin amparapat antutayañataqui; taripäwisti leyiparjam niy phokhañampïscänwa.

30. Jupanacan marcapan leyinacaparu, cunatejj uca orakencatapat wactʼqui ucampiruw mays uñtayapjjäna. Jupanac puraw arsüwir mantapjjäna, uca oraken sarayiripar jiwayañataqui, mä pʼekechirir uca orakjjar ut-tʼayañanacapataqui, uca oraken jan mä antutat orakëñapataqui, antisas pʼekechirinacan uca orakjjar chʼamanïñapataqui.