1. Ucatsti uca arunac arsusinjja, Jesusajj wastat walja jakenacar uñcatäna, ucat wastat jupanacar parläna, aqhäm sasa: Chekpach chekpachaw sapjjsma: Jan taripapjjamti, jan taripatäñanacamataqui.

2. Cunalaycutejja, cuna taripäwimpitejj taripapctajja, uca quipca taripäwimpiw taripatäpjjäta. Cuna tupumpitejj tuptʼapctajja, ucampiraquiw jumanacarojj tuptʼapjjätam.

3. Cunats jilaman nayrapanquir chʼilliw uñchʼucta, quipca nayramanquir jachʼa lawat jan amuyascasinjja?

4. Cunjämarac jilamarust säta: Suytʼam; nayramat uca chʼilliw apsüma –sasa, nayraman mä jachʼa law utjquipansti?

5. Cʼari chuymani, nayrakatajja nayramanquir jachʼa law apsusim, ucat khan uñjäta jilaman nayrapat chʼilliw apsuñataqui.

6. Cunatejj kollanäqui uc jan anunacar churapjjamti, janirac munat perla kalanacams qhuchinacan nayrakatapar willcatapjjamti, cayunacapamp jan taquisiñanacapataqui, ucat cut-tanisinjja, jumanacar wiqhanokapjjañapataqui.

7. Mayisipjjam, ucat jumanacarojj churapjjätamwa; thakapjjam ucat jicjjatapjjätawa; lekʼtʼapjjam, ucat jistʼaratäpjjätawa.

8. Cunalaycutejja, take mayisirejj catokewa; thakeristi jicjjatiwa; lekʼtʼirirusti jistʼaratäniwa.

9. Jan ucajja, jumanacat qhitich wawapajj tʼantʼa maycasp ucqhajj mä kal churaspajja?

10. Jan ucajja, chawll mayispa ucqhajj mä asïr churaspajja?

11. Jumanacatejj ñankhäcasin suma churäwinac wawanacamar churañ yatipjjstajja, kawkha jucʼampsa alajjpachanquir Awquimajj jupat mayisirinacarojj asqui cunanac churanejja?

12. Uqhämasti, take cunanactejj jakenacan jumanacar lurañap munapctajja, uqhämay jumanacajj jupanacar lurapjjam, cunalaycutejj ucaw leyimpi Diosan arjirinacampejja.

13. Cʼullcʼu punc chek mantapjjam. Chhakañar irpir puncojj anchowa; thaquisti jachʼaraquiwa; waljaniraquiw ucar mantirinacajja.

14. Cunalaycutejj puncojj cʼullcʼuwa; cʼullcʼuraquiw jacañar irpir thaquejja. Jucʼaniquiraquiw ucar jicjjatirinacajja.

15. Cʼari arjirinacat amuyasipjjam. Ucanacajj jumanacan ucarojj ovej isiniw jutapjjätam, ucampis mankha tokenjja, mankʼat jiwat tiwulanacäpjjewa.

16. Achunacapat uñtʼapjjäta. Jakenacajj chʼaphinacat-ti uvas qʼichirejja, jan ucajj jichhunacatch higosjj qʼichekejja?

17. Uqhämaraquiwa, take suma kokanjja suma achunacaw achu. Jan wali kokansti, ñankha achunacaw achuraqui.

18. Janiw suma kokanjj ñankha achojj achcaspati, jan wali kokansti janiraquiw suma achojj achcaraquispati.

19. Take ñankha achu churir kokanacajj phatʼanucutawa, ninar jakontataraquiwa.

20. Uqhämasinsti, achunacapat jupanacar uñtʼapjjäta.

21. Qhitinacatejj nayar: Tata, Tata! –sapquitanejja, janiw take ucanacat alajjpach khapak marcarojj mantapcani. Jan ucasti alajjpachanquir Awquijjan munañap luririnacaw mantapjjani.

22. Waljaniw ucürunjj nayar sapjjetani: Tata, Tata, janit sutimjjar Diosan arjapcta, sutimjjar supayanacs alis-supcta, sutimjjar walja muspharcañ luräwinacs lurapcaractjja?

23. Ucapachaw nayajj jupanacar arsü: Janipiniw jumanacar uñtʼapcäyäsmati; jithektapjjet nayata, ñankha luririnaca.

24. Ucatsti qhititejj aca nayan arsüwinacajjar istʼqui ucanacsti lurcaraqui ucajja, karka patjjar utap utachir amuyun jakempiw jakthapï.

25. Jallusti purinti; llumirir umanacasti mantanipjje. Thayanacasti phustʼanipjje, uca utarusti tinc-cat-tapjje. Utasti janiw tincquiti karka patjjar ut-tʼayatätap laycu.

26. Take qhitinacatejj aca nayan arsüwinacajjar istʼapqui, ucatsti janirac ucanac lurapqui ucanacajja, chʼalla patjjar utap utachir jan amuyun jakempiw jakthapï.

27. Jallusti purinti; llumirir umanacasti mantanipjje, thayanacasti phustʼanipjje, uca utaruw tinc-cat-tapjje; utasti tincuwa, tincüwipasti jachʼaraquiwa.