1. Ucatsti, ucanac arsusinjja Jesusajj walja jakenacaruw ucanac khanañchäna. Take cunanaca, jachʼsa jiscʼsa jupanacaruw khanañchäna.

2. Saraquïnwa: Cuna kellkatanacatejj jan jumanacan utjquisa, ucanac jumanacar churañajjataquiw Awquejj camächit churitu, cunalaycutejj ucanac jutir mitanacar churañajj jupan suma amuyuparjamawa.

3. Take cunanac jupajj khanañchäna, kalltäwitpacha, jupan khapak cancañapan jutañapcama, jïsa, take cunanacatejj orakjjan lurascani, karkanacan jachʼa paramimpi umatatañapcama, oraken llawthaptañapcamasa, alajjpachanacans orakens chhaktañapcama,

4. Uca jachʼa khep khepa urucama, cunapachatejj take jakenaca, take wila masinaca, take orakenaca, take lajjranacajj Diosapan nayrakatapar saytʼapcani, luräwinacaparjam taripatäñanacapataqui, ucanacajj asquïchinisa ñankhächinisa–

5. Ucanacatejj asquïnejja, wiñay jacañ jactañaruw sarapjjani; ucanacatejj ñankhänejja, juchañchäwi jactañaruw sarapjjani; ucanacasti maysat maysancapjjewa; mayajj maysanquiwa, mayasti yakhsancaraquiwa, Cristonquir qhuyapayañaparjama, chekapäñaparjama, kollan cancañaparjama. Orakejj janïr kalltcän ucqhaw jupajj utjäna.

6. Cunanactejj Jesusajj chekpach uca jakenacar yatichcänjja, sapa patac ucanacatjja, janiw maysa aca kellkan kellkañjamäquiti.

7. Ucampisa cuntejj jupajj jakenacar yatichcänjja, ucanacat jilpachajja, Nefin tʼalpha lekʼetanacapanquiwa.

8. Aquïr cunanac nayajj kellkta. Cunanactejj jupajj jakenacar yatichcän ucanacatjja, acanacajj jucʼaquiwa. Acanac kellktwa, acanacan gentilenacat aca jakenacar wastatamp apanitäñapataqui, Jesusajj arscänsa uca arunacaparjama.

9. Waquisiniw jupanacan acanac nayrakat catokañapajja, iyawsañapar yantʼañataqui. Ucatsti acanac catokasinjja, jupanacatejj acanacar iyawsapjjanejja, ucat jucʼamp jachʼa cunanacaw jupanacar uñachayatäni.

10. Ucampis janitejj acanacar iyawsapcanejja, uca jucʼamp jachʼa cunanacajj jupanacat jarcʼatäpjjaniwa, jupanacar juchañchañataqui.

11. Jïsa, take cunanacatejj Nefin Tʼalpha Lekʼetanacapjjar kellkantatajja, take ucanac nayajj niy kellkerjamäyätwa, ucampis Tatituw jarcʼaketu aqhäm sasa: Jakenacajjan iyawsañaparuw yantʼä.

12. Uqhämasti, cunanactejj kellkañajjatac Tatitojj camächit churquit ucanacac naya Mormonajj kellkta. Jichhasti, arunacajj arsuñ tucuytwa. Cunanac kellkañajjataquitejj camächit catokctjja ucanacac kellkjjä.

13. Uqhämasti, acjj amuyañam muniristjja: Tatitojj chekpachaw uca jakenacar quimsa urojj yatichäna. Uca khepatsti jupa pachpajj walja cutiw jupanacar uñachayasïna, walja cutiw tʼantʼa pachinokäna, yakhacharaquïna, jupanacarusti laquiraquïnwa.

14. Qhitinacat-tejj nayran arsctjja, uca walja jakenacan wawanacaparuw jupajj yatichäna, qhuyapayaraquïna. Lajjranacaparuw jararäna; uca wawanacasti awquinacaparojj jachʼa muspharcañanac parlapjjäna; Jesusajj jakenacar uñachaycän ucanacat sipan jucʼamp jachʼänwa; lajjranacapsti jararänwa jupanacan parlañapataqui.

15. Ucatsti, alajjpachar maqhatatap khepat payïr cutiw jupanacar jupa pachp uñachayasisina, Awquir saratap khepata, take usutanacapar cayu cʼucʼunacapar cʼumaraptayatap khepata, juyqhunacan nayranacap jistʼaratapata, okaranacan jinchup jistʼaratapata, take cunayman cʼumaraptayañampi jupanac taypin cʼumaraptayatapata, mä jaker jiwatat sartayatapata, chʼamap jupanacar uñachayatap khepata, Awquir maqhatatap khepatsa,

16. Ucatsti, uca khepärmanthejja walja jakenacaw mayachthapisipjjäna; ucatsti, uca wawanacaruw uñjapjjäna istʼapjjaraquïna; jïsa, asu wawanacas lacanacap jistʼarapjjäna, ucat muspharcañanac arsupjjäna. Cunanactejj arsupcän ucanacajja, jarcʼatänwa, jan qhitins ucanac kellkañapataqui.

17. Ucatsti, ucapachat ucsaruw Jesusan ajllit yatekerinacajj bautisañ yatichañ kalltapjjäna, take qhitinacatejj jupanacar jutapcän ucanacaru. Take qhitinacatejj Jesusan sutipjjar bautisatäpcän ucanacajja, Kollan Ajayun phoktʼatäpjjänwa.

18. Jupanacat waljaniw jan arscay cunanac uñjapjjäna, istʼapjjaraquïna; ucanacasti leyirjamaw jan kellkatäquiti.

19. Jupanac puraw yatichasipjjäna, yatiyasipjjaraquïna. Take cunaw takenincäna. Sapakat maynisti masiparuw asc lurapjjäna maynit mayniru.

20. Ucatsti, cunjämatejj Cristojj lurapjjañapatac camächit churcän uqhäm take cunanac lurapjjäna.

21. Jesusan sutipjjar bautisatäpcän ucanacajja, Criston iyawsir tamap satäpjjänwa.