1. Ucat jakenac taypin mä jaljtäwiw utjäna; Nefejj jupanac taypin saytʼascän ucqhajja, jupanacajj ucsar acsar jaljtasaw jupar sapac jaytasin saranucupjjäna.

2. Ucat Tatitojj jupar uñastʼaycän ucanacat lupʼisaw Nefejj quipca utap toker saräna.

3. Ucat jupajj uqhäm lupʼiscän ucqhajja –Nefi jakenacan ñankhätapat jamas chʼamac luräwinacapata, jiwayäwinacapata, lunthatjäwinacapata, take cunayman ñankha luräwinacapat llaquisisa – ucat uqhäm chuymapan lupʼiscän ucqhajja, mä aruw aqhäm sas jupar purïna:

4. Nefi, luratanacamat qhuyapayatätawa. Nayan jumar churat arjja jan karis aca marcar yatiyatam nayajj uñjta. Jumajj janiw jupanacat ajjsarctati, janiraquiw quipca jacäwim muncaractati, antisas nayan munañajjaru, camächitanacajjaruw phokhañ muntajja.

5. Jichhasti, uca jan karis luratamat wiñayaw bendicïma; aruna, lurañana, iyawsäwina, luräwin jachʼaptayäma. Take cunaw juman arumarjam jumatac luratäni, cunalaycutejj nayan jan munañajjarjamajj janiw jumajj cuns mayquitätati.

6. Jumajj Nefïtawa, nayasti Diosätwa. Nayajj alajjpach qhitanacajj nayrakatan jumar sisma: Jumawjj aca marcjjarojj chʼamanïyäta. Jumaw aca marcan ñankhätaparjamajj aca orakerojj machʼampi, jachʼa usunacampi tucqhäwimp jawkʼjam jawkʼantäta.

7. Nayajj jumaruw chʼam chursma; cuntejj jumajj acapachan lluchʼintcät ucajja, alajjpachan lluchʼintatäniwa; cuntejj jumajj acapachan antutaycät ucajja, alajjpachan antutayatäniwa. Uqhämaw jumajj aca jakenac taypin chʼamanïyäta.

8. Ucat jumatejj aca kollan utar payar jaljtam sätajja, lurasiniwa.

9. Jumatejj aca kollur qhusqhachasim sätajja, lurasiniwa.

10. Uqhämaraqui, jumatejj Diosan aca marcar jawkʼantañapatac arsütajja, lurasiraquiniwa.

11. Jichhasti, sarasin aca marcar aqhäm sañamataquiw jumar camächit chursma: Aqhäm siw Take Chʼamanïqui uca Dios Tatitojja: Janitejj juchanacamat cutiquipstapcätajja, tucqhäwcamaw jawkʼantatäpjjäta.

12. Jichhajja, Tatitojj uca arunac Nefir arscän ucqhajja, Nefejj cutekasaw quipca utapar jan sarcänti; jan ucasti, uca oraken chʼekentat walja jakenacar cut-tasaw cuntejj Tatitojj jupanacan tʼunjasiñapat parlcän uca arunac yatiyañ kalltäna, janitejj cutiquipstapcasp uca.

13. Jichhajja, Nefin jilïr taripirin jiwäwipat yatiyasin jachʼa milagro utjquipansa, jupanacajj chuymanacaparuw chʼollkheptayapjjäna, ucatsti janiw Tatitun arunacapar yäkapcänti.

14. Ucat Nefejj Tatitun arup aqhäm sasaw jupanacar yatiyäna: Janitejj juchanacamat cutiquipstapcätajja, aqhäm siw Tatitojja: Tucqhäwcamaw jawkʼatäpjjäta.

15. Ucat Nefejj ar jupanacar yatiycän ucqhajja, chuymanacap chʼollkheptayasipcaquïnwa, arunacaparusti janiw yäkapcänti; ucat jupanacajj jupat ñankha parlasaw carcelar jakontañatac jupar catjañ munapjjäna.

16. Ucampis Diosan chʼamapajj jupampïnwa, jupanacasti janiw jupar catjasin carcelar jakontirjamäpcänti, cunalaycutejj jupajj Ajayun aptatäsaw jupanac taypit apsutäna.

17. Ucat uqhäm jupajj jakenac tamat jakenac tamar Diosan arup yatiyasaw Ajayump saräna, takenir yatiyañapcama, jan ucajj takpachan taypir apayañapcama.

18. Ucat jupanacajj janiw arunacapar yäkapcänti, uqhämaraqui chʼajjwäwinacas utjañ kalltäna; jupanacasti jaljtasin espadamp jupanac purajj jiwayasiñ kalltapjjäna.

19. Uqhäm taripirinacan Nefi jakenacjjar sarayäwipan pakallk tunc mayan marajj sarakjjasin tucusïna.