1. Uqhämaw jaken wawanacapan chuymanacapan cʼarisirïtapa, asquin jan thurtʼatätap uñjtan. Tatitun jachʼa jan wati sumätap jupar alcatirinacar qhuyapayatap uñjaractan.

2. Jïsa, jiwasajj uñjsnawa, jupajj marcapar jachʼaptayqui, yapupan juyranacap uywa tamanacapa, kollkepa, koripa, take cunayman casta cʼajquir yänacamp amparamp luratanac irjjatayqui ucapachajja, jacäwinacap imqui timanacapan amparanacapat jupanacar khespiyqui, timanacapan chuymanacap llampʼuptayqui jupanacamp jan nuwasiñanacapataqui, chekpach take cunan marcapan waliquïñapatac cusisiñapatac lurqui; jïsa, ucapachaw jupanacajj chuymanacap chʼollkheptayasin luräwinacar jan asquiptayapcänti. Dios Tatitupat armasipqui, Kollanäqui ucar taquisipqui ucqhajja –ucasti take cunan phoktʼatätap laycu, jachʼaptäwip laycuraquiwa.

3. Ucat janitejj Tatitojj marcapar walja tʼakhesïwinacamp mutuyqui, jïsa, janitejj jiwañamp ajjsarcañamp machʼamp take cunayman jachʼa usump jupanacar sartʼquejja, jupanacajj janiw jupat amtasipcaniti. Uqhäm jiwasajj uñjtan.

4. Ay jaken wawanacapajj wali jan amuyunïpjjewa, jila jila tucurïpjjewa, supayjam ñankhäpjjewa, ñankha lurañataquejj mäquïpjjewa, asc lurañataquisti cʼachhaquïpjjewa! Jïsa, jupanacajj ñankhäqui ucan arunacapar istʼañataquejj lakäpjjewa; oraken jila jila tucur cunaymananacat chuymanacapan munasin lupʼiñataquejj wali lakäpjjewa!

5. Jïsa, jupanacajj jachʼa jachʼa tucuñataquejj lakäpjjewa; nayajj jachʼa jakët sañataqui, cunatejj ñankhäqui take uc lurañataquejj jancʼäpjjewa! Dios Tatitupat amtasiñataqui, jupan ewjjanacapar istʼasin yäkañataquisti, cʼachhaquïpjjewa; jupanacajj suma amuyun thaquipan sarnakañataquejj cʼachhäpjjewa!

6. Jupanacar lurqui uca Dios Tatitupan jupanacjjar sarayañapjj janiw munapquiti. Jupan jachʼa sumätapampis jupanacar qhuyapayatapampisa, jupan ewjjanacapajj jan cunäcaspas uqhäm amuyasin jupanacar irpirïtap jan munapquiti.

7. Jaken wawanacapan jan cunätapajja, cunja jachʼasa! Jupanacajj orak lakʼat sipan jan cunäpjjewa.

8. Cunalaycutejj orak lakʼajj acsar ucsar payar jaljañapcamaw jachʼa wiñay Diosasan camächitapan onjjti.

9. Jïsa, jupan arupat jiscʼa kollunacamp jachʼa kollunacampejj lakhakesaw qhathat-tapjje.

10. Jupan arupan chʼamapïpan ucanacajj tʼunjatäsin qhusqhachatäpjje; jïsa, mä valljamaw qhusqhachatäpjje.

11. Jïsa, jupan arupan chʼamapampejj takpach orakew qhathat-ti.

12. Jïsa, jupan arupan chʼamapan takananacajj chuymatpach onjjti.

13. Jupatejj oraker –Jit-tam –saspajja, jit-taspawa.

14. Jupatejj oraker –Khepar cut-tam –saspajja, urun walja horanïñapataquejja, ucajj lurasispawa.

15. Ucat aruparjamaw orakejj khepar cut-ti, jakenacasti intejj saytʼcaspas uqhäm amuyasipjje; jïsa, ucajj chekawa, cunalaycutejj chekpachaw inti lant orakejj muyu.

16. Uqhämaraqui, jupatejj jachʼa pʼiya umanacar saspajja: Wañsupjjam –sasajja, ucajj lurasispawa.

17. Jupatejj aca kollur saspajja –Saram, uca marcjjar sarasin alljjat-tam ucan imantatäñapataqui –sasajja, ucajj lurasispawa.

18. Ucat mä jaketejj jila alan mä cuns oraker imantasispajja, ucat Tatitojj saspajja –Imantqui ucan ñankhätap laycojj ñankhachatäpan uca imatajja –saspa ucajja, ucajj ñankhachatäniwa.

19. Tatitutejj saspajja –Jan qhitin jumar jichhat ucsar wiñayatac catjañapatac ñankhachatätawa –ucapachat ucsarojj janiw qhitis wiñayatac ucjj catjcaniti.

20. Tatitutejj mä jakerojj sanejja –Ñankha luräwinacamat wiñayatac ñankhachatäyätawa –sasajja, ucajj lurasiniwa.

21. Tatitutejj sanejja: –Ñankha luräwinacamat naya nayrakat jarcʼakatäyätawa –sasajja, jupajj uqhäm lurayani.

22. Qhitirutejj uc siscan ay jupata! Cunalaycutejj jan khespiyascasp uca ñankha luririrojj uqhäm sani; ucat jakenacan khespiyasiñanacapatac juchanacapat cutiquipstañajj yatiyatäna.

23. Ucat qhitinacatejj juchat cutiquipstasin Dios Tatitupan arupar istʼasin yäkapcan ucanacajja, qhuyapayatäniwa; ucanacaw khespiyasipcan ucanacajja.

24. Jakenacan luratanacaparjam asquit asquiru cut-tayatäñanacapataqui juchanacapat cutiquipstañar asc lurañaru irpanitäñap Diosajj jachʼa phokhatapan antutpan.

25. Nayajj takpach jakenacan khespiyasiñap munirista. Ucampis leetanwa, jachʼa khep khepa urun yakhepanacajj jakonucutäpjjani, jïsa, Tatit nayrakatat jakonucutäpjjaniwa.

26. Jupanacajj wiñay tʼakhesir utjäwiruw qhitatäpjjani, aqhäm sir arunac phokhasa: Asc lurapcän ucanacajja, wiñay jacäwinïpjjaniwa; ñankh lurapcän ucanacasti wiñay juchañchäwinïpjjaniwa. Uqhämawa. Uqhamäpan.