1. Ucat taripirinacan sarayäwipan pusi tunc payan marana, Moronian Nefi jakenacamp Laman jakenacamp sumancañ wastat ut-tʼayatapatjja, janiw qhitis taripäw konuñ catuñatac utjcänti. Ucat qhitin uc catuñapat jakenac taypin chʼajjwäwiw wastat utjañ kalltäna.

2. Ucat Helamanan Helaman yokapajj jakenacan arupan taripäw konuñ catuñatac ut-tʼayatänwa.

3. Ucampis Pahoranar jiwaycän uca Quiscumenajj Helamanar jiwtʼayañataquiw suyaraquïna; jupasti jan qhitis ñankha luräwip yatiñapatac arsüwir mantir taman arjjatatänwa.

4. Walja arunacampi uqhämaraqui jamas jiwayäw lurañatac yatïwipan wali yatsut Gadianton sat mä jakew utjäna, ucat jupajj Quiscumenan tamapataquiw jilïrir tucüna.

5. Ucat jupajj jupanacampir Quiscumenampiruw arunacapamp sumancayi: Jumanacatejj nayar taripäw konuñan uchapjjetätajja, nayajj aca tamajjanquirinacaruw jakenac taypin chʼaman sarayäwir uchapjjäma –sasa. Ucat Quiscumenajj Helamanar tucqhañ munäna.

6. Ucat jupajj taripäw konuñ toker Helamanar jiwayañatac sarcän ucqhajja, Helamanan mä lokeripaw arumanjam yakhat isit mistutayna, uca taman Helamanar jiwayañatac amtat arustʼäwi sallkjañamp yatjjatatayna.

7. Ucat jupajj Quiscumenamp jiquisisajj mä unañch jupar uñachtʼayäna; ucat Quiscumenajj jupar munäwip yatiyäna, taripäw konuñar Helamanar jiwayañatac jupan jupar irpañap munasa.

8. Ucat Helaman lokeripajj Quiscumenan chuymap kʼal uñtʼcän ucqhajja, jupan jiwayañ munañap yatjjatasina, uqhämaraqui take tamapanquirinacan jiwayaña, lunthataña, jakenacjjar chʼamanïñ munañap yatjjatäna, (ucasti jamas arustʼapa mayachasïwipänwa) Helamanan lokeripajj Quiscumenaruw säna: Taripäw konuñar sarañäni.

9. Ucasti jupan munañap phokhcaspas uqhäm amuyasitap laycojja, wal cusisiyän Quiscumenarojja; ucampis jupanacajj taripäw konuñar sarasipcän uc-chañcamaw Helamanan lokeripajj Quiscumenar chuymat jununtäna. Quiscumenasti jan aruniw jiwäna. Ucat uca lokerejj Helamanan uc jalasaw take cuntejj istʼcäna, uñjcäna, lurcän ucanac jupar yatiyäna.

10. Ucat Helamanajj uca lunthatanacaru, jamasat jiwayirinac tamar catjiriw qhitäna, jupanacan leyiparjam jiwayatäñapataqui.

11. Ucampis Gadiantonajj Quiscumenan jan cut-tatap uñjasinjja, jupan tucqhatäñapat ajjsaräna; ucat uca tamar arctayäna. Jupanacasti uca oraket jamas thaquinjam wasarar jaltjjapjjäna; ucat Helamanajj jupanacar catjir qhitcän ucqhajja, janiw jupanacajj cawqhans jicjjatañjamäcänti.

12. Uca Gadiantonatsti kheparojj jucʼamp parlasini. Uqhäm taripirinacan Nefi jakenacjjar pusi tunc payan marajj sarakasin tucusïna.

13. Uqhämaraqui aca kellkatan tucuyäwiparojja, uca Gadiantonan aynachtʼañ toker apatap uñjapjjäta, jïsa, Nefi jakenacar niyapun kʼal tucqhäwir puriyatap uñjapjjaraquïta.

14. Janiw nayajj Helamanan kellkatapan tucuyäwipanquiw siscti, jan ucasti, cuntejj kellkcta, takpach uca sarnakäwinac ucat apscta uca Nefin kellkatapan tucuyäwipanquiwa –sistwa.