1. Ucat taripirinacan sarayäwipan sojjta tunc payan mara tucuyäwip nayrakataw take ucanacajj lurasïna. Laman jakenacat jilpachaw asqui marcar tucupjjaraquitayna. Jupanacan asquïtapajj Nefi jakenacan asquïtapat sipan jucʼampïnwa, iyawsäwin chʼollkhe thurtʼatäpjjatap laycu.

2. Walja Nefi jakenacaraquiw chuymanacap kalarayasisin juchanacapar jan cutiquipstirir tucusinarac wali ñankhar tucupjjäna, jupanacasti Diosan arupamp take jupanacar purit yatiyäwinacamp jutir urunacat yatiyäwinacamp janiw catokapcänti.

3. Ucampis iglesianquir jakenacajj Laman jakenacan Diosar cutiquipstatapat wal cusisipjjäna. Diosan jupanac taypir ut-tʼayat iglesiapats cusisipjjaraquïnwa. Jupanac purajj jila purjamaw uñjasipjjäna, purapat cusisisaw jachʼa cusisiñanïpjjäna.

4. Ucatsti walja Laman jakenacajj Zarahemla oraker jutasaw Diosar cutiquipstatapan cunjamätapat Nefi jakenacar yatiyapjjäna; iyawsañatac juchanacapat cutiquipstañataquiw jupanacar ewjjapjjaraquïna.

5. Waljaniw wali jachʼa chʼamampi chʼaman cancañampejj yatiyapjjäna, waljanir llampʼu chuymanïñar puriyasa, Diosaru Corderoru llampʼu chuymamp arquirïñanacapataqui.

6. Ucat walja Laman jakenacaw alay toke oraker sarapjjäna, uqhämaraqui Nefimp Lehimpejj jakenacar yatiyirejj alay toke oraker sarapjjaraquïna. Uqhämaw sojjta tunca quimsan marajj tucusïna.

7. Ucat takpach uca oraken sumancañaw utjäna, Nefi jakenacasti cawqharus Nefi jakenac taypirus Laman jakenac taypirusa uca oraken munañaparjamajj sarasipcaquïnwa.

8. Ucat Laman jakenacajj Laman jakenac taypirus Nefi jakenac taypirus munañaparjamaw sarasipcaquiraquïna; uqhäm alaquipasïñataqui, munañaparjam kamiriptañapataquis purapat tumpasisaw catokasipjjäna.

9. Ucat Laman jakenacamp Nefi jakenacampejj wali kamiriw tucupjjäna; jupanacansti walja walja korisa kollkesa, take cunayman suma metalanacaw utjäna, aynach toke orakens alay toke orakensa.

10. Ucat aynach toke orakejj Lehi satänwa, alay toke orakesti Sedeciasan Mulec sat yokapat Mulec sataraquïnwa; cunalaycutejj Tatitojj Mulecarojj alay toke orakeruw irpäna, Lehirojj aynach toke orakeruw irparaquïna.

11. Ucat uca paypach orakenacanjja cunayman korimpi kollkempi take casta metalan kalanacampiw utjäna; uqhämaraqui wali suma amuyun jakenacajj utjasinjja, cunayman metal kalanac jupanacajj umatatayapjjäna; ucat kamiriptapjjäna.

12. Jupanacasti yarananac alay tokens aynach tokens walpin phawapjjaraquïna; uca alay toke orakens aynach toke orakens wal jachʼaptapjjäna. Jupanacasti miratatasin uca orakenjj wali chʼamanir tucupjjäna. Jupanacajj walja uywa tamanacamp chʼaman uywanacamp awatipjjaraquïna.

13. Jupanacan warminacapajj trabajapjjänwa kapupjjaraquïnwa. Take cunayman sawutanac munataparjam lurasipcaquiraquïna; uqhäm alaquipasiñataqui, munañaparjam sawusaw ñutʼu lienzonaca take casta telanac kʼara janchinacapar imjjatañatac lurapjjäna. Uqhäm sojjta tunca pusin marajj sumancañamp tucusïna.

14. Ucat sojjta tunc pheskan maranjja, wali jachʼa cusisiñamp sumancañampiw jupanac taypin utjäna. Jïsa, jutcan ucat walja yatiyäwinacamp walja yatichañampiw utjäna. Uqhämaw sojjta tunca pheskan marajj sarakjjäna.

15. Ucat taripirinacan sarayäwipan sojjta tunc sojjtan maranjja, Cezoramajj taripäw konuñan koncän ucqhajja, mä jan uñtʼatan jiwayatänwa. Ucat uca pachpa maranjja jupan yokapaw jakenacan jupa lant ut-tʼayatäsinjja, jiwayataraquïna. Uqhäm sojjta tunc sojjtan marajj sarakasin tucusïna.

16. Ucat sojjta tunc pakallkon mara kalltäwinjja, jakenacajj wali ñankharuw wastat tucuñ kalltapjjäna.

17. Tatitun jupanacar wali jay oraken kamiriptañanacapamp qhuyapayatap laycuw jupanacajj jan colerasiñampi nuwasiñampi wil wartañamp amtayatäpcänti. Ucat chuymanacapan uca kamiriptañanacapat lupʼisaw ucanac munapjjäna. Jupanacajj maynit sipan jucʼamp jachʼar aytatäñapataquiw kamiriptañ munañ kalltapjjäna; ucat jupanacajj jamasat jiwayañanaca, lunthataña, lunthatjañ kalltapjjäna, kamiriptañataqui.

18. Jichhajja, uca jiwayirinacamp lunthatjirinacampejj Quiscumenan Gadiantonan ut-tʼayat mä tamäpjjänwa. Ucatsti Nefi jakenac taypinsa, Gadiantonan walja tamapanquirinacaw utjäna. Ucampis jucʼamp ñankha Laman jakenac taypina, jucʼampiw utjäna; jupanacasti Gadiantonan jiwayirinacapamp lunthatanacapampi –satäpjjänwa.

19. Jupanacaw Cezoram jilïr taripirir jupan yokaparus taripäw konuñan jiwayapcän ucanacajja. Janiraquiw jupanacajj catjatäpcaraquïnti.

20. Ucat Laman jakenacajj lunthatanacan jupanac taypin utjatap yatjjatapcän ucqhajja, walpin llaquisipjjäna; jupanacasti take chʼamanacapampiw jupanacar uc-chʼpach orakjjat tucqhañ chʼamtʼapjjäna.

21. Ucampis Satanasajj Nefi jakenacat jilpachaniruw chuymanacapar amtayäna; ucat ucanacajj uca lunthat tamanacamp mayachasisaw arsüwinacapamp juräwinacapamp lurapjjäna, jupanac pur cuna chʼama jicjjatasïwir puripcaspa ucqhan arjjatasis imañanacapataqui, jiwayäwinacapata lunthatjäwinacapata lunthatäwinacapat jan tʼakhesiñanacapataqui.

22. Jupanacansti uñachtʼayäwinacapas jamas uñachtʼayäwinacapas jamas arunacapas utjänwa. Ucasti arsüwir mantat jilanacar uñtʼañanacapataquïnwa; cuna ñankha luräwinactejj jilanacapajj lurapcaspa ucanac utjc-chispasa, jilanacapan uca arsüwir mantat tamapanquirinacan ñankha jupanacar jan lurañanacapataquïnwa.

23. Uqhäm jupanacajj jiwayaña, lunthatjaña, lunthataña, wachokaña, kʼañusiña, take cunayman ñankha luräwinaca, marcap contra, Diosapan leyinacap contraraquiw lurapjjañapäna.

24. Ucat qhitinacatejj yakha jakenacar ñankha ajjtcañ luräwinacapat uñstaycaspajja, jupajj taripatäñapänwa. Janiw jupajj marcapan leyinacaparjam taripatäñapäcänti, antisas Gadiantonan Quiscumenan churat ñankhätapan leyinacaparjam taripatäñapänwa.

25. Jichhajja, acaw jamas arsüwinacampit juräwinacampit Almajj aqhäm sas yokapar camächit churcän ucajja: Ucanacajj orakenquirinacar janiw sarañapäquiti, jakenacar tʼunjäwir jan puriyañapataqui.

26. Helamanar catuyatäcän uca kellkatanacat uca jamas juräwinacamp arsüwinacampejj janiw Gadiantonar purcänti. Antisas ucanacajj nayrïr awquisampir taycasampir jarcʼat achut mankʼañatac amtaycän uca pachpan Gadiantonan chuymapar uscutänwa.

27. Abel jilamar jiwayätajja, ucajj janiw oraken yatitäcaniti –sasin Cainamp arustʼcän uca pachparaquiwa. Jupasti Cainamp arquirinacapamp ucapachat ucsaruw arustʼäna.

28. Uqhämaraqui alajjpachar puriñataquïcaspas uqhäm uc-chʼa jachʼa pucara lurañatac jakenacan chuymanacapar uchcän uca pachparaquiwa. Uca pucarat aca oraker jutapcän uca jakenacar asquit irpakcänjja, uca pachparaquiwa; jupasti chʼamac ajjtcañ luräwinac ac-chʼpach orakjjar chʼekentayäna, jakenacar kʼala tucqhañar wiñay mankhapachar puriyañapcama.

29. Uca pachpasti Gadiantonan chuymaparuw chʼamac luräwinaca jamasat jiwayañanac amtayäna; jupasti jakenacan kalltäwipat jichhacamaw uc sarayaraqui.

30. Jupasti take juch lurañ kalltayqui ucawa. Jupasti chʼamac lurañanacap jamasat jiwayañanac sarayasa, arustʼanacapa, arsüwinacapa, juräwinacapa, ajjsarcañ ñankha luräwinacat arustʼanacaps mitat mitaru jaken wawanacapan chuymanacapar mantcaspajj ucarjamaw churi.

31. Jichhajja, jupajj Nefi jakenacan chuymanacapan wal utjäna, jupanacan sinti ñankhar tucuñapcama. Jupanacat jilpachajj asqui thaquit saranucusina, Diosan camächitanacapar tʼustʼjasa, quipca munañanacaparjam lurasaw koripat kollkepat wacʼa diosanac lurapjjäna.

32. Ucat take uca ñankha luräwinacajj jucʼa maranacan jupanacarojj purïna. Jilpach ucanacatjja, taripirinacan Nefi jakenacjjar sarayäwipan sojjta tunca pakallkon maran jupanacar purïna.

33. Jupanacasti sojjta tunc quimsakallkon maranjja, asquijakenacar wal llaquisiyasa, jaqhusiyasaraquiw ñankha luräwinacapan jiltapjjäna.

34. Ucat Nefi jakenacan jan iyawsas tʼuqhartañ kalltasin ñankha ajjtcañ luräwinacan jiltañ kalltatapjj uñjtanjja, uc-chañcamaraquiw Laman jakenacan Diosapat yatïwin walpin jilañ kalltatap uñjtan. Uca Laman jakenacasti jupan leyinacapar camächitanacapar phokhañ kalltasaw jupa nayrakatan chekan sum sarnakañ kalltapjjäna.

35. Uqhämat Tatitun Ajayupan, Nefi jakenacat chuymanacapan ñankhätap chʼollkhëtap laycojj jithektañ kalltatap uñjaractan.

36. Uqhämaraqui Laman jakenacan Tatitun arunacapar iyawsañ lak munatap laycuw jupan Ajayup jupanacjjar wartatap uñjtan.

37. Ucat Laman jakenacajj Gadiantonan lunthat tamap thakapjjäna; jupanacasti Diosan arup jupanacat jucʼamp ñankhanacar yatiyapjjäna, uca lunthat taman Laman jakenac taypin kʼala tucqhatäñapcama.

38. Ucat maysäjjansti, Nefi jakenacajj jupanacaruw yanapapjjäna, jachʼaptayapjjaraquïna, jupanacat jucʼamp ñankhanacamp kalltasa, take Nefi jakenacan orakenacapan ucanacan chʼekentañapcama, asquinacat jilpachar irpakañapcama, luräwinacapar iyawsañapataqui, luräwinacapat catokañapataqui, jamas jiwayäwinacapan arustʼäwinacapan jupanacamp mayachasiñapataqui.

39. Uqhäm jupanacajj take gobierno sarayäwjja catokasa, pobrenacaru, llampʼunacaru, Diosar llampʼu chuyman arquirinacapar tʼustʼjasa, jawkʼasa, tucqhasaw jupanacat mays uñtapjjäna.

40. Ucat jupanacan ajjsarcañ utjäwincatapa, wiñay tucqhäwitac pokoscatap uñjtan.

41. Ucat taripirinacan Nefi jakenacjjar sarayäwipan sojjta tunc quimsakallkon maraw uqhäm sarakasajj tucusïna.