1. Ucat Almajj uca arunac arscän uca khepatjja, jupanacajj mä sap Diosar uca arsut achut catokapjjañapatac iyawsañats jan iyawsañats yatiñataquiw jupar qhitapjjäna. Uqhämaraqui uca jatha, jan ucajj chuymanacaman satatäñapaw sas arsut arojj, cunjäms jupanacan satapjjañapas uc yatiñ munapjjaraquïna. Iyawsäwiparjamajj cunjäm lurañtejj kalltapjjañapäc uc yatiñ munapjjaraquïna.

2. Ucat Almajj jupanacarojj säna: Jumanacajj sinagoganacajjat alisnucutäsajj janiw Diosajjar yupaychapquirist-ti sapjjtawa. Ucampis nayajj sapjjsmawa: Diosar jan yupaychirjam amuyasipjjstajja, wal pantasipjjtajja, kellkatanacan thakapjjañamaraquiwa. Kellkatanacas uc yatichapquiristams uqhäm amuyasipjjstajja, janiw ucanac sum amuyapctati.

3. Zenos sata nayrapach arjirejj Diosat mayisiñampit yupaychañampit siscän uca leet amtasipjjtati?

4. Jupajj siwa: Diosay qhuyapayirïtawa, nayajj chʼusa wasarancäyät ucqhajj mayisïwijjar istʼistawa. Nayajj timanacajjatac mayisct ucqhajja, nayar qhuyapayasaw ucanacarojj nayamp sumancaytajja.

5. Diosay, yapujjan jumar artʼascäyäsm ucqhajja, qhuyapayistawa. Nayajj mayisis artʼascsma ucqhajja, istʼistawa.

6. Uqhämaraqui, nayajj utajjancäyät ucqhajja, mayisïwijjar istʼaractawa.

7. Uta mankhajjanc-cäyät ucqhajj Tatay, nay jumat mayisquipan istʼista.

8. Wawanacamajj juman istʼatäñatac jakenacan istʼatäñ lanti artʼasipcätam ucqhajja, jumajj jupanacar qhuyapayasajj istʼätawa.

9. Diosay nayar qhuyapayasaw, tama jakenacam taypin mayisïwinacajjar istʼista.

10. Uqhämaraqui timanacajjan nay alisnucutïpan, uñisitïpan, jumajj istʼaraquista. Jumajj mayisïwinacajjar istʼasaw, timanacajjataquejj colerasta. Colerasiñamampisti mäc tʼunjañampiw sart-tajja.

11. Jumasti nayan tʼakhesitajj cheka munatajj laycuw istʼista. Yokam laycuw uqhäm nayar qhuyapayista. Ucat take tʼakhesïwinacajjanjj jumar artʼasïma, cunalaycutejj juman cusisiñajjajj utji. Jumajj Yokam laycuw taripäwinacamarojj nayat maysar uñtayta.

12. Ucat Almajj jupanacar säna: Nayrapach jakenacan kellkat kellkatanacar iyawsapjjtati?

13. Uc iyawsapjjstajja, Zenosajj arscän uc iyawsapjjañamawa. Jupajj sänwa: Jumajj Yokam laycuw taripäwinacamar maysar uñtayta.

14. Jichhajja, jilanaca, nayajj jisctʼapjjsmawa: Kellkatanac leepjjtati? Ucanactejj leepjjstajja, cunjämarac Diosan Yokapat pächasipjjtasti?

15. Janiw Zenosan sapaqui ucanacat parlatapajj kellkatäquiti. Jan ucasti, Zenocajj ucanacat parlaraquïnwa.

16. Jupajj sänwa: Jumajj Tatay, aca jakenacataquiw colerasta, jupanacan Yokam layc jupanacar churat qhuyapayäwinacam jan amuyatap laycu.

17. Jichhajja, jilanaca, mä yakha nayrapach arjirin Diosan Yokapat ircatatap uñjapjjtan. Jupan arunacapa jan amuyatap laycuw jakenacajj jupar kalanacamp cʼuphas jiwayapjjäna.

18. Ucampis ucajj janiw takpachäquiti. Janiw jupanacaquit Diosan Yokapat parlapqui.

19. Jupat Moisesajj parläna, uqhämaraqui chʼusa wasaranjj mä jupar uñtataw aytatäna, qhititejj ucar uñtcän ucan jacañapataqui. Ucatsti waljaniw uñtasajj jacapjjäna.

20. Ucampis chʼollkhe chuymanacap laycojja, jucʼaniquiw ucanacan camsañ munataps amuyapjjäna. Waljaniw chuymanacapan sinti chʼollkhëtap laycojj jan uñtañ munapcänti; ucat tucusipjjäna. Jichhajja, jupanacan jan uñtañ munatapajja, jupanacar kollañap jan iyawsatap laycünwa.

21. Jilanaca, jumanacatejj nayranacamamp kollayasiñatac uñtañamp kollasipjjasmajja, janit mäc uñtapcasma? Jan ucajja, chuymanacam jan iyawsañar chʼollkheptayas jayrasipjjasmati, nayranacamamp jan uñtas tucusiñanacamataqui?

22. Uqhäm lurapjjasmajja, ay jumanacata; ucampis jan uqhämäcanejja, nayranacamamp uñtapjjam. Diosan Yokapar iyawsañ jichhat ucsarojj kalltapjjam. Jupan jakenacapar cutsuyañatac jutañaparu, jupanacan juchanacapan tʼakhesiyäwinacapar phokhasajj tʼakhesis jiwañapar iyawsapjjam. Jupan jactäw ut-tʼayañataqui, take jakenacan jupa nayrakatan luräwinacaparjam khepa taripäw urun taripatäñapataqui jiwat jactäwipar iyawsapjjaraquim.

23. Jichhajja, jilanaca, uca aru chuymanacaman satapjjañam munta. Ucajj pʼusutatañ kalltcan ucqhajja, iyawsañamamp ucar khechʼapjjam; ucasti jumanacanjj wiñay jacäwir jilir aliruw tucuni. Ucapachasti Diosajj Yokapan cusisiñap toket kʼepjam llaquinacamar sujaptaypan. Munapjjätajja, takpach ucanacjj lurapjjasmawa. Uqhämäpan.