1. Jichhajja, wawajja, nayajj jucʼamp arsuñ munsma. Nayajj amuyuman jiwatanacan jactäwipat llaquisitap amuyta.

2. Nayajj jumaruw sisma: Janiw jactäwejj utjquiti, jan ucajja, nayajj yakha arunacamp siristjja, aca jiwir janchejj jan jiwquir janchiruw jan tucquiti, aca thujsantañ cancañajj janiraquiw jan thujsantañ cancañar tuc-caniti, Criston jutañap khepacamajja.

3. Jupajj jiwatanacan jactäwiparuw ut-tʼayani. Ucampis wawajja, jactäwejj janïraw utjquiti. Jichhajj jan mä amuyat khanañchäma, ucampis Diosat walja jan amuyat cunanacjj Diosaquiw yati. Ucampis nayajj jan karjasis yatiñajjatac Diosat mayiscta uc uñachtʼayäma, ucasti jactäwitawa.

4. Takenin jiwatat cut-tañapataquiw mä pachajj ut-tʼayata. Jichhajja ucapachan cunapach puriñapjja janiw qhitis yatquiti; ucampis Diosaw uca ut-tʼayat pachjj yati.

5. Jichhasti, mä pachana, pä pachana, quimsa pachans jakenacan jiwatat jactañapatac utjañapat jan utjañapat yatiñajj janiw waquisquiti; Diosaw take ucanacjj yati. Nayataquejja, takenin jiwatat jactañapatac ut-tʼayat pachan utjañap yatiñajj waliwa.

6. Jichhajja, jiwañ pachat jactañ pachacamajja, mä jaljan utjañapawa.

7. Jichhajj nayajj jisctʼiristwa, jakenacan ajayunacapar uca jiwañ pachat uca ut-tʼayat jactäw pacharojj cunas camächani?

8. Jichhajja, ut-tʼayat pachan mayat jucʼamp utjañapat jan utjañapat yatiñajj janiw waquisquiti. Janiw takenejj mayac jiwapquiti, ucasti waliquiraquiwa. Takpachajj mä urücaspas uqhämaw Diosataqui, pachasti jakenacataquiquiw jaqhuta.

9. Ucat jakenacan jiwatat jactañapataquiw mä pachajj ut-tʼayata. Uqhämaraqui jiwañ pachat jactäw pachacamajj mä jaljaw utji. Jichhajja, uca jaljatjja, cunataquitejj nayajj Tatitut yatiñatac wal mayiscta, ucajj jakenacan ajayunacapar camächañat yatiñawa.

10. Cunapachatejj takenin jactapjjañapatac urojj jutcan ucapachajja, jakenacatac take ut-tʼayat pachanac Diosan yatitap jupanacajj yatipjjani.

11. Jichhajja, ajayun jiwañat jactäwcam utjäwipatjja, alajjpach qhitan aqhäm yatiyatätwa. Take jakenacan ajayunacapajj aca jiwir janchit mistupcan ucspachawa, jïsa, asquis ñankhas takenin ajayunacapajj qhititejj jupanacar jacañ churcän uca Diosaruw wastat irpatäni.

12. Ucapachajja asqui jakenacan ajayunacapajj cusisiñ pacha sat cusisiñ utjäwiruw catokatäni; ucasti samaraña, muncañ utjäwiwa. Ucansti takpach llaquinacapat llacthapïwinacapat jathi cunaymaninacapat samarapjjani.

13. Ucapacharaquiw ñankha jakenacan ajayunacapajja, jïsa, uca ñankha ajayunacajj, janiw jupanacanjj mä kawkhas Tatitun Ajayupatjj utjquiti, cunalaycutejj jupanacajj asqui luräwinac lanti ñankha luräwinac ajllipjjäna. Ucat supayan ajayupajj jupanacar mantasin, utaparuw utjantasi, ucanacasti anka chʼamacar jakontatäpjjaniwa. Ucansti jachaña, warariña, laca chʼaqha tʼurusiña, supayan munañapan catuntat irpatäsin quipca ñankha luräwinacap laycuw utjani.

14. Jichhajja, ucajj ñankha jakenacan ajayunacapan utjäwipawa. Jupanacajj chʼamacancapjjewa, ajjsarcañ ajjsarthapisaw Diosan ninjam colerasiñapan jupanacar puritap suyapjje. Ucat uca utjäwin kamapjje, asquinacasti cusisiñ pachan jactañapcam kamapjjaraqui.

15. Jichhajja, ajayun jactäw nayrajj cusisiñan llaquisiñan utjäwipajja nayrïr jactäwïcaspas uqhäm yakhepajj amuyapjje. Nayajj arsustwa: Ajayur aytañampi, cusisiñarus llaquisiñarus arsut arunacarjam qhitañampejja, jactäwi satäspawa.

16. Wastata, nayrïr jactäwejj utjani saraquiwa; qhitinacatejj utjapcäna, utjapqui Criston jiwatat jactañapcam utjapcani, take uca jakenacataquiw uca jactañajja.

17. Jichhajja, cunat-tejj uqhäm arsutäqui uca nayrïr jactäwejj ajayunacan jactañapäcaspasa, cusisiñarus llaquisiñarus qhitatäñapäcaspas uqhäm janiw amuyctanti. Janiw uqhäm sañap amuyañamäquiti.

18. Nayajj jumaruw sisma: Janiw uqhämäquiti. Antisas ucajj sañ muni: Adanan urunacapat Criston jactäwipcam utjirinacan ajayunacapamp janchinacapamp wastat mayachasiñawa.

19. Ucampis takenitejj mayac mayachthapitächinejja, qhitinacat-tejj parlatäqui ucanacan ajayunacapamp janchinacapampi, asqui jakenacas ñankha jakenacasa, janiw siscti. Mayac arsta, takeniw sartapjjani, mä arunjja, jactäwipajja, qhitinacatejj Criston jactäwip khepat jiwapcani ucanacat nayräniwa.

20. Jichhasti, wawajjay, janiw nayajj siscti, jupanacan jactañapajj Criston jactañapamp chicäniw –sasa. Antisas nayajj lupʼïwijjarjamaw sisma, Cristojj jactcani alajjpacharu maqhatcani ucapachajja, asquinacan ajayunacapajj janchinacapamp wastat mayachatäpjjaniwa.

21. Ucampis jupajj jactcani inas ucapachächini inas jan ucapachäc-chiniti –sasajj janiw siscti. Antisas nayajj sistwa: Jiwañat janchin jactañapcamajja, jaljaw utji. Uqhämaraqui, cunapachatejj jiwatanacajj sartapcani, ajayump janchimpejj wastat mayachatäpcani, Dios nayrakatar saytʼir irpantatäpcani, luräwinacaparjam taripatäpcaraquini, ucapachan cunapach puriñapajj Diosan ut-tʼayatawa. Ucapachcamasti ajayutaqui mä cusisiñ utjäwi, jan ucajj llaquisiñ utjäwiw utji.

22. Jïsa, cunatejj Diosan arjirinacan lacanacap toke arsutäqui ucanacar cut-tayañataquiw ucjj ut-tʼayi.

23. Ajayojj janchir cut-tayatäniwa, janchisti ajayur cut-tayataraquïniwa. Takpachaw phokhatpach cut-tayatäni, janiraquiw mä ñicʼutas chhakatäcaniti; antisas takpachajj cheka phokhatpach utjañapar cut-tayatäniwa.

24. Jichhajja, wawajjay, ucajj Diosan arjirinacan lacanacapan arsut cut-tayañawa.

25. Ucapachasti asquinacajj Diosan khapak marcapan khanapjjani.

26. Ucampisa, ajjsarcañ jiwañajj ñankhanacaruw purini, cunalaycutejj jupanacajj asqui cunaymaninacat jarcʼaker jiwañ catokapjjani. Jupanacajj kʼañüpjjewa, janiraquiw cuna kʼañus Diosan khapak marcap tutjam catokcaspati. Jupanacajj jakonucutäsaw, ñankha luräwinacapan achupat catokañar qhitatäpjjaraquini, jupanacasti cʼallcʼu kerun konchup umapjjaraquini.