1. Ucat kawkhaninacatejj Helamanampin jilanacapampin arunacapar jan yäkañ munapcän ucanacaw mayachthapisisin jupanac contrajj saytʼapjjäna.

2. Ucat jupanacajj walpin colerasipjjäna, ucanacar jiwayañ munañapcama.

3. Ucat jilanacapatac colerasir jakenacan jilïripajj jachʼa chʼaman Amaliquia jakënwa.

4. Ucat Amaliquiajj pʼekechirïñ munäna; uca colerasir jakenacajj jupan pʼekechiripäñap munapjjaraquïna.

5. Jupanacajj Amaliquian aqhäm sas alek jachʼar aptir arunacapan irpakatäpjjänwa: Jumanacatejj pʼekechirimäñajjatac ut-tʼayapjjetätajja, nayajj jakenacjjar sarayirinacataquiw uchapjjäma.

6. Ucat Helamanamp jilanacapampejj yatiyapc-chïnsa, iyawsiri tamatac jilïr sacerdotëtap laycu, wali sum iglesiar uñjapc-chïnsa, uca jakenacajj chʼajjwañar Amaliquian irpakatäpjjänwa.

7. Walja iglesianquirinacajj Amaliquian alek jachʼar aptir arunacaparuw iyawsapjjäna; ucat jupanacajj iyawsiri tamats mistupjjäna. Ucat Nefi jakenacajj Laman jakenacar wal atipapc-chïnsa, Tatitun amparapan jupanacar khespiyatapat wal cusisipc-chïnsa, jupanacan luräwinacapajj wali jasac tincurjamäpjjänwa.

8. Uqhämat uñjtan, cunj mäquis jaken wawanacapajj Dios Tatitupat armasipjjejja, jïsa, cunj jasaquïpjjes ñankh lurañataquejja, ucatsti ñankhäqui ucamp lak irpayasiñataquisa.

9. Jïsa, uqhämat uñjaractan cunj ñankhtejj mä ñankha jakejj utjaycaspa, jakenacan wawanacap taypinjja.

10. Ucat Amaliquian jan wali chʼiqhi amuyunïtapa, wali jachʼar alek aptir arun jakëtap laycu, walja jakenacan chuymanacapar ñankh lurañar irpakatap uñjaractan. Uqhämaraqui Diosan iyawsiri tamapar tucqhañ chʼamtʼañaru, Diosan jupanacar churat antutäw takan tucqhañaru, jan ucajja, asquinac laycu Diosan orakjjar apayat qhuyapayäwir tucqhañaru, Amaliquian jupanacar irpakatap uñjaractan.

11. Ucat Nefi jake nuwasiri tamanacan jilïr Moroni sat sarayiripajj uca chʼajjwanacat istʼasinjja, jupajj Amaliquiataquiw colerasïna.

12. Ucat jupajj capotep chʼiyanoke, ucat mä jiscʼa chʼiyakasaw ucar kellkäna: –Diosasata, iyawsañasata, sumancañasata, warminacasata, wawanacasat amtasiñataqui – ucsti jupajj mä lawaruw chincatäna.

13. Ucat jupajj pʼek jarqʼir cascop uchasisina, chuymatac lekʼsut jarqʼir uchasisina, yakha jarqʼirinacamp uscusisina, lekʼsutanacampiw cinturar wacʼantasïna. Ucat uca chʼiyanokat capotepaniw law aytasin (jupajj uca capotepar antutatäw wiphala sutimpiw sutiñchäna) orakcam altʼäna. Ucat mä kawkha cristianonacajj uca orak catupcän uc-chʼañcamajj antutatäw qhuyapayanacan jilanacapampïñapatac Diosapat chʼamtʼasisaw mayisïna.

14. Uqhäm Diosan iyawsiri tamapancapcän uca Cristor cheka iyawsirinacajja, cristianonaca satäpjjänwa, Diosan jan iyawsiri tamapancapcän ucanacampejja.

15. Ucat iglesianquirinacajj take chuymäpjjänwa; jutcan uca Cristor iyawsatap laycu, Cristor chekpach iyawsirinacajja, cusisitaw uca Cristo suti, jan ucajja, cunjämatejj cristiano satäpcän uca sut catjjarupjjäna.

16. Ucat Moronejj uca cristianonacatac uca oraken antutatäñapataquiw mayisïna.

17. Ucat chuymapanquir cunanac Diosar arscän uca khepatjja, take chʼusa jaytanucut oraket aynach tokenquir orakenacaru, chekpacha takpach uca alay tokenquir aynach tokenquir orakenacarojja, ajllit orake, antutatäw orake sutinacampiw sutiñchäna.

18. Ucat siwa: Chekpachaw Diosajj nanac Cristo sut catjjarurinacan tʼustʼjatäsin tucqhatäñajj jan muncaniti, quipca ñankha luräwinacajjamp puriyasipcä ucapachcamajja.

19. Ucat Moronejj uca arunac arsusinjja, jupajj jakenac taypir chʼiyanokat isir kellkat arunac takenin uñjañanacapataquiw uca chʼiyanokat isip laphapiyas saräna. Jupasti jachʼa arut aqhäm sas artʼäna:

20. Qhitinacatejj aca wiphal orakjjan imapcani ucanacajja, Tatitun chʼamapan jutapjjpan. Uqhämaraqui Dios Tatitun jupanacar bendiciñapataqui mä arsüw lurapjjpan, wactʼäwinacaparu, iyawsañapar imañataqui.

21. Ucat Moronejj uca arunac arscän ucqhaw, jakenacajj Dios Tatitupar jan jaytanucuñanacapat arsüwjam uñachayañataquiw isinacap chʼiyanokasïna, lekʼsutanacapamp cinturar wacʼantatäsin mayac jaltas jaltas jutapjjäna. Uca arsüwipajj aqhamänwa: Jupanacatejj Diosan camächitanacapar pʼaquipjjaspajja, jan ucajj jucha lurañar jalantas Cristo sut catjjaruñat pʼenkasipjjaspajja, cunjämatejj jupanacajj isinacap chʼiyanokapqui, uqhäm Tatitojj jupanacar chʼiyanokañapänwa.

22. Ucaw lurat arusjäwipajja. Jupanacasti Moronin cayuparuw isinacap willinokapjjäna aqhäm sasa: Nanacajj Diosajjamp mä arusjäw lurapjjta, nanacatejj juchar jalantapjjäjja, camisatejj alay orakenquir jilanacajjajj tʼunjatänjja, uqhämarac nanacampejj luraspan. Nanacatejj juch lurañar jalantapjjä, cunjämatejj nanacajj isinacajj juman cayunacamar tʼustʼjatäñatac willinokapcta, uqhämarac jupajj timanacajjan cayunacapar nanacar willinokapjjetpan.

23. Ucat Moronejj jupanacar säna: Jiwasanacajj Jacobon jathapat jiltʼirinacäpjjtanwa. Capotepajj jilanacapan waljar chʼiyanokatäcän uca Josean jathapat jiltʼirinacäpjjtan jiwasanacajja. Jichhajja Diosan camächitanacapar phokhañ amtasipjjañäni; jan uqhäm lurapcañänejja, isinacasajj jilanacasan chʼiyanokatäpjjaniwa, jiwasanacasti carcelar jakontatäpjjañäniwa; jan ucajj aljatäpjjañäniwa; jan ucasti jiwayatäpjjañäniwa.

24. Jïsa, Joseat jiltʼirinacjam antutatäwis imapjjañäni. Jacobojj janïr jiwcän uca arunacapat amtasipjjañäni; Josean capotepat mä jiscʼa imatätap uñjäna, jan tutjatätap uñjaraquïna. Ucat jupajj säna: Cunjämatejj yokajjan isipat aca jiltʼajj imatäcänjja, uqhämaw mä kawkhanejj yokajjan jathapat Diosan amparapan imatäsin, jupa pachpatac jupan catokatäpjjani. Josean yakha wawanacapasti jupan yakha isipjamaw chhaktani.

25. Ucaw chuymajjarojj llaquisiyi. Ucampis uca yokajjan Diosar catokat kawkha wawanacap laycuw chuymajjajj jupat cusisi.

26. Ucanacajj Jacobon arunacapawa.

27. Inas uca Josean chhaktir wawanacapajj jiwasanacat misturinacäpjjchi. Janitejj jiwasanacajj Cristor iyawsañan thurtʼasipcañän ucajja, jiwasanacäpjjsnawa, janiw qhitis yatcaspati.

28. Ucat Moronejj uca arunac arscän ucqhajja, take jaychasïwinacas chʼajjwanacas utjcän uca orak tokenacaruw jupajj sarasin qhitaraquïna. Ucat amaliquiaitanac sat misturinacjjar Amaliquiampjjar thurtʼasiñataquiw take antutatäw imañ munirinac tantachthapiyas tantachthapiraquïna.

29. Ucat Amaliquiajj Moronin jakenacapan jupan jakenacapat jucʼamp waljanïtap uñjasinjja, uqhämaraqui, jupan jakenacapan luratapan asquïtapat pächasitanacap uñjasinaracjja, ucat nuwasïw jan phokhcaspas uqhäm amuyasin, jupajj sarañ munir jakenacampiw Nefi oraker mistüna.

30. Ucat Moronejj Laman jakenacan jucʼamp chʼamanïñapan jan waquisitap amuyasïna. Ucat Amaliquian jakenacapar jarcʼañ amuyasina, jupanacar catjasajja, wastat irpaniñ munäna; uqhämaraquiw Amaliquiar jiwayañ munaraquïna. Jupajj Amaliquian Laman jakenacar jupanac contra amtayañap jupanacamp nuwasir jutayañap yatïna. Amaliquian munañap lurañapataquiw uca lurañap yatïna.

31. Ucat tantachasipcän sumancañ imir arsüwir mantapcäna, armanac catupcän uca nuwasiri tamanacapamp sarañan waquisitap Moronejj amuyasïna, ucat jupajj ejercitopar wasarar irpasaw, Amaliquian wasaranjam sarañap jarcʼas cut-tʼayañanacapatac saräna.

32. Ucat jupajj munañaparjamaw luräna, ucat wasarar sarasaw, Amaliquian nuwasiri tamanacapar catjapjjäna.

33. Ucat Amaliquiajj mä kawkha jakenacapampiw jaltjjäna, ucat yakhanacasti Moronin amparapar catjayasisaw, Zarahemla oraker wastat irpatäpjjäna.

34. Jichhajja, Moronejj jilïr taripirinacapampin jakenacan arupampin ut-tʼayat jakënwa, ucat munañaparjam Nefi jakenacan nuwasiri tamanacapjjar ut-tʼayañataqui, uqhämarac ucanacar sarayañataquejj chʼamanïnwa.

35. Ucat cawquïr Amaliquia jakenacatejj antutat gobierno imañatac antutatäwir catjjäsiñ arsüwir jan mantañ munapcänjja, Moronin jiwayayatäpjjänwa, jucʼaniquiraquiw uca antutatäw arsüwir jan catokapcänti.

36. Uqhämaraqui antutatäw wiphaljj Nefi jakenacan catutäcän take uca orakenacanquir sapa torreruw saytʼayäna. Uqhäm Moronejj antutatäw wiphaljj Nefi jakenac taypin ut-tʼayi.

37. Sumancañasti wastat uca oraken utjañ kalltäna. Uqhämaw niyapun taripirinacan sarayäwipan tunca llätuncan mara tucuyäwipcam sumancañajj utjäna.

38. Helamanamp jilïr sacerdotenacampiw iyawsiri tamanjj suma sucʼatjam luräwinac imapjjaraquïna. Pusi maraw iyawsiri taman wali sumancañamp cusisiñampejj utjäna.

39. Almanacapan Jesucristo Tatitun cutsuyatapar thurtʼasisin iyawsasajj waljaniw jiwapjjäna; ucat cusisis oraket mistsupjjäna.

40. Yakhepanacajja, uca oraken yakhep phajjsin utjir jachʼa usunacampiw jiwarapjjäna. Ucampis janiw waljanejj uca jachʼa usunacamp jiwarapcänti, cunalaycutejj Diosaw alinacamp saphinacamp waquichäna, cuna usunactejj jakejj catcän uca oraken mayjätap laycojja, ucanac tucqhañataqui. Uca alinacamp saphinacampejj wali suma kollänwa.

41. Ucampis waljaniw chuymaniptasajj jiwapjjäna. Cawquïrinacatejj Cristor iyawsas jiwapcän ucanacajja, jiwasan amuyañasarjamajja, jupan cusisipjje.