1. Ucat Nefi jakenacajj wastat timanacapan amparanacapat Tatitun jupanacar khespiyatap laycuw walpin cusisipjjäna. Ucat Dios Tatitupar yuspagarapjjäna; jupanacajj wal ayunapjjäna, Diosat mayisipjjaraquïna. Jupanacasti wali jachʼa cusisiñampiw Diosar yupaychapjjäna.

2. Ucat taripirinacan Nefi jakenacjjar sarayäwipan tunca llätuncan maranjja, Almajj Helaman yokapan uc jutasaw juparojj säna: Uca imat kellkatanacat arscsma uca arunacajjar iyawstati?

3. Helamanasti juparojj sänwa: Jïsa nayajj iyawstwa.

4. Ucat Almajj säna: Jutcan uca Jesucristor iyawstati?

5. Ucat jupajj arsüna: Jïsa take juman arsut arunacaruw iyawsta.

6. Ucat Almajj saraquïnwa: Nayan camächitanacajjar phokhätati?

7. Jupasti arsünwa: Jïsa, take chuymajjampiw camächitanacamar phokhä.

8. Ucat Almajj jupar säna: Qhuyapayatätaw jumajja, Tatitojj aca oraken jachʼaptayätam.

9. Mä jucʼaquiw jumar yatiyañajjatac utjitu, ucampis cuntejj siscäm ucjja, janiw parlatatätati; cuntejj jumar jutir cunanacat yatiycäm ucajja, yatiyäwin phokhasiñapcamajja, janiw yatiyatäcaniti. Ucat cuntejj siscä uca arunac kellkam.

10. Acanacaw uca arunacajja: Pusi patac mara Jesucriston jupanacar uñstatapatjja, aca quipca Nefi marcan jan iyawsas tʼuqhartapjjañap nayajj amuyasina, nayancqui uca Diosan yatiyir ajayurjama.

11. Jïsa, ucapachaw jupanacajj nuwasïwinaca, jachʼa usunac uñjapjjani, jïsa, machʼanaca, wila wartäwinac uñjapjjaraquini Nefi jakenacan chhaktañapcama.

12. Jïsa, jupanacan jan iyawsañar puripjjatap laycuw chʼamac luräwinacap lurañaru, jan tupump munapayañaru, take cunayman ñankha luräwinac lurañaruw jalantapjjani. Jïsa, nayajj sismawa: Jupanacajj jachʼa khan contra, yatïw contraw juch lurapjjani, jïsa, nayajj sismawa: Ucürutjja janïr pusïr mitajj kʼal tucuscan ucqhaw uca jachʼa ñankha luräwejj jutani.

13. Uca jachʼa urojj jutcan ucapachajja, Nefi jakenacamp jichhajj jaqhutäpqui ucanacajja, jan ucajj jupanacan wawanacapajja, jan jucʼamp Nefi jakenacamp jaqhutäpcan ucapachajj mäquiw jutani.

14. Qhitinacatejj jan tucqhatäsin uca jachʼa ajjsarcañ urun jiltʼapcan ucanacajja, Laman jakenacamp jaqhutäpjjaniwa. Jupanacjamaw takpachanejj tucupjjani, jan ucajja Tatitun discipulonacap sat mä kawkhaniquiw jan uqhäm tucupcaniti. Ucanacarus chhaktañapcamaw Laman jakenacajj alisnakapjjani. Jichhajja, ñankha luräwinac laycuw aca yatiyäwejj phokhasini.

15. Ucat Almajj ucanac Helamanar arsusinjja, jupampir yakha yokanacapampiruw qhuyapayäna; uqhämaraqui asqui jakenac laycuw oraker qhuyapayaraquïna.

16. Ucat säna: Aqhäm siw Dios Tatitojja: Aca orakejj take ñankh lurir orakenacataqui, familianacataqui, lajjranacataqui, jakenacataquis phoktʼatapcan ucapachajj tucqhañcam ñankhachatäpan. Cunjämatejj nayajj siscta uqhamäniwa. Uqhämaw Diosan qhuyapayäwipas ñankhachäwipas aca oraketaqui; Tatitojj janiw mä jucʼs waliquiw sas juch lurañat amuyascaspati.

17. Ucat Almajj uca arunac arsusinjja, jupajj iyawsiri tamaparuw qhuyapayäna, jïsa, take ucapachat ucsarojj thurtʼat iyawsañaninacaruw qhuyapayäna.

18. Ucat Almajj uqhäm lurcasinjja, Melec oraker sarcaspas uqhämaw Zarahemla oraket mistüna. Ucat janiw jucʼamp jupat istʼascänti; jiwäwipats, imäwipats janiw yatctanti.

19. Acaquiw yat-tan, jupajj asqui jakënwa. Ucat iyawsiri taman parlajj sartäna; jupajj Ajayun apatäjjewa, jan ucajj, Tatitun amparapan Moisesjam imatäjjewa –sapjjänwa. Ucampis kellkatanacajj siwa: Tatitojj jupa quicpataquiw Moisesarojj catu. Uqhämaraqui, Tatitojj Almar jupa pachpar Ajayun catcaspas uqhäm nanacajj amuyasipjjta; ucat jupan jiwäwipat imäwipat jan cuns yatctanti.

20. Ucat taripirinacan Nefi jakenacjjar sarayäwipan tunca llätuncan mara kalltäwinjja, Helamanajj jakenac taypir ar jupanacar yatiyiriw saräna.

21. Ucat Laman jakenacamp nuwasïwinacapa, walja jiscʼa pitusïwinacapa, jakenac taypinquir chʼajjwäwinac laycuw Diosan arupan jupanac taypin yatiyatäñapajj waquisïna. Uqhämaraqui iyawsiri tamar sum sarayañar uchañajj waquisiraquïna.

22. Ucat Helamanamp jilanacapampejj wastat uc-chʼpach orakenjja, jïsa Nefi jakenacan catut orakenquir take marcanacan iyawsiri tama ut-tʼayir sarapjjäna. Ucat jupanacajj sacerdotenaca, yatichirinaca takpach uca oraken take iyawsiri tamanacjjar ut-tʼayapjjäna.

23. Ucat Helamanamp jilanacapampin, sacerdotenaca, yatichirinac uca iyawsiri tamanacatac ut-tʼayatapatjja, jupanac taypin mä chʼajjwäwiw utjañ kalltäna. Jupanacasti janiw Helamanampin jilanacapampin arupanacapar yäkañ munapcänti.

24. Antisas jupanacajj jachʼa jachʼaw tucupjjäna, wali jachʼa kamirïtap laycu chuymanacapan jachʼaptasa. Ucat quipca nayranacapan kamiriptapjjäna, janiraquiw Dios nayrakatan sum sarnakam sir arunacapar yäkapcaraquïnti.