1. Cunapachatejj Ammonamp jilanacapampejj Laman jakenacan orakep thiyan jaljtapcän ucqhajja, Laman jakenacan awquinacapan nacïw orakepat Jerusalen sat orakeparuw Aaronajj saräna; ucasti Mormon orak thiyanacamp chicänwa.

2. Uca Laman jakenacamp Amalequir arquirinacamp Amulon jakenacapampejj jachʼa Jerusalen sata marc ut-tʼayapjjäna.

3. Jichhajja, uca Laman jakenac pachpajj chʼollkhëpjjänwa, ucampis Amalequir arquirinacamp amulonaru arquirinacampejj jucʼamp chʼollkëpjjänwa. Ucat Laman jakenacan chuymanacap chʼollkheptayapjjäna, ñankha ajjtcañ luräwinacapamp jachʼaptapjjañapataqui.

4. Ucat Aaronajj Jerusalen marcaruw purïna, ucatsti Amalequir arquirinacaruw nayrakat yatiyañ kalltäna. Jupajj sinagoganacapan jupanacar yatiyañ kalltäna; cunalaycutejj jupanacajj nehoranacan iyawsäwiparjam sinagoganac utachapjjäna. Walja Amulonaru arquirinacamp Amalequir arquirinacampejj nehoranacan iyawsäwiparjam luririnacäpjjänwa.

5. Ucat Aaronajj sinagogapar jakenacar yatiyir mantcän ucqhajja, jupanacar parlcän ucqhajja, mä Amalequir arquiri jakew saytʼasa, jupamp juchhiquiñ aqhäm sas kalltäna: Cunas ircatcta ucajja? Qhitar uñjtati? Cunats qhitanacajj nanacar jan uñstapquitu? Janit aca marcajj juman marcamjam quipca sumäqui?

6. Uqhämaraquiw sapjjesta; janitejj juchanacamat cutiquipstapcätajja, chhakapjjätaw –sasa. Cunjämats jumajj chuymanacajjan lupʼiñap munañap yat-tajja? Cunjämats nanacan cuna juchat cutiquipstañajjs yat-ta? Cunjämats nanacan jan asqui marcätajj yat-ta? Nanacajj kollan chekanac lurapjjta; Diosar yupaychirejj tantachasipjjaractwa. Nanacajj Diosan take jakenacar khespiyañaparuw iyawsapjjta.

7. Ucat Aaronajj jupar säna: Diosan yokapan jakenacar juchanacapat cutsuyir jutañapar iyawstati?

8. Ucat uca jakejj jupar säna: Nanacajj uc yatitamjj janiw iyawsapcti. Janiw uca lokhe amuy saranacar iyawsapcti. Juman jutir cunaymananacat yatitamarojj janiw iyawsapcaracti, janiraquiw awquinacaman awquinacajjan jutir cunaymananacat parlapcän uca yatitaparus iyawsapcaracti.

9. Aaronasti Criston jutañapjjata, jiwatanacan jactañapjjat kellkatanac khanañchañ kalltäna; jakenacar cutsuyañajj janiw utjcaspati, jan ucasti, Criston tʼakhesïwip laycu jiwäwip laycu, wilapan juchanacan tʼakhesiyäwipar phokhañ laycuquiw utjaspa.

10. Ucat jupajj ucanac jupanacar khanañchañ kalltcän ucqhajja, jupataquiw colerasipjjäna, jupar sawcjjayañ kalltapjjaraquïna; janiw arsut arunacapar istʼañ munapcänti.

11. Ucat jupajj arunacapar jan istʼañ munapjjatap uñjasajja, jupajj sinagoganacapat mistüna, ucat Ani-Anti sat marcaruw sararaquïna. Ucansti Muloquiruw jupanacar yatiyquir jicjjatäna. Uqhämaraqui Ammampir jilanacapampir jicjjataraquïna. Jupanacasti waljanimpiw arjjat juchiquipjjäna.

12. Ucat jupanacajj jakenacan chuymanacapar chʼollkheptayañap amuyapjjäna, ucat uca marcat mistusin, Midoni oraker jutapjjaraquïna. Ucansti waljaniruw ar yatiyapjjäna, jucʼaniquiraquiw yatichat arunacaparojj iyawsapjjäna.

13. Ucampis Aaronampir mä kawkha jilanacapampir catuntasaw carcelar jakontapjjäna; jan catjatanacasti Midoni oraket ucsa toke orakenacaruw jaltjjapjjäna.

14. Uca carcelar jakontatanacajj walja cunaymananac tʼakhesipjjäna; jupanacasti Ammonampin Lamonimpin amparapamp antutayatäpjjänwa, isiyatäpjjaraquïnwa.

15. Jupanacasti ar yatiyirejj wastat sarapjjäna; uqhämaw nayrïr cutejj carcelat antutayatäpjjäna, uqhäm tʼakhesipjjaraquïna.

16. Jupanacasti cawqharutejj Tatitun Ajayupan irpatäpcän ucar sarasaw take Amalequir arquiri jakenacan sinagoganacapana, jan ucajja, mantayapcän take uca Laman jakenacan tantachasïwinacapan, Diosan arup yatiyapjjäna.

17. Ucat Tatitojj jupanacan waljanir chekat yatïwir irpaniñapcamaw jupanacarojj qhuyapayañ kalltäna. Jïsa, juchanacapata, awquinacapan saranacapan jan chekätap jupanacajj waljanir iyawsayapjjäna.

18. Ucat Ammonamp Lamonimpejj Midoni oraket Ismael tuti orakeparuw cut-tapjjäna.

19. Lamoni pʼekechiristi Ammonan jupar lokañaps lokerïñaps janiw muncänti.

20. Antisas Ismael orakenjja, sinagoganac utachayäna; ucat jupan marcaparu, jan ucajja, jupan sarayat jakenacaruw tantachayäna.

21. Jupajj jupanacat cusisïna, walja cunaymananac yaticharaquïna. Uqhämaraqui jupan sarayäwipanquir marcätapat jupanacar yatiyäna, pʼekechirin awquipan munañaparjam sarayäwipat antutat marcätapat jupanacar yatiyäna; cunalaycutejj awquipajj take Ismael orakenquiri ucsa tokenquir jakenacjjar sarayañap jupar churäna.

22. Uqhämaraqui, cawqhancapcaspasa Lamoni pʼekechirin orakepancapcasp ucqhasa, Dios Tatitupar munañaparjam yupaychañatac antutatanacapat jupanacar yatiyaraquïna.

23. Ammonajj Lamoni jakenacar yatiyaraquïnwa; jupasti take asqui cunaymananacat jupanacar yatichäna. Jupasti sapüruw jan karjas jupanacar ewjjäna; jupanacasti arunacapar yäkasajj Diosan camächitanacap lakaw phokhapjjäna.