1. Ucat taripirinacan Nefi jakenacjjar sarayäwipan sojjtïr maranjja, janiw chʼajjwanacas nuwasïwinacas Zarahemla orakenjj utjcänti.

2. Ucampis jakenacajj jilanacapan chhaktatap llaquisajj wal llaquisipjjäna. Uqhämaraqui uywa tamanacapan chhaktatapata, yarana yapunacapat Laman jakenacan tʼustʼjatas tucqhatapat llaquisipjjaraquïna.

3. Llaquisïwinacapan jachʼätap laycuw sapakat maynin llaquisiñataquejj utjäna. Jupanacasti Diosan taripäwinacapajj ñankha ajjtcañ luräwinacap laycuw jupanacar puritapjj amuyasipjjäna. Ucat lurapjjañapäcäns ucat amtayatäpjjäna.

4. Jupanacasti iyawsiri tamar ucapachat jucʼamp ut-tʼayañ kalltapjjäna. Waljaniw Sidon uman bautizasisa, Diosan iyawsiri tamapar mantapjjäna. Jupanacajj Alman amparapamp bautizatäpjjänwa. Jupasti Alma awquipan amparapampiw iyawsiri jakenacataqui jilïr sacerdotjam yakhaktayatäna.

5. Ucat taripirinacan sarayäwipan pakallkör maranjja, niyas quimsa warank pheska patacan jakew bautizasïna, Diosan iyawsiri tamapamp mayachasipjjaraquïna. Uqhämaw taripirinacan Nefi jakenacjjar sarayäwipan pakallkör marajj tucusiwayäna. Takpach take uca pachansti, sumancañanpun sarnakasipjjäna.

6. Ucat taripirinacan sarayäwipan quimsakallkör maran iyawsiri tamanquiri jakenacajj wal kamiriptapjjäna, ñutʼu sedanacampi, suma sawut lienzonacampi, walja uywa tamanacampi, korimpi, kollkempi, luratanacapat cunayman cʼajquirinacampiw, jachʼa jachʼa tucuñ kalltapjjäna. Take ucanacampiw quicpa nayranacapan jachʼa jachʼa tucupjjäna. Wali jila alan isimp isthapisiñ kalltapjjaraquïna.

7. Ucanacasti Almarojj walpun llaquisiyäna. Qhitinacarutejj jupajj iglesian ut-tʼaycäna; yatichirita, sacerdoteta, elderata, ucanacataquejj wali llaquisiñaraquïnwa. Waljaniw jupanacat ñankha luräwinacan jakenac taypin utjañ kalltatapat amuyasisajj wal llaquisipjjäna.

8. Cunalaycutejj jachʼa llaquisiñampiw jupanacajj uñjapjjäna, uñchʼuquipjjaraquïna cunjämtejj iyawsiri tamanquirinacajj jachʼa jachʼa tucusajj pʼek waytapcän ucjja. Ucatsti, uñjapjjaraquïnwa, cunjämtejj kamir cancañaru, acapachan inamayatac sarnakañanacar chuymanacap catuyasipcän ucjja. Ucatsti, uñjapjjaraquïnwa, cunjämtejj maynit maynirojj jiscʼachasipcäna, cunjämaractejj jupanacan jan munataparjam lurir jakenacarus jan iyawsir jakenacarus arcnakapcän uca.

9. Ucat uca taripirinacan sarayäwipan quimsakallkör maranjja, iyawsiri tama jakenac taypin jachʼa chʼajjwanacaw utjañ kalltäna. Jïsa, munapayañanaca, pitusiña, chhojjriñchañ munaña, arcanakäwinaca, jachʼa jachʼa tucuña, ucanacaw utjäna. Jachʼa jachʼa tucuñasti jan Diosaru iyawsiri jakenacan jachʼa jachʼa tucuñapat sipan jucʼampïnwa.

10. Uqhämaw taripirinacan sarayäwipan quimsakallkör marajj tucusiwayi. Iyawsiri taman ñankhätapajj jan iyawsiri tamanquirinacataquejj jachʼa lanktañ kalaraquïnwa. Uqhämat iyawsiri tamajj nayrakatar sartañat sipanjj kolluñ kalltäna.

11. Ucat llatunquïr marajj kalltcän ucqhajja, Almajj iyawsiri taman ñankhätap amuyäna. Iyawsiri taman uñachtʼäwipasti jan iyawsirinacarojj mä ñankha luräwit yakha ñankha luräwiruw apañ kalltäna. Uca luräwimpisti tʼunjasiñap apanitap amuyaraquïna.

12. Jupajj jakenac taypinjja, yakha yakhäñ chuyman utjatap amuyäna. Yakhepajj jupanacatjja, jachʼa jachʼa tucusaw masinacapar uñisipjjäna, isit jalstatanacataqui, pistʼayasirinacataqui, mankʼat awtjatanacataqui, umat pharjatanacataqui, usutanacataqui, llaquitanacataquejj mays uñtapjjäna.

13. Ucanacajj jakenac taypinjj jachʼa llaquisiñänwa. Yakhepanacajj llampʼuchasipjjänwa yanapap munapcän uca pistʼatanacar yanapasa, kʼoyanacampir pistʼatanacampir yänacapat wajjtʼasa, mankʼat awtjatanacar mankʼa churasa, jutir urunacat yatiyir ajayun aruparjamajj jutcan uca Cristo laycu take cunayman tʼakhesïwinac tʼakhesipjjäna;

14. Ucür suyatap laycu, juchanacapar pʼampʼachäw catjjäsisa. Ucatsti, walpun cusisipjjäna, jiwatanacan jacatatañap utjatapata, jiwañan phalanacapat antutayañaparu, Jesucriston munañaparjama, chʼamaparjam cutsuyäwin utjatapataraqui.

15. Ucat Almajj Diosar llampʼu chuyman arquirinacan tʼakhesïwinacap uñjasa, jakenacapanquirit cunjämtejj jupanacar arcanakapcän uc uñjasa, jupanacan yakha yakha chuymanïpjjatap amuyasaraquiw walpun llaquisiñ kalltäna; ucampis Tatitun ajayupajj janiw juparojj jaytcänti.

16. Ucat jupajj iyawsiri tamanquiri amawtʼanacat mä suma amuyun jakeruw ajllïna, juparusti jakenacan aruparjama, churat leyinacarjam leyinac ut-tʼayañataqui, jakenacar ñankha jucha lurataparjam ley puriyañatac chʼam churäna.

17. Uca jakejj Nefia satänwa. Jupasti jilïr taripirit ut-tʼayatäsajja, taripäw konuñan jakenacar taripañatac sarayañataquiw kontʼasïna.

18. Ucampis Almajj janiw juparojj iyawsiri taman jilïr sacerdotëñapataquejj churcänti, antisas jupajj uca ut-tʼayäwjj jupataquiw catusïna. Ucampis taripäw konuñjj Nefiaruw catuyäna.

19. Ucsti jupajj luränwa, jupa pachpa marcap taypiru, jan ucajj Nefi jakenac taypir sarayañataqui, Diosan arup yatiyañataqui, cunanacatejj lurañapäcän ucanac amtayañataqui, take uca jachʼa jachʼa tucüwinacaru, jan wali chʼiqhi chuymaru, jakenac taypin take chʼajjwanacar Diosan arupamp tucqhañataqui. Jupanacarojja kʼoma ircatañampiquiw cutsuyañ amuyäna.

20. Ucat taripirinacan Nefi jakenacjjar sarayäwipan llatunquïr maranjja, Almajj taripäw konuñ Nefiar catuyäna. Jupasti Diosan kollan sucʼaparjamaw jilïr sacerdociompic kheparäna, jutir urunacat yatiyir ajayun amuyayatarjama, Diosan yatiyir ajayurjam arupat ircatañampiquiw trabajäna.