1. Jichhajja, Ammonajj Lamonin jakenacapar jan inactʼas yatichasquipan, Aaronampin jilanacapampin sarnakäwinacapar cut-tañani. Jupajj Midoni oraket mistcän uca khepatjja, Nefi oraker Lamonin uc-chʼpach orakjjar pʼekechir awquipan utapar Ajayun irpatänwa. Uca pʼekechiristi Ismael orakeruquiw jan pʼekechirïcänti.

2. Ucat Aaronajj pʼekechirin palacioparu, pʼekechirin uc jilanacapamp mantasaw jupa nayrakatan altʼas aqhäm säna: Pʼekechiriya, nanacajj carcelat mistuyapquista uca Ammonan jilanacapäpjjtwa.

3. Jichhasti, pʼekechiriya, jumatejj jan jiwayapquitätajja, nanacajj lokerimäpjjäwa. Ucat pʼekechirejj jupanacar säna: Saytʼapjjam, janiw jiwayapcämati, janiraquiw lokerijjäpcätati. Antisas jumanacan nayar yatichañam munta. Ammon jilaman wali suma jakëtapa, arunacapan jachʼätapat amuyujjan llaquista. Cunats jupajj jumanacamp chicajj Midoni oraket jan jutqui uc yatiñ munaracta.

4. Ucat Aaronajj pʼekechirir säna: Tatitun Ajayupajj yakha tokeruw jupar jawsi; jupajj Lamonin jakenacapar yatichiriw Ismael oraker sari.

5. Ucat pʼekechirejj jupanacar säna: Tatitun Ajayupat parlapcta ucajj cunasa? Ucaw nayarojj wal llaquisiyitu.

6. Uqhämaraqui Ammonan aqhäm satapajj: Juchanacamat-tejj cutiquipstätajja, khespiyatäyätawa, juchanacamat jan cutiquipstcätajja khep khepa urun jakonucutäyätawa –sisqui ucajj camsañs muni?

7. Ucat Aaronajj jupar säna: Diosan utjatapar iyawstati? Ucat pʼekechirejj säna: Nayajj Amalequir arquirinacan Diosaw utj satap yat-ta, ucatsti jupanacan yupaychañatac tantachasiñanacapataquejj kollan utanac utachapjjañapataquejj jaysaractwa. Jichhasti, jumatejj jichhajj Diosajj utjiw sätajja, nayajj iyawsäwa.

8. Ucat Aaronajj uc istʼasajj chuymapan cusisiñ kalltäna, ucat jupajj säna: Pʼekechiriya, cunjämatejj jumajj chekpach jacasctajja, uca pachparaquiw Diosajj utji.

9. Ucat pʼekechirejj säna: Awquinacasar Jerusalen oraket irpscän uca Jachʼa Ajayut Diosajja?

10. Ucat Aaronajj jupar säna: Jïsa, jupatejj uca Jachʼa Ajayüchejja, ucat take cun lurarac-chi alajjpachansa acapachansa, ucarojj iyawstati? –saraquïnwa.

11. Ucat jupajj säna: Jïsa nayajj Jachʼa Ajayun take cun luratap iyawsta. Nayajj juman take ucanacat yatiyañam munta, take arunacamaruw iyawsaraquï.

12. Ucat Aaronajj jupan arunacapar pʼekechirin iyawsañap uñjasaw, jupajj Adanar luräwita, kellkatanac pʼekechirir leyiñ kalltäna. Cunjämats Diosajj jakenacar jupa quipc luräna, cunjäms jupajj camächitanac churäna, cunjäms jakenacajj camächit pʼaquitap laycojj tincün ucanacjjat khanañchäna.

13. Aaronasti kellkatanac juparojj khanañchäna, Adanar utjatatpach jakenacan tincutapata, jupanacan janchjam utjäwipata, Criston sutipar iyawsirinacatac orak ut-tʼayäwit Cristo toket waquichatäcän uca cutsuyir arustʼäwit jupar uñachayasa.

14. Jakenacan tincutap laycojja, janiw jupanacajj quipca luräwinacapat cuns catokapcaspati; ucampis Criston tʼakhesïwipamp jiwañapampejj jakenacan juchanacapan tʼakhesiyäwiparuw phokhe; iyawsaña, juchat cutiquipstaña, uqhämanac toketa. Juchajj jiwañan phalanacap tʼakjje, sepulturan jan atipäwinïñapataqui, jiwañan michʼipan khapak cancañar suyañ chhaktañapataqui. Aaronasti take ucanac pʼekechirir khanañchäna.

15. Ucat Aaronajj ucanac jupar khanachcän uca khepatjja, pʼekechirejj sänwa: Jumas parlctas uca wiñay jacäwinïñajjataquejj cuns luräjja? Jïsa, cuns lurä aca ñankha ajayur chuymajjan apsusin Diosan Ajayup catokasin Diosat naciñajjataqui, cusisiñan phoktʼatäñajjataqui, khep khepa urun jan jakonucutäñajjataquejj cuns luräjja? Jupajj sänwa: Nayan utjqui take ucanac jaytjjä; jïsa marcar sarayäwejj uca jachʼa cusisiñ catokañajjatac jaytjjaraquï.

16. Ucampis Aaronajj jupar sänwa: Jumatejj uc munstajja, Dios nayrakatan altʼätajja, jïsa, jumatejj take juchanacamat cutiquipstjjätajja, Diosan sutipar iyawsañamp artʼasa, catokañamar iyawsas jupa nayrakatan altʼätajja, jumajj muncta uca suyañjj catokätawa.

17. Ucat Aaronajj uca arunac arscän ucqhajja, pʼekechirejj quilltʼasaw Dios nayrakatan altʼäna. Jupajj orakcam altʼasaw aqhäm sas jachʼat artʼäna:

18. Diosay, Aaronajj Diosaw utj situwa; Diosatejj utjchejja, jumatejj Diosästajja, nayar uñtʼayasitaya, nayasti jumar uñtʼañataqui, jiwatat jactañajjataqui khep khepa urun khespiyasiñajjataquiw take juchanacajj jaytjjaraquï. Ucat pʼekechirejj uca arunac arcscän ucqhajja, jupajj jiwatäcaspas uqhämaw liwitat-täna.

19. Ucat lokerinacapajj take cuntejj pʼekechirir camachcän ucanac warmipar yatiyäna. Warmipasti pʼekechirin uc mantäna; ucat jupajj pʼekechirir jiwatäcaspas uqhäm liwisit uñjasajja, Aaronamp jilanacapamp pʼekechirir liwisiyapcaspas uqhäm saytʼat uñjasaw, jupanacatac colerasïna. Ucat jupajj lokerinacapar, jan ucajj pʼekechirin lokerinacaparojj jupanacar catuntasin jiwayapjjañapataquiw säna.

20. Ucampis lokerinacajj pʼekechirin cunat liwisitaps uñjapjjänwa, ucat Aaronampir jilanacapampir catuntañjj ajjsarapjjäna; jupanacasti pʼekechirin warmiparojj aqhäm sasaw achictʼapjjäna: Cunats aca jakenacar jiwayapjjañajjatac parlapjjesta? Jupanacat maynïrejj takpach nanacatjj jucʼamp chʼamaniwa, nanacaruw antisas jiwayapjjetaspajja.

21. Ucat pʼekechirin warmipajj lokerinacan ajjsaratap uñjasaw, mä ñankhan jupar puriñapat jupar ajjsararaquïna. Ucat lokerinacapar qhitäna, jakenacapar jawsiri, Aaronampir jilanacapampir jiwayapjjañapataqui.

22. Ucat Aaronajj pʼekechirin warmipan jiwayañ munascaquitap uñjasa, jakenacan chuymanacapan chʼollkhëtap yatisaraqui, walja jakenac tantachasisajj jupanac taypin jachʼa chʼajjwamp ojjöwimp utjañapat ajjsaräna. Ucat amparap loktasaw pʼekechirirojj oraket waytäna ucat jupar säna: Saytʼam. Jupasti chʼamap catokasaw saytʼäna.

23. Ucajj pʼekechirin warmip nayrakatan lurasïna, walja lokerinac nayrakatan lurasiraquïna. Uc uñjasasti jupanacajj muspharasaw ajjsarañ kalltapjjäna. Ucat pʼekechirejj jupanacar jacʼachasisaw yatiyañ kalltäna, jupasti take utapanquirinacan Tatitur cutiquipstañapcamaw jupanacar yatichäna.

24. Pʼekechirin warmipan jawsayatap laycusti walja jakenacaw tantachasipjjäna; jupanac taypinsti Aaronampit jilanacapampit walpun thuthuñ kalltapjjäna.

25. Ucampis pʼekechirejj jupanacar jacʼachasisaw yatiyäna. Jupanacasti Aaronampi jupamp chictʼatäpcän ucanacampejj sumaptapjjänwa.

26. Ucat pʼekechirejj jakenacan sumaptatap uñjasaw Aaronampir jilanacapampirojj uca jakenac taypir irpantasaw ar yatiyäna.

27. Ucat pʼekechirejj take uca orakenjj yatiynokäw apayäna, take orakepanquir jakenacaparu, take ucsa toke orakenacanquirinacaru, inti jals token inti jalant token lamar thiyacama, inti jals lamarat inti jalant toke lamarcam utjir cʼullcʼu wasaran Zarahemla oraket jaljatäsina, take tokena lamar thiyanacana, Zarahemla orak alay tokenquir wasar thiyanacana, Manti thiyanacana, Sidon jawir kalltäw tokena, inti jals toket inti jalant toker sariri – uqhämaw Laman jakenacamp Nefi jakenacampejj jaljatäpjjäna.

28. Jichhajja sinti jayräcän uca Laman jakenacajj wasaran chʼujllanacan utjapjjäna; jupanacasti Nefi orakenjj inti jalant toke wasaran chʼekentatäpjjänwa. Uqhämaraqui Zarahemla oraket inti jalant tokena lamar iran thiyana, Nefi orakena inti jalant tokena awquinacapan nayrïr tuti orakewjapana, uqhäm lamar thiyana utjapjjäna.

29. Uqhämaraqui walja Laman jakenacajj inti jals toke lamar thiyana, ucsar Nefi jakenacan alis-sutäsaw utjaraquïna. Ucat Nefi jakenacajj niyapuniw Laman jakenacan muyuntatäpjjäna; ucampis Nefi jakenacajj wasar thiyanacanac take uca alay toke orakenac catupjjäna, Sidon jawiran kalltäwipsa inti jals toket inti jalant tokecama, wasar ucsäjjana, alay tokena jupanacan Jilarquir sat orakcama.

30. Uca orakesti Zarahemla jakenacan catjatänwa, jakenacan marcachata, tucqhata chʼaqhanacapat parlctan uca Chʼusa Jaytanucut sat oraken thiyapcamänwa, alay tokencatap laycu. Uca Chʼusa Jaytanucut sat orakesti jupanacan nayrïr purit chekänwa.

31. Uca oraketsti jupanacajj aynach toke wasararuw maqhatapjjäna. Ucat alay toke orakejj Chʼusa Jaytanucut orak satänwa, aynach toke orakesti take cunayman casta lakʼonacan phoktʼatäqui uca wasarajja, Jilarquir Orak satänwa. Uca lakʼonacat mä kawkhajj alay toke oraket mankʼa thakeriw jutapjjatayna.

32. Jichhajja, Jilarquir orakemp Chʼusa Jaytanucut orakemp uca orak jaljata, mä Nefi jaketaquejj mä uru chican saräwiquïnwa, inti jalsu toketa inti jalant toke lamarcama. Uqhäm Nefi orakemp Zarahemla orakempejj niyapuniw umamp muyuntatäna; alay toke orakemp aynach toke orakemp jicthaptcän uca taypinjj jiscʼa simpa waña orakequiw utjäna.

33. Ucat Nefi jakenacajj Jilarquir orake, inti jals toketa inti jalant toke lamarcam catupjjäna. Uqhäm Nefi jakenacajj sum amuyasaw arjjatirinacapamp nuwasiri tamanacapampi Laman jakenacaru aynach toker jarcʼantapjjäna, jupanacan alay toke orakenac jan jucʼamp catupjjañapataqui, alay toke oraker jan chʼekentañanacapataqui.

34. Ucat Laman jakenacajj Nefi oraken ucsa toke wasaranac orakenac catupjjañapäna. Ucasti Nefi jakenacan wali suma amuyäwipänwa. Laman jakenacajj jupanacan timanacapïpan take token janiw jupanacat tʼakhesipjjañapäcänti. Uqhämaraqui munañaparjam jaltañanacapatac orakenïñapataquiraquïnwa.

35. Jichhajja, nayajj ucanac arsusinjja, Ammonan Aaronan Omneran Himnin jilanacapampin sarnakäwiparuw cut-tä.