1. Ucat taripirinacan Nefi jakenacjjar sarayäwipan pä tunc pheskan maran kalltäwipana, jupanacajj Moriantonanquir jakenacamp Lehinquir jakenacamp orakenacapat sumancañ ut-tʼayasaw, uca marajj sumancañampiw kalltäna.

2. Ucampis jupanacajj janiw phokhat sumancañ jaya pachatac uca oraken imapcänti, cunalaycutejj jakenac taypin Pahoran jilïr taripirjjat chʼajjwäwejj utjañ kalltäna. Jakenacat mä kawkhanejj leyiruw mä kawkha cunanac turcañ munapjjäna.

3. Ucampis Pahoranajj janiw leyir turcañs turcayañs muncänti. Ucat leyir turcañat kellkatapamp arunacapamp apayir jakenacarojj janiw istʼcänti.

4. Ucat ley turcañ munir jakenacajj jupatac colerasisinjja, jupan jucʼamp jilïr uca orakjjar taripirïñap janiw munapcänti. Ucat jachʼa chʼajjwäwejj ucjjat utjañ kalltäna, ucampis janiw wil wartapcänti.

5. Ucat cawquïrinacatejj Pahoranar taripäw konuñat apakañ munapcän ucanacajja, pʼekechir jakenac satäpjjänwa, cunalaycutejj jupanacajj antutat gobiernor tucuyasaw leyir turcañ pʼekechir uca orakjjar ut-tʼayañ munapjjäna.

6. Ucat cawquïrinacatejj Pahoranan uca oraketac jilïr taripirïscaquiñap munapcän ucanacajja, antutat jakenac sut catjjarupjjäna. Uqhäm jaljatäpjjänwa, cunalaycutejj antutat jakenacajj religionjam lurañ wactʼäwinacap antutat gobiernomp imañatac juräwi, jan ucajja arsüw lurapjjäna.

7. Ucat uca chʼajjwañajj jakenacan arupamp asquichatänwa. Ucat jakenacan arup antutat jakenacatac uñstipana, Pahoranajj taripäw konuñ catuscaquïna. Ucajj Pahoranan jilanacap taypins walja antutat jakenac taypins wali cusisiñ utjayäna. Ucat antutat jakenacajj pʼekechir jakenacaruw amuytʼayapjjaraquïna, jupanacasti antutäwir jarcʼañat ajjsarasaw, uc imapjjañapäna.

8. Jichhajja, uca pʼekechir munir jakenacajj jilïrinacat nacit jakenacänwa, jupanacasti pʼekechirïñ munapjjäna. Uqhämaraqui jupanacajj jakenacjjar chʼamanïña, wactʼäwinïñ munirinacan arcatäpjjänwa.

9. Ucampis Nefi jakenac taypin chʼajjwanac utjañajj ucapachan jan walïnwa. Uca Amaliquiajj Laman jakenacan chuymanacaparojja, Nefi jakenac contraw amtayäna, take orakep toketa nuwasiri jakenac tantachthapiscäna. Jupasti jupanacar armanac laquintasin, jan karisaw nuwasiñatac waquichasiscäna, Moronin wilap umañatac juräwi jupan luratap laycu.

10. Ucampis jupan juräwipan jan amuyump luratap uñjañäni. Ucampis jupajj nuwasiri tamanacapampejj Nefi jakenacamp nuwasir jutañataquiw waquichasïna.

11. Jupan nuwasiri tamanacapajj warank warankanacaw Nefi jakenacan amparapan jiwarapjjäna, ucat janiw nayrjam waljacjjänti. Ucampis waljan tucusc-chïnsa, Amaliquiajj muspharcañ jachʼa nuwasiri tama tantachthapïna, Zarahemla oraker jutañ jan ajjsarañapcama.

12. Amaliquia pachpaw Laman jakenac nayrakat jutäna. Ucasti taripirinacan sarayäwipan pä tunc pheskan maränwa; ucasti Pahoran jilïr taripirit chʼajjwanac asquichañ kalltapcän uca pacharaquïnwa.

13. Ucat pʼekechir jakenac satanacajj Laman jakenacan jupanacjjar jutañapat istʼasaw, chuymanacapan cusisipjjäna. Jupanacasti janiw armanac aptañ munapcänti. Jupanacan jilïr taripiritaqui, antutat jakenacatac jachʼa colerasitap laycuw armanac marcapar arjjatañatac jan aptañ munapcänti.

14. Ucat Moronejj uc uñjasina, Laman jakenacan orak thiyanac jutatap uñjasaraqui, jupajj walja jan karis jan tucusiñamp jupanacar imañatac lurcän uca jakenacan kala chuymanacanïtap laycojj wal colerasïna. Jïsa, jupajj walpin colerasïna; jupan chuymapajj jupanacatac colerasiñan phoktʼatänwa.

15. Ucatsti mä kellkat jakenacan arupamp uca orak sarayirirojj apayäna, jupan uc leyiñap munasa, jupa Moronir chʼam churañap munasaraqui, uca jaychasirinacan marcap arjjatayañataqui, jan ucajja jupanac jan munapcasp ucqhajja, jupanacar jiwayañataqui.

16. Jupan nayrïr munäwipajj uqhäm jakenac taypinquir chʼajjwäwinacamp jaychasïwinacamp tucuyañataquïnwa, ucapachcamajj ucanacaw takpach tucqhatäñaparojj puriyatayna. Ucat jakenacan aruparjam lurasïna.

17. Ucat Moronejj uca jilïr jakenac contraw nuwasiri tamap qhitañatac arsüna, jachʼa jachʼa tucuñapampir aytat tucuñapampir qhusqhachañataqui, lakʼar uñtat taquisiñataqui, jan ucajj, armanac aptayas antutäwit saytʼasiñataqui.

18. Ucat nuwasiri tamanacajj jupanacjjar sarapjjäna, jupanacasti jachʼa jachʼa tucutapa, wali aytat tucutap apakapjjäna. Uqhämaraqui Moronin jakenacapamp nuwasiñatac nuwasiñ armanacap aytapcän ucqhajja, jupanacajj kʼala cʼutsutaw uñjasipjjäna, orakemp qhusqhachatäpjjaraquïnwa.

19. Ucat pusi warank jaychasirinacaw espadamp jiwayatäpjjäna; nuwasïwin jan jiwcän uca jilïrinacapasti taripañatac pachan jan utjatap laycuw, carcelar jakontatäpjjäna.

20. Ucat uca jiltʼir jaychasirinacajj espadamp jawkʼantat tucusiñ lantjja, antutäwiruw jaysapjjäna. Ucatsti antutäw wiphal pucaranacaparu, marcanacapan saytʼayañataquiw waytʼatäpjjäna, uqhämaraquiw marcapar arjjatañataquejj armanac aptayatäpjjäna.

21. Uqhämaw Moronejj uca jakenacar tucqhäna, ucapachatsti, janiw qhitis pʼekechir jakenac sutit uñtʼatäpcänti. Uqhämaw jilïr jaket nacität sir jakenacan jachʼa jachʼa tucutaparu, kala chuymanacaparojj tucqhäna. Jupanacasti jilanacapjam chuymanacap llampʼuptayañatac waytʼatäpjjänwa, mitʼanïtat antutatäwipatac kamasamp nuwasiñatac waytʼatäpjjaraquïnwa.

22. Ucat Moronejj quipca jakenacap taypinquir chʼajjwanac nuwasïwinac tucqhän ucqhajja, sumancañar jakjam luräwinacar jaysayasa, Laman jakenacamp nuwasiñatac waquichayascän uc-chañcamajja, Laman jakenacajj lamar iran ucsa orak thiyanquir Moroni orakeruw jutapjjäna.

23. Ucat Nefi jakenacajj Moroni marcan janiw Laman jakenacat sipan jucʼamp chʼamanïpcänti. Ucat Amaliquiajj waljanir jiwayasaw jupanacar alis-süna. Ucat Amaliquiajj uca marcamp pucaranacamp catuntäna.

24. Ucat Moroni marcat jaltirinacajj Nefia marcar jutasin imantasjjapjjäna. Uqhämaraquiw Lehi marcanquir jakenacajj tantachthapisisaw waquichasipjjäna. Ucatsti Laman jakenacamp nuwasiñataquejj waquichrantatäpjjänwa.

25. Ucampis Amaliquiajj Laman jakenacan Nefia marcamp nuwasir sarañap janiw antutcänti. Antisas jakenac sapa marcan uchäna, lamar iran ucsan kamayasa, sum uñjapjjañapataqui, arjjatapjjañapataquiraqui.

26. Uqhäm jupajj walja marcanaca Nefia marca, Lehi marca, Morianton marca, Omner marca, Gid marca, Mulec marca, take uca inti jals toke thiyanquir lamar iran ucsanquir marcanac catuntascaquïna.

27. Uqhäm Laman jakenacajj Amaliquian chʼiqhi jan wali amuyupamp jan jactʼcay jakenacapamp walja marcanac catupjjäna. Take uca marcanacajj Moronin arjjatañatac chʼamañchäwinacaparjam wali chʼamañchatäpjjänwa; ucanacasti Laman jakenacat arjjatat chekanacäpjjänwa.

28. Ucat waljanir jiwarayasin Nefi jakenac jupanac nayrakatat alis-susajj Jilarquir orake thiyanacar sarapjjäna.

29. Ucampis Moriantonar jiwaycäna, jakenacapar jaltäwipan jarcʼantcän uca Teancumaw jupanacamp jiquisir mistunïna.

30. Ucatsti, uqhämaraquiw Amaliquiajj jachʼa nuwasiri tamapamp Jilarquir oraker alay toke oraker catuñatac sarascän ucqhajja, Teancumajj jupar saytʼayäna.

31. Jupasti Teancumampin jakenacapampin jachʼa nuwasirinacätap laycu, khepar jit-tʼayatäsin munañap jan phokhcänti. Sapa Teancuman jakepajj Laman jakenacat sipan jucʼamp chʼamanïnwa, nuwasiñataquejj wali qhustʼatäpjjaraquïnwa, ucat Laman jakenacarojj atipapjjäna.

32. Ucat jupanacar jaljjatas jaljjatasajj chʼamactʼañcamaw jiwarayapjjäna. Ucat Teancumamp jakenacapampejj chʼujlljam carpanacap Jilarquir orak thiyan ut-tʼayapjjäna. Amaliquiasti uqhäm alis-sutäsinjja, lamar thiya iranar chʼujlljam carpanacap ut-tʼayäna.

33. Ucat arumtʼcän ucapachajj Teancumajj lokeripamp jamasat sarasaw, Amaliquian utjnokäwipar mantapjjäna. Ucatsti lupi urun luräwinacapat wali chʼajjmisitap laycojja, iquiw jupanacarojj wal atipjäna.

34. Ucat Teancumajj pʼekechirin chʼujllpapar jamasat lluscuntasaw, vara law jupan chuymapar chhokhontäna. Ucat pʼekechirirojj mayac jiwtʼayäna, lokerinacapasti janiw iquit sartapcänti.

35. Ucat jupajj pachpa utjnokäwiparuw cut-täna; ucatsti jakenacapajj iquirasipcänwa. Ucat jupajj iquit sartasaw, luratap jupanacar yatiyäna.

36. Ucat nuwasiri tamanacaparojj mäc waquichrantasipjjañapataquiw saytʼayäna, inas Laman jakenacajj iquit sartasin jiwasanacjjar jutapjjchispa–sasa.

37. Uqhämaw taripirinacan Nefi jakenacjjar sarayäwipan pä tunc pheskan marajj tucusiwayäna; uqhämaw Amaliquian urunacapajj tucusiraquïna.