1. Ucatjja, Manti marc catuñ munapjjäyäta. Ucampis janiw cunjämats jucʼa tamanacampejj marcat mistsuyañjamäcänti, jupanacan nanacan ucapachcam luratanacajjat amtasitap laycu. Ucat janiw pucaranacapat sallkjasajj irpsuñjamäcänti.

2. Jupanacajj nuwasiri tamajjat sipan jucʼamp waljanïtap laycusti, janiw pucarapar maqhatasajj jaljjatañ munapcäyät-ti.

3. Ucat wastat catupcäyät uca orakenac imañatac jakenacajjar qhitañaw ucapachajj waquisïna. Ucat Zarahemla oraket jucʼamp jakenacamp juyranacamp catokañajjataquiw suyañajj waquisiraquïna.

4. Ucatsti nayajj qhitanac orakejj-jjar sarayirir qhitäyäta, marcajjan camächäwinacapat yatjjatañapataqui. Ucat juyranac jucʼamp jakenac Zarahemla oraket catokañatac nanacajj suyapjjta.

5. Ucampis uca suyañajj jucʼataquiquïnwa, cunalaycutejj Laman jakenacajj urutjam urutjam jucʼamp jakenacamp juyranacamp catokapjjaraquïna; uqhämaw uca pachan jicjjatasipjjäyäta.

6. Uqhämaraqui Laman jakenacajj mä kawkhat mä kawkharuw nanac contrajj mistunipjjäna, chʼiqhi amuyump lurasin nanacar tucqhañ amtasa. Ucampis jupanacan jaltañ chekanacap pucaranacap laycuw jupanacampejj jan nuwasiñjamäcänti.

7. Ucat uqhäm chʼaman jicjjatasisajja, walja phajjsiw suyapjjäyäta, mankʼat jiwarañampïñajjcamasa.

8. Ucat nanacajj juyranac catokapjjta. Ucajj pä warank jaken nanacar yanapañapatac ejerciton apanitänwa. Uca yanapac catokapjjta, nanac pachpar arjjatasiñataqui, marcasan timanacapan amparanacapar puriñat arjjatasiñataqui. Ucatsti jan jactʼcay timamp nuwasiñataquïnwa.

9. Ucat uca jan waltʼañanacata, jan ucajja, nanacar jucʼamp jan qhitanitapat janiw yatipcäyät-ti, Diosan taripäwinacapan atipatäñajjcam kʼala tucqhatäñajjcam orakesar mä cunjämats jutañapjjat ajjsarañ phoktʼatäpjjäyätwa.

10. Ucat nanacar chʼamañchañapatac timanacajjan amparanacapat khespiyañapataquiw take chuymamp Diosat mayisipjjta. Uqhämaraqui chʼam nanacar churañapataqui marcanacajjs orakenacajjs yänacajjs jakenacajjar mankʼayañatac arjjatañanacajjataquiw mayisipjjaracta.

11. Ucat Dios Tatitusajj nanacar khespiyapjjämaw satapamp tumpapjjetu. Jupajj chuymanacajjaruw sumancañamp phoktʼapjjetu. Nanacar jachʼa iyawsañ churapjjaraquitu. Uqhämaraquiw jupajj nanacar jupan khespiyatäñatac suyayapjjetu.

12. Ucat nanacajj mä jucʼa yanap catokat nuwasiri tamajjampiw kamas catupjjta. Uqhämaraqui timanacajjar atipañ amtapjjta, uqhämaraqui orakenacajja, yänacajja, warminacajja, wawanacajja, antutäwijjar arjjatañ amtapjjaracta.

13. Uqhäm take chʼamanacajjampiw Manti marcancapcän uca Laman jakenac contrajj sarapjjta; marca jacʼan wasar tokeruw chʼujlljam carpanacajj ut-tʼayapjjta.

14. Ucat khepürojj Laman jakenacajj nanacan marca jacʼan wasar token thiyancatajj yatjjatapcän ucqhajja, jupanacajj uñakerinacap nanacan nuwasirinacajjan kawkhätapa, chʼamanïtap yatjjatañataquiw qhitsunipjjäna.

15. Ucatsti, kawkhanïpctejj ucanacan jan chʼamanïpjjatajj uñjasajja, nanacamp nuwasir mistuniñataquiw waquichasipjjäna; mankʼañanac jan jarcʼantayasiñatac ajjsarasa. Janitejj mistunisin nanacamp nuwasipcaspa ucat jiwarayapcaraquitasp uca. Jupanacajj waljanïpjjatap laycojja, jan cunäcaspas uqhämac nanacar tucqhañ amuyapjjäna.

16. Ucat nanacar nuwasiñ mistuñatac waquichasitap uñjasinjja, nayajj Gidaruw mä kawkha jakenacamp wasarar imantasiñapatac mayta. Uqhämaraqui Teomnerarojj mä kawkha jakenacamp wasarar imantasiyaracta.

17. Gidamp jakenacapampejj cupëjjancapjjänwa, yakhanacasti chʼekäjjancapjjaraquïnwa. Ucat jupanacajj uqhäm imantasipcän ucqhajja, nayajj Laman jakenacan nuwasiñatac mistuñapatac chʼujlljam carpanacajj ut-tʼayapcäyät uca quipca chekan jiltʼa nuwasiri tamajjamp kamnokäyäta.

18. Ucat Laman jakenacajj jachʼa nuwasiri tamapamp nanac contrajj mistunipjjäna. Ucat mistunipjjatapata, nanacjjar espadamp jaljjatañampïpcän ucapachaw nayampïpcän uca jakenacajjar wasar toker cut-tapjjañapatac mayta.

19. Ucat Laman jakenacajj wali lakaw arctapjjetu, nanacar catjasin jiwayañ walpin munatap laycu. Ucat wasarar arctapjjetu, nanacasti Gidampin Teomnerampin taypip sarapjjäyäta; jupanacarusti janiw Laman jakenacajj amuyapcänti.

20. Ucat Laman jakenacajj pasapcäna, jan ucajj Laman jakenacan nuwasiri tamapajj pascän ucqharuw, Gidamp Teomnerampejj jamas chekanacapat mistusaw, Laman jakenacan uñakerinacapar marcar jan cut-tañapatac jarcʼakapjjäna.

21. Ucat ucanacar jarcʼakasinjja, marcaruw jalapjjäna, ucatsti, marc arjjatañatac jaytat arjjatirinacar jaljjatasaw tucqhapjjäna, ucat marc catuntapjjäna.

22. Ucasti Laman jakenacan takpach nuwasiri tamap wasarar irpanucuyasitap laycuw luratäna. Mä kawkha arjjatirinacaquiw jan sarapcänti.

23. Uqhämat Gidamp Teomnerampejj pucaranacap catupjjäna. Ucat nanacajj wasaranjam wal saratajjatjja, Zarahemla orak tokeruw sarapjjta.

24. Ucat Laman jakenacajj Zarahemlar saratap amuyasipcän ucqhajja, jupanacar tucqhäwir irpañatac arustʼan utjatapat wal ajjsarapjjäna. Ucat jupanacajj wasarar cut-tañ kalltapjjäna, cawqui chekatejj jutapcän ucanjam sarasa.

25. Ucat arumäjjänwa. Laman jake jilïr capitananacajja, Nefi jakenacan jaltatap laycojj karitäpcaspas uqhäm amuyasisaw, jupanacajj chʼujllanacap ut-tʼayasipjjäna. Takpach Nefi jakenacan nuwasiri tamapar alis-supcaspas uqhäm amuyasaw, Manti marcat jan cuns lupʼipcänti.

26. Ucat arumtʼcän ucqhajja, nayajj jakenacajjarojj jan iquiyasaw Manti orak toker yakha saräwinjam irpta.

27. Ucat uca arum saratajj laycuw khepürojj Laman jakenacarojj khepar jaytjapjjäyäta. Ucat jupanac nayrakataw Manti marcarojj puripjjta.

28. Uqhäm arustʼäwimpiw Manti marc catupjjta, jan wil wartañampi.

29. Ucat Laman jakenacan nuwasirinacapajj marca jacʼar purisaw nanacan jupanacatac waquichasitajj uñjapcän ucqhajja, wali muspharasa, wal ajjsarapjjäna, ucat wasarar jaltjjapjjäna.

30. Ucat Laman jakenacan nuwasirinacapajj take ucsa toke orakenacat jaltjjapjjäna, ucampis walja warminacamp wawanacamp uca oraketjj apapjjaraquïna.

31. Uqhämaraqui Laman jakenacan catut marcanacajj jichhajj nanacan catutäjjewa. Tatanacajjamp warminacajjamp wawanacajjampejj utanacaparuw cut-tapjje; Laman jakenacan catuntat apatäpqui ucanacaquiw jan cut-tapquiti.

32. Ucampis nuwasiri tamanacajjajj ucatak marcanacar arjjatañataquejj jucʼaquiwa, ucatak catuntat orakenac arjjatañataquisa.

33. Ucampis jiwasanacancän uca marcanac orakenac catuñajjcama, uca orakenacjjar atipayapquitu, uca Diosaruw alcatapjjta.

34. Janiw yatipcti cunat-tejj gobiernojj jucʼamp jakenac jan qhitanipquit ucjja. Nanacar jutapquitu, uca jakenacas janiraquiw jucʼamp jakenac jan catokatajj yatipcaraquiti.

35. Ucampis inas jumanacajj jan atipasin, jakenac ucsa toke orakenacar irpapjjsta; janiw nanacajj yatipcti. Uqhämäspajja janiw cuns arusiñ munapcti.

36. Jan uqhämäcaspajja, nanacajj mä jaljtäwi gobiernon utjatapat ajjsarapjjta, uqhämat jucʼamp jakenac nanacar yanapir jan qhitanipjjatapata. Cunalaycutejj yatipjjtwa, qhitanipquit ucat jucʼamp waljanïpjjatapjja.

37. Ucampis janiw cunäquisa. Nuwasiri tamanacajjajj tʼuqhäc-chisa, Diosan nanacar khespiyañaparuw iyawsapjjta, jïsa, timanacajjan amparanacapat khespiyapjjetani.

38. Acajj tunca llätuncan mara tucuyanctanwa. Nanacasti orakenacas catupjjta; Laman jakenacasti Nefi orakeruw jaltjjapjje.

39. Ammonan jakenacapan nayan wali sumaw –sas parlat yokanacapajj nayamp chicaw Manti marcancapjje. Tatituw jupanacarojj uywi, espadan jiwañat arjjati; janiw jupanacat maynis jiwayatäquiti.

40. Ucampis walja chhojjrinac jupanacajj catokapjje; uqhämäcasasa, Diosajj jupanacar ucamp antutqui, uca antutäwin thurtʼasipjje. Jupanacasti sapüruw Dios Tatitupar amtasipjjapuni. Jupanacajj leyinacaparu, amtat munäwinacaparu camächitanacaparojj sapa cutiw phokhapjje; jutcani ucat yatiyäwinacar iyawsäwipajj chʼamaniwa.

41. Jichhajj munat Moroni jilajja, cutsuyquistu, antutatar tucuyquistu, uca Dios Tatitusajj nayrakatapan jumar jan tucus impan. Uqhämaraqui nanacan utjañanacajjataquïcan, Laman jakenacajj aparapquistu take ucanac catupjjañamatac jupajj aca jakenacar qhuyapayas yanap-pan. Jichhajj kellkatajj tucuytwa; nayajj Alman Helaman yokapätwa.