1. Ucat uca Laman jakenacajj jilanacapar jiwayatap laycuw jucʼamp colerasipjjäna, ucat Nefi jakenacar uca luräwit cutsuyañataquiw juräwi lurapjjäna. Jupanacasti janiw ucapachajj jucʼamp Anti-Nefi-Lehi jakenacar jiwayañatac chʼamtʼapcänti.

2. Antisas nuwasiri tamanacapamp Zarahemla orak thiyanacar sarasaw, Ammonia orakenquir jakenacar jaljjatasin jupanacar tucqhapjjäna.

3. Uca khepatjja, jupanacajj Nefi jakenacampiw wal nuwasipjjäna, uca nuwasïwinsti, alisnucutäpjjänwa, jiwatäpjjaraquïnwa.

4. Jiwapcän uca Laman jakenac taypinsti, Amulonampin jilanacapampin sarakerinacapaw jiwatäpjjäna, ucanacasti Noen sacerdotepäpjjänwa; jupanacajj Nefi jakenacan amparapamp jiwayatäpjjänwa.

5. Jan jiwayatanacasti inti jals toke wasararuw jaltjjapjjäna, Laman jakenacat chʼamapamp munañan cancañapamp catokasisajj walja Laman jakenacaruw iyawsäwip laycojj ninan jiwayapjjäna.

6. Waljaniw walja tʼakhesïwinacamp chhakäwimp tʼakhesitap laycu Aaronampin jilanacapampin orakepan jupanacar yatiyat arunacap amtasiñ kalltapjjäna; ucat jupanacajj awquinacapan saranacapat pächasiñ kalltapjjäna, ucat Tatitur iyawsapjjäna, jupan Nefi jakenacar jachʼa chʼam churataparuw iyawsañ ucapachat kalltapjjäna. Uqhämasti waljaniw wasaran Diosar cutiquipstapjjäna.

7. Ucat Amulonan jiltʼa wawanacapajj sarayirinacäsaw, cawquïrinacatejj ucanac iyawsapcän take ucanacar jiwayayapjjäna.

8. Uca walja jiwayäwejj jilanacapat waljaniruw colerasiñ amtayäna; ucat wasaran chʼajjwäwejj utjañ kalltäna; Laman jakenacasti Amulonampin jilanacapampin wawanacapar thakasaw, jupanacar jiwayañ kalltapjjäna. Jupanacasti inti jals tok wasararuw jaltapjjäna.

9. Laman jakenacasti jichhürcamaw jupanacar arcnakasqui; Uqhämat Abinadin arunacapajj phokhasi sacerdotenacan wawanacapjjat ninamp jiwayapcän ucqhajj arscän uca arunacajja.

10. Jupajj jupanacarojj sänwa: Cunjämtejj nayar lurapquität ucajja, jutir cunanacar uñtatäniwa.

11. Abinadiw Diosar iyawsatap laycojj ninan nayrïr jiwayatäcan ucajja; jupasti sañ munäna: Waljaniw nayjam ninan jiwañ tʼakhesipjjani.

12. Jupasti Noen sacerdotenacaparojj sänwa: Wawanacamatjj waljaniw nayjam jiwayatäpjjani; jupanacasti alisnucutäpjjaniwa, jiwayatäpjjaraquiniwa, cunjämatejj jan awatirin ovejajj lakʼonacan alisnakatajj jiwayatäqui uqhäma –sasaw säna. Ucat uca arunacapajj phokhasïna, cunalaycutejj jupanacajj Laman jakenacan alisnakatäpjjänwa, thakatäpjjänwa, jawkʼatapjjaraquïnwa.

13. Ucat Laman jakenacajj Nefi jakenacar atipañatac jan chʼamanïtap uñjasajja, jupanacajj wastat quipca orakepar cut-tapjjäna; waljaniraquiw Ismael orakeru Nefi orakeru utjir jutapjjäna. Jupanacasti Diosan Anti-Nefi-Lehi jakenacapampiw mayachasipjjaraquïna.

14. Jupanacasti jilanacaparjamaw nuwasiñ armanacap imantasin, asqui marcar tucuñ kalltapjjäna; jupanacajj Tatitun thaquipan sarnakasaw, jupan camächitanacaparu leyinacapar phokhapjjäna.

15. Jupanacajj Moisesan leyip phokhapjjäna; Moisesan leyipan jan takpach phokhasitap laycuw, ucar phokhañapajj jupanacar waquisïna. Ucampis Moisesan leyipampisa, jupanacajj Criston jutäwiparuw suyapjjäna, Moisesan leyipan jupan jutäwipat amuyayañataquïtap amuyasisa, jupajj jupanacar uñstayatäcan ucapachcam uca uñjat luräwinac phokhañap iyawsasa.

16. Jupanacajj khespiyasiñan Moisesan leyip toket jutañapjja, janiw iyawsapcänti; antisas Moisesan leyipajj Criston iyawsañaparuw chʼamañchäna. Uqhämaw, iyawsañatjja wiñay khespiyasiñar suyäw catupjjäna, cunatejj jutcani ucanacat parlqui uca jutir urunacat yatiyir ajayur alcatasa.

17. Ucat Ammonamp Aaronamp Omneramp Himnimp jilanacapampejj Laman jakenac taypin suma luratanacapat cusisipjjäna. Mayisïwinacaparjam Tatitun jupanacar churatapata, take cunan arup jupanacar phokhayatapat jupanacajj amuyapjjaraquïna.