1. Ucat taripirinacan Nefi jakenacjjar sarayäwipar pä tunc sojjtan mara kalltäwin uca Laman jakenacajj nayrïr alwatana, nayrïr phajjsin iquit sartapcän ucqhajja, Amaliquiarojj chʼujllapan jiwat jicjjatapjjäna. Uqhämaraqui Teamcuman jupanacamp ucür nuwasiñ waquichasitap uñjapjjaraquïna.

2. Ucat Laman jakenacajj uc uñjasinjja, ajjsarthapipjjänwa, ucat alay toke oraker sarañ munañap jaytanucusaw, takpach nuwasiri tamapamp Mulec marcar jit-tapjjäna; ucansti pucaranacapan arjjatäw thakapjjäna.

3. Ucat Amaliquian jilapaw jakenacjjar pʼekechirit ut-tʼayatäna; jupan sutipasti Ammoronänwa. Uqhämat Amaliquia pʼekechirin Ammoron pʼekechir jilapajj jupa lant sarayañatac ut-tʼayatäna.

4. Ucat jupajj jakenacapar wila wartäwimp catuntat marcanacar imañanacapataquiw camächit churäna. Janiw jupanacajj mä marcs jan wali wila wartäwimpejj catupcänti.

5. Ucat Teancumajj Laman jakenacan catuntat marcanac orakenac catuñan thuruñchatätap uñjasa, waljanïtap uñjasaraquiw, jupajj pucaranacapar jaljjatañan jan waquisitap amuyasïna.

6. Ucampis jupajj jakenacapan nuwasiñatac waquichasisipcaspas uqhämaw ucsa token kamayäna. Chekpacharaquiw jupajj lakʼa ucsa toker kotsus arjjatat chekanac waquichas arjjatasiñatac waquichasiscäna.

7. Ucat jupajj nuwasiñatac uqhäm waquichascaquïna, Moronejj walja jakenac nuwasiri tamapar chʼamañchañatac qhitañapcama.

8. Uqhämaraquiw Moronejj take jupanacan amparapar jaltʼirinac catuntasin catjjäsipjjañapataquiw yatiyäw apayaraquïna. Ucat cunjämatejj Laman jakenacajj walja catuntatanac catupcänjja, uqhämaw jupajj take catuntat Laman jakenac catjjäsiraquïna, Laman jakenacan catuntatanacamp turcañataqui.

9. Uqhämaraquiw jupajj yatiyäw apayaraquïna, jupan Jilarquir oraker chʼamañchañapataqui, alay toke oraker sarir cʼullcʼu simpa orak sum arjjatañapataqui, Laman jakenacan uc jan catuñanacapataqui, take toket jupanacar jaljjatañatac jan chʼamanïñanacapataqui.

10. Uqhämaraquiw Moronejj jupan ucsa toke orakenac sum imañätap munasaw jupar apayaraquïna. Sapa cuti Laman jakenacar ucsa toke orakenacan llaquisiyañapa, jupan chʼamaparjam mä arustʼäwimpi, jan ucajja, yakha cunamp amparanacapat aparat marcanac inas wastat catuñapächisp uqhäm jupat munaraquïna. Uqhämaraqui jupan ucsa toke Laman jakenacan amparanacapar jan purit marcanacar chʼamañchañap munaraquïna.

11. Uqhämaraquiw jupar saraquïna: Nayajj jumanacarojj maqhatjjapjjerismawa, ucampis Laman jakenacajj inti jalant toke orak thiyan nanacjjar jutapjjaraquitu; nayasti jupanacjjaruw sarä, ucat jumanacamp jan chicachasipquirismati.

12. Jichhajja, pʼekechirejj (Ammoron) Zarahemla oraket mistusaw, pʼekechirin warmipar jilapan jiwatapat yatiyäna. Ucat walja jakenac tantachthapisaw Nefi jakenacjjaru, inti jalant toke lamar thiyanac toker saräna.

13. Uqhäm jupajj Nefi jakenacar jaljjatasajj nuwasiri tamanacapat mä kawkha ucsa toke orakenacar apaniñ munäna. Uqhämaraqui catut marcanac catuñatac jaytat jakenacar jupanacan Nefi jakenacar inti jals toke lamar thiyanac ucsan jaljjatañanacapatac waquiycaspas uqhäm nuwasiri taman chʼamaparjam orakenacapar catuñanacapatac yatiyäw apayaraquïna.

14. Uqhämaw taripirinacan Nefi jakenacjjar sarayäwipan pä tunc sojjtan maran tucuyäwipan Nefi jakenacajj uca jan walir puripjjäna.

15. Ucampis taripirinacan sarayäwipan pä tunc pakallkon marana, Teancumajj Moronin yatiyäwiparjama – Moronejj aynach toke inti jalant toke orake thiyanacar arjjatañatac ejercitonac ut-tʼayatayna, ucat Jilarquir orak tokeru, Teancumampir jakenacapampir chhakat marcanac wastat catuñataqui yanapañataquiw saräwip kalltaraquïna –

16. Ucatsti Teancumajj Mulec marcar jaljjañapatac waquiscaspas uqhäm wastat catuñapataquiw yatiyäw catokäna.

17. Ucatsti Teancumajj Mulec marcar jaljjañataqui, nuwasiri tamapamp Laman jakenacjjar sarañataquiw waquichasïna. Ucampis jupanacajj pucaranacapancapcän ucapach jupanacar jan atipañap amuyasïna. Ucat munäwinacap jaytanucusin, Jilarquir marcar wastat cut-täna, Moronin puriniñap suyañataqui, nuwasiri tamapar chʼamañchañapataqui.

18. Ucat taripirinacan Nefi jakenacjjar jaytat jakenacar jupanacan Nefi jakenacar inti jals toke lamar thiyanac sarayäwipan pä tunc pakallkon maran tucuyäwipan Moronejj nuwasiri tamapamp Jilarquir oraker purïna.

19. Ucat pä tunca quimsakallkon maran kalltäwipan Moronimp Teancumamp walja jilïr capitananacampejj nuwasiñataquiw arustʼäw lurapjjäna, Laman jakenacar jupanacamp nuwasiñatac mistuyañanacapataqui, cuntejj lurapjjañapäcän ucata, jan ucajja, mä cunjämats pucaranacapat sallkjas mistuyañanacapataqui, jupanacar atipasin wastat Mulec marc catuñanacapatac uqhäm yatiñanacapataqui.

20. Ucatsti, Mulec marcar arjjatcän uca Laman jake nuwasiri taman jilïripan uc qhitanac qhitäna. Uca jilïrin sutipajj Jacobo satänwa. Juparuw mayïna nuwasiri tamapamp mistunisin jupanacamp nuwasiñataqui, pä marca taypi pampanacana. Ucampis Jacobojj Zoram jakësinjja, janiw nuwasiñataquejj nuwasiri tamapamp uca pampar mistuñ muncänti.

21. Ucatsti, Moronejj nuwasïw pampan jan jiquisirjamäjjasinjja, sallkjañampiw Laman jakenacarojj pucaranacapat irpsuñ amtäna.

22. Ucat Teancumaruw jucʼa jakenacamp lamar iran toker qhitäna; ucatsti Moronejj nuwasiri tamapampejj arumaw Mulec marcat inti jalant toke wasarar saräna. Ucat khepürojja, Laman jakenacan arjjatirinacapajj Teancumar uñjasaw, Jacob jilïripar jalasin uc yatiyapjjäna.

23. Ucat Laman jakenacan nuwasiri tamanacapajj Teancumar jucʼaniquïtap laycu, waljaninacamp atipcaspas uqhäm amuyasaw, Teancumjjar sarapjjäna. Ucat Teancumajj Laman jakenacan nuwasiri tamanacapar jupjjar mistur uñjcän ucqhajja, jupajj lamar irananjam alay toker jitjtañ kalltäna.

24. Ucat Laman jakenacajj jupan jaltatap uñjasaw, kamas catusin wal jupanacar arctapjjäna. Ucat Teancumajj Laman jakenacan inamay jupar arctir nuwasiri tamanacap irpsuscän ucapachajja, Moronejj jupamp chicaw nuwasiri tamapat mä kawkhanir uca marcar mantayas catuñapatac qhitäna.

25. Uqhäm lurasaw jupanacajj uca marcar take arjjatir jaytatanacar jiwarayapjjäna; jïsa, cawquïrinacatejj nuwasiñ armanacap jan churañ munapcän ucanacaruw jiwayapjjäna.

26. Uqhäm Moronejj mä kawkha nuwasiri tamapamp Mulec marc catuntäna, ucat jiltʼirimpisti, Laman jakenacar jicjjatiriw mistüna, Teancumar arctatap khepat cut-tapcaspa ucapachajja.

27. Ucatsti, Laman jakenacajj Teancumaruw arctapjjäna, Jilarquir marc jacʼar jutañapcama. Ucaruw Lehimp mä jucʼa nuwasiri tamapamp jiquisirejj mistupjjäna, ucajj marc uñjañatac jaytatänwa.

28. Ucat Laman jakenacan jilïr capitananacapajj Lehir nuwasiri tamapamp jupanacjjar jutir uñjapcän ucqhajja, jan camächirjamäsaw jaltjjapjjäna, janïr jupanacajj Mulec marcar puripcän ucapach Lehin jupanacar jan catjañapataqui; cunalaycutejj jupanacajj saräwip laycojj karitäpjjänwa, Lehin jakenacapasti juyaquïpjjänwa.

29. Jichhajja, Laman jakenacajj Moronin nuwasiri tamapan khepapancatap janiw yatipcänti, jupanacasti Lehimpitac jakenacapampitaquejj ajjsarapjjänwa.

30. Jichhajja, Lehejj jupanacan Moronimp nuwasiri tamapamp jiquisiñapcamajj janiw jupanacar catjañ muncänti.

31. Ucat Laman jakenacajj janïr jayar sarapcän ucqhajja, jupanacajj Nefi jakenacan muyuntatäpjjänwa. Maysäjjat Moronin jakenacapajj jutäna, maysatsti Lehin jakenacapaw jutaraquïna. Takpachaniw ucanacajj samaratäpjjäna chʼamanïpjjaraquïna. Ucampis Laman jakenacajj jaya saratap laycojja, karitäpjjänwa.

32. Ucat Moronejj jakenacapar nuwasiñ armanacap catuyañapcamaw jupanacar jaljjatañatac arsüna.

33. Ucat Jacobojj jilïripäsina, Zoram jakësaraqui, jan atipcay chuymanïsajj Laman jakenacar wali jachʼa colerasiñampiw Moron contrajj irptäna.

34. Moronin saräw jarcʼantatapatjja, Jacobojj jupanacar jiwarayañataquejj mayac chuymtʼäna, ucatsti Mulec marcacam puriñataquiw thac jistʼjasïna. Ucampis Moronimp jakenacapampejj jucʼamp chʼamanïpjjänwa, ucat Laman jakenac nayrakatat jan onjjtapcänti.

35. Ucat purapat jachʼa colerasiñamp nuwasipjjäna. Purapana, waljaniw jiwarayatäpjjaraquïna; Moronejj chhojjriñchatänwa, Jacobosti jiwayatänwa.

36. Ucat Lehin chʼaman jakenacapamp khepäjjat muspharcañ colerasiñamp jaljjatatap laycuw khepanquir Laman jakenacajj nuwasiñ armanacap catuyapjjäna. Jiltʼirinacasti jan camachtʼañ amuyasisajja, janiw cawqhar sarataps qhitir jawkʼataps yatisipcänti.

37. Ucat Moronejj jan camachtʼañs amuyasitap uñjasisajja, jupanacaruw säna: Jumanacatejj nuwasiñ armanacam apanisin churapjjetätajja, janiw jucʼamp wilam wartapcämati.

38. Ucat Laman jakenacajj uca arunac istʼasinjja, take jan jiwayat jilïr capitananacapajj nayrakatar maqhatasaw, nuwasiñ armanacap Moronin nayrakatapar liwnokapjjäna. Uqhämaraqui jakenacapar quipc lurañanacapatac sapjjaraquïna.

39. Ucampis waljaniw jan munapcänti; ucat uca jan espadanac churañ munirinacajja, catjatäsin ñachʼantatäpjjänwa, nuwasiñ armanacapasti jupanacat apakatänwa. Ucat jupanacajj jilanacapamp Jilarquir oraker irpatäpjjäna.

40. Jichhajja, catuntat jakenacajj jiwayatanacat sipan jucʼampïnwa, purap toket jiwarayatäpcän ucanacats jucʼampiraqui.