1. Ucat Moronin jilïr sarayir kellkat apayatapat mä jucʼa pacharojj, jupajj Pahoran jilïr sarayirit kellkat catokäna. Acanacaw catokat arunacajja:

2. Naya aca oraker jilïr Pahoran sarayirejja, aca arunac Moroni nuwasiri tamatac jilïr capitanar apayta. Nayajj juma Moroniruw sisma: Janiw tʼakhesïwinacamat cusiscti, antisas ucanacajj chuymajjarojj wal llaquisiyi.

3. Ucampis tʼakhesïwinacamat cusisirinacajj utjiwa, jupanacasti nayar antutat jakenacäpqui uca jakenacajjaruw kallcatapjjetu. Uca kallcatirinacasti waljapuniwa.

4. Taripäw konuñ nayat aparañ munapquitu ucanacaw aca jachʼa ñankh luririnacajja. Jupanacajj walja alek jachʼar aptir arunac arsusaw walja jakenacan chuymanacap irpakapjje; ucasti jiwasanac taypirojj jachʼa tʼakhesïw apanini. Jupanacaw juyranacasjj catjjäsisipjje, antutat jakenacarusti jan juman uc jutapjjañapataquiw amtayapjje.

5. Jupanacasti nayarojj alis-supjjetuwa. Nayasti Gedeon orakeruw take nayamp jutañ munirinacamp jalt-ta.

6. Nayasti acsa toke oraker yatiyäw apayta. Sapüruraquiw tam tama jakejj puriniraqui, marcaparu antutäwipar arjjatañ armanacap aptasa, nanacar tucqhañ munapjjatapat cut-tayañataqui.

7. Jupanacan wal nanacar jutatap laycojja, kallcatirinac contra nuwasiñataquiw saytʼasipjjta. Jupanacasti nanacar ajjsarapjjetuwa, ucat nanacamp nuwasir mistuniñ ajjsarapjje.

8. Jupanacajj Zarahemla orake, jan ucajj Zarahemla marc catuntasipjje. Ucatsti pä pʼekechir ajllisipjje. Jupasti Laman jakenacan pʼekechiriparuw mä kellkat apayi, jupamp mayachasiñatac amtäw lurasa. Uca amtäwipana, jupajj Zarahemla marc imañatac jaysi; ucas Laman jakenacarojj jiltʼir orakenac catuntañ yanapcaspas uqhäm amuyasa, ucatsti aca jakenacajj Laman jakenacan atipatäpcän ucqhajja, jupan jupanacjjar pʼekechirjam uscutäñap amuyi.

9. Jumajj kellkatamanjj nayar tokesistawa, ucampis ucajj janiw cunäquisa, janiw nayajj ucat colerascti. Antisas chuymaman jachʼätapat cusista. Naya Pahoranajj janiw jakenacjjar chʼamanïñ muncti. Jan ucasti, taripäw konuñac catjjäsiñ munta, marcajjan antutäwipamp cunatejj wactʼqui ucanacamp imañac muntjja. Diosajj ucan antutapquistu uca antutäwin chuymajjajj thurtʼata.

10. Jichhajja, nanacajj wil wartañcamaw ñankhanacjjar thurtʼasipjjä. Laman jakenacajj quipca orakepan kamapjjaspajja, janiw jupanacan wilap wartapquirist-ti.

11. Jilanacajjatejj jan kallas espad nanac contra jan aptapcaspajja, janiw jupanacan wilap wartapquirist-ti.

12. Diosan chekapar uñjañatac waquisispajja, jan ucajja, jupatejj ucatac camächit churapjjetaspajja, yucurjamaw mitʼaniptayasipjjerista.

13. Ucampis janiw timanacasar jaysañatac camächit churapquistuti. Antisas jupar alcatañasataquiw camächit churistu, ucat jupajj khespiyapjjestani.

14. Uqhämasti munat Moroni jilajja, ñankhar thurtʼasiñäni. Cawquïr kallcatäwinac chʼajjwäwinacjam ñankharutejj arunacasamp jan thurtʼascsnajja, antutäwis imañataqui, jachʼa iglesiasan qhuyapayäwipat cusisiñasataqui, Cutsuyir Diosasan munäwipar cusisiñasatac espadanacasamp saytʼasiñäni.

15. Ucat mä kawkha jakenacamp jancʼay jutam. Jiltʼirinacsti Lehimpin Teancumampin sarayatäñapatac jaytanim. Ucat Lehir Teancumar chʼam churam ucsa toke oraken Diosan Ajayuparjam nuwasïwir sarayañapataqui; ucasti jupanacanquir antutäw Ajayuraquiwa.

16. Nayajj mä kawkha juyranac apayanipjjsma, juman jutañamcan jan tucusiñanacapataqui.

17. Acar jutasasti, waquisirïc uca nuwasiri tama tantachthapim. Ucat jiwasajj uca kallcatirinacjjaruw Diosasan chʼamapamp jiwasancqui uca iyawsäwirjamajj lak sarañäni.

18. Ucat Zarahemla marc catuntañäni, Lehir Teancumar jucʼamp juyranac apayañasataqui. Jiwasajj Tatitun chʼamapampiw jupanacjjar sarasin uca jachʼa ñankha luräwinac tucuyañäni.

19. Jichhajja, Moroni, nayajj kellkatam catokasajj cusistwa. Cunalaycutejj janiw cuns lurirjamäcäyät-ti, jilanacasamp nuwasir sarañajjan asquïtaps jan asquïtaps jan yatisaw llaquisïyäta.

20. Ucampis jumajj sistawa: Janitejj jupanacajj cutiquipstapcanejja, Tatitojj jupanacamp nuwasir sarañataquiw camächit churitu.

21. Lehir Teancumar Tatitun chʼamañcham, jupanacar jan ajjsarapjjpat sam. Diosaw jupanacarojj khespiyani. Jïsa, uqhämaraqui take qhitinacatejj thurtʼasipqui, cuna antutäwintejj Diosajj antutat tucuyqui ucana. Jichhast munat Moroni, jilajjar kellkatajj tucuyta.