1. Ucat Laman jakenacan pʼekechiripajj takpach jakenacaruw yatiynokäw apayäna, jakenacan Ammonaru Aaronaru Omneraru Himniru, Diosan arup mayni yatiyir sarir jilatanacapar jan cun camächapjjañapataqui, cawqhantejj jupanacajj jicjjatasipcasp uca chekana takpach orakepana.

2. Uca pʼekechirejj jupanacar jan ñachʼantañanacapataqui, carcelar jakontañanacapataquiw yatiynokäw apayäna. Janiraquiw thuscataña, jawkʼaña, sinagoganacapat alis-suña, asutʼiña, ucanac jupanacar lurapjjañapäcänti. Janiraquiw kalanacamp jupanacar cʼuphapjjañapäcänti, antisas jupanacarojj utanacaparu, kollan utanacaparu, kollan chekanacaparojj mantayasipcaquiñapänwa.

3. Uqhäm pʼekechirimpin take utapanquirinacapampin Tatitur cutiquipstatap laycuw, jupanacajj munañaparjam ar yatiyir sarnakapjjañapäna. Ucat pʼekechirejj takpach orakeparu, jakenacaparu Diosan arup jan jarcʼapjjañapataquiw yatiynokäwip apayäna. Uqhämaraqui arun uc-chʼpach oraker sarañapataqui, jakenacapan awquinacapan saranacapan ñankhätap iyawsañataqui, takpachanin jila purätap amuyasipjjañapataqui, jiwayaña lunthatjaña lunthataña wachokaña cawquïr ñankha luraña jan lurapjjañapar iyawsayañataquiw, uca arojj jupanac taypir sarañapäna.

4. Jichhajja pʼekechirejj uca yatiynokäw apaycän ucqhajja, Aaronamp jilanacapampejj marcat marcar yupaychañ utat yupaychañ utaru, iglesianac ut-tʼayasa, sacerdotenacar yatichirinacar uca oraken Laman jakenac taypin, Diosan arup Laman jakenac taypin yatiyañataqui ut-tʼayasaw sarapjjäna. Uqhämat waljanir iyawsayañ kalltapjjäna.

5. Warank warankanacaw Tatitut yatïwir puriyatäpjjäna; jïsa warank warankanacaw Nefi jakenacan saranacapar iyawsayatäpjjäna. Jupanacajj jichhacamaw catuyat kellkatanacata, yatiyäwinacat yatichatäpjjäna.

6. Tatitojj cunjämatejj chekpach jacqui, uca pachpa chekampi cawquïrinacatejj iyawsapcäna, jan ucajja, Ammonampin jilanacapampin jutir urunacat yatiyir Ajayur Diosan yatiyir ajayurjam yatiyañanacapana, Diosan chʼamapajj jupanacan muspharcañanac lurcäna, ucat cawquïrinacatejj chekat yatïwir puriyatäpcänjja – jïsa, nayajj sapjjssmawa: cunjämatejj Tatitojj jacqui, uca pachpa chekampiw cawquïr Laman jakenacatejj yatiyäwinacapar iyawsas Tatitur cutiquipstapcän ucanacajj janipiniw ucat sarakapcänti.

7. Jupanacajj asqui marcaruw tucupjjäna, kallcatäwipan armanacap apanucupjjäna, ucatsti janiw jucʼamp Dios contrajj saytʼapcänti, janiraquiw cawcnïr jilanacap contras saytʼapcaraquïnti.

8. Jichhasti, acanacaw Tatitur cutiquipstapcän ucanacajja.

9. Ismael orakenquir Laman jakenaca;

10. Midoni orakenc-cän uca Laman jakenacata;

11. Nefi marcanc-cän uca Laman jakenacata;

12. Uqhämaraqui Silom orakenquiri, Semlon orakenquiri, Lemuel marcanquiri, Simnilom marcanquiri Laman jakenacata.

13. Ucanacajj Tatitur cutiquipstat Laman marcanacan sutinacapawa. Ucanacaw kallcatäwipan armanacap apanucupjjäna. Jïsa, take nuwasiñ armanac apanucupcän ucanacajja, Laman jakenac-camaquïnwa.

14. Amalequitanacatsti mayniquiw Diosar cutiquipstäna. Janiraquiw maynis amulonitanacatjj Diosar cutiquipstcänti. Antisas jupanacajj chuymanacap kalaptayapjjäna, uqhämaraqui Laman jakenacan chuymanacap chʼollkheptayapjjäna. Jïsa, take jupanacan marcanacapana, estancianacapana, uqhäm chʼollkheptayapjjaraquïna.

15. Ucat juchanacapat cutiquipstasin chekat yatïwir puris Tatitur cutiquipstapcän take uca marcanacan sutinacap ayt-tan.

16. Ucat pʼekechirimp Diosar cutiquipstatanacampejj jupanacan jilanacapat uñtʼañapataquiw sut munapjjäna; ucat pʼekechirejj Aaronampir walja sacerdotenacapampiruw jisctʼäna, cuna sutimpitejj uñtʼatäcaspajj uc arustʼañataqui.

17. Ucat jupanacajj Anti-Nefi-Lehi sutimpiw satäpjjäna; uca sutit uñtʼatäsasti, janiw jucʼamp Laman jakenaca satäpcänti.

18. Jupanacajj wali trabajir marcaruw tucupjjäna, jupanacasti Nefi jakenacampejj sumancapjjänwa; ucat jupanacajj Nefi jakenacamp alaquipasipjjäna, Diosan ñankhachäwipasti janiw jucʼamp jupanacar arctjjänti.