1. Ucat Ammonan jakenacapajj Jerson oraken ut-tʼayatäpcän uca khepatjja, iyawsiri tamajj Jerson oraken ut-tʼayatataraquïnwa, Nefi jakenacan nuwasiri tamanacapasti, Jerson oraker muyuntayatänwa, jïsa, take Zarahemla orak thiyanacan uchantata. Ucatsti Laman jakenacan nuwasiri tamanacapajj jilanacaparuw wasarar arctapjjäna.

2. Ucat jachʼa nuwasïwiw utjäna. Lehejj Jerusalenat mistcän ucapachatjja, take uca orakenacanjj janipiniw uqhäm jachʼa nuwasïwejj utjcänti; warank warank Laman jakenacaruw jiwarayapjjäna, jiltʼirinacasti take tokeruw chʼeketatayatäpjjäna.

3. Uqhämaraquiw Nefi jakenac taypinjja, jachʼa jiwayasïwejj utjäna. Ucampis Laman jakenacajj alisnucutäpjjänwa, ananucutäpjjaraquïnwa. Nefi jakenacasti orakeparuw wastat cut-tjjapjjäna.

4. Ucapachajj takpak uca oraken Nefi jakenac taypin wali llaquisiñamp jaqhusiñampiw istʼasïna.

5. Ijmanacajj chachanacapat jaqhusipjjäna, tatanacajj yokanacapat llaquisipjjäna, phuchanacasti jilanacapat jachapjjäna, jilanacasti awquinacapat llaquisipjjaraquïna. Ucat takpach jupanac taypina, jiwarayat familianacapat jaqhusitajj istʼasïna.

6. Chekpach ucajj llaquisiñ urünwa. Ucapachajj walja amuyump lupʼisa ayunas mayisiñaw utjäna.

7. Uqhämaw taripirinacan Nefi jakenacjjar sarayäwipan tunca pheskan mara sarakasajj tucusiwayäna.

8. Uqhämaw Ammonampin jilanacapampin sarnakäwinacapajja, Nefi oraken saräwinacapa, uca oraken tʼakhesïwinacapa, llaquisïwinacapa, tʼakhesiyatätanacapa, jan amuycay cusisiñanacapa, Jerson orakenquir jilanacan arjjatat catokatäñanacapat yatiyäwiwa. Jichhasti, Tatitojj take jakenacar cutsuyirejja, jupanacar wiñay qhuyapaypan.

9. Acaw Nefi jakenac taypin nuwasïwinacat chʼajjwanacat Nefi jakenacamp Laman jakenacamp nuwasïwinacat kellkatajja. Taripirinacan sarayäwipan tunca pheskan marasti tucusitawa.

10. Ucat nayrïr marat tunca pheskan maracamajja, walja warank jakenacaw tucqhatäna, walja wilaraquiw ajjsarcañjam wartataraquïna.

11. Warank warankan janchinacapaw oraken imantatäpjje, yakha warank warankan janchinacapasti orak patan kot-thapitaw thujsasipqui. Walja warank warankanacajj familianacapat llaquisipjjaraqui, jupanacanjj jan tuc-cay tʼakhesiñar Tatitun arsüwinacaparjam familianacapan ajjsarañ chekar qhitatäñapan utjatap laycu.

12. Walja warank jakenacaraquiw familianacapat chekpachapun llaquisipjje, ucampis familianacapan Diosan cupëjjapan jan tuc-cay cusisiñan utjir aptatäñapatac suyasaw jupanacajj anch cusisipjje; jïsa, Tatitun arsüwinacaparjamaw jupanacajj uc yatiyapjjaraqui.

13. Uqhämat uñjtan cunj jachʼas jaken jan quicpaquïñapajj juchïpana, camächit pʼaquintañïpana, supayan chʼamapïpana, jupaw sipitjam catuñataquejj chʼiqhi arustʼat luräwinacapampejj jakenacan chuymapjj quitunti.

14. Uqhämat Tatitun uva yapupan take chuymamp trabajir jakenacan munasitap waquisitapa; uqhämat uñjtan aykoñan utjatapa, uqhämarac cusisiñan utjatap uñjaractan – llaquisiñajj jiwañampit tucqhañampit jakenac taypinjj utji. Cusisiñasti Criston jacañar irpir khanapat utji.