1. Ucat Moronejj uca kellkat catokcän ucqhajja, jupajj jucʼamp colerasïna, cunalaycutejj jupajj Ammoronan phokhatpach sallkjapat yatitap yatïna. Jupajj Ammoronan jan asqui cunatac Nefi jakenacjjar nuwasïw luratapat yatitap yatiraquïna.

2. Ucat jupajj säna: Janitejj kellkatajjanjam siscta, uqhämar munäwip jaytanuc-canejja, janiw catuntatanac turc-cäti; jupajj catquis, ucat jucʼamp chʼamanïñjj janiw jupar churcäti.

3. Laman jakenacajj catut jakenacajjar imapqui ucan cawqhancatapjj nayajj yat-twa. Ammoronan kellkatajjarjam jan catuyatap laycuw arunacajjarjam jupar cutsuyä; nayajj jupanac taypin jiwayascaquïwa, sumancañatac mayiñapcama.

4. Ucat Moronejj uca arunac arsusinjja, jupajj jakenacap taypin Lamanat saraker mä jak thakayäna.

5. Ucat mayniruw jicjjatapjjäna, jupan sutipasti Lamanänwa. Jupajj Amaliquian jiwayat pʼekechirin mä lokeripänwa.

6. Ucat Moronejj Lamanampir mä kawkha jakenacampirojj Nefi jakenacar uñjir arjjatirinacan uc qhitäna.

7. Jichhajja, uca Nefi jakenacajj Gid marcan imatäpjjänwa; ucat Moronejj Lamanar ajllisaw, mä kawkha jakenacar jupamp chic qhitäna.

8. Ucat arumtʼcän ucqhajja, Lamanajj Nefi jakenacar uñjir arjjatirinacan uc saräna, jupanacasti juparojj jarcʼapjjänwa. Ucampis jupanacarojj sänwa: Jan ajjsarapjjamti, nayajj Laman jakëtwa. Nanacajj Nefi jakenacat khespisaw jaltanipjjta, jupanacajj iquirasipquiwa. Nanacasti vinopat apakanisaw nanacamp chic apanipjjta.

9. Laman jakenacasti uca arunac istʼasinjja, cusisiñampiw juparojj catokapjjäna, juparusti sapjjaraquïnwa: Vinomat umañajjatac wajjtʼapjjeta. Nanacajj jumanacamp vin apanitamat cusisipjjta, nanacajj chʼama lakʼäpjjtwa.

10. Ucampis Lamanajj jupanacarojj sänwa: Aca vinjja Nefi jakenacamp nuwasir sarapcañän ucapachcamaw imapjjañäni. Ucampis uca satapajja, vinot umañ jucʼamp jupanacarojj munayäna.

11. Jupanacasti sapjjänwa: Nanacajj karitäpjjtwa, vinotjj umtʼayapjjaquita –sasa. Mä jucʼampirojja, wactʼapquit uca vin catokapjjä; ucaw Nefi jakenacamp nuwasir sarañataquejj chʼam catjjatayapjjestani.

12. Ucat Lamanajj jupanacar säna: Munañamarjam lurapjjam.

13. Ucat vinotjj jan amuyumpiw umantapjjäna, vinon sumätap laycusti jucʼamp umantapjjäna. Uca vinojj wal umjayañatac waquichatätap laycu.

14. Ucat jupanacajj umasajj wali cʼuchiquïpjjänwa. Ucat mä jucʼa pacharojj takpachaniw umaratäpjjäna.

15. Ucat Lamanamp jakenacapampejj jupanacan takenin umatätap uñjasinjja, jiwatjam iquiratanacap uñjasaraquiw, jupanacajj Moronin ucar cut-tawayjjapjjäna, ucatsti cunatejj camächcän ucanacat jupar yatiyapjjäna.

16. Ucajj Moronin munañaparjamänwa. Moronisti jakenacapar nuwasiñ armanacamp waquichasinjja, Laman jakenacajj jiwatjam iquiratäpcän umaratäpcaraquïn ucapachaw Gid marcar qhitäna, catuntatanacar nuwasiñ armanac jakontayäna, takenin armanïñapcama.

17. Warminacapans cawquïr wawanacatejj arm aptañ chʼamanïpcasapäna ucanacans armanacanïñapcama, Moronejj take uca catuntatanacar armanac laquintcän ucapachajja; take ucanacaw jan qhitin istʼcañ lurasïna.

18. Ucampis jupanacatejj Laman jakenacar iquit sartayapjjasapäna, jupanac umaratïpan Nefi jakenacajj jupanacar jiwayapjjasapänwa.

19. Ucampis ucajj janiw Moronin munäwipäcänti. Jupajj janiw jiwayañat wil wartañat cusiscänti; antisas marcapar tucqhäwit khespiyañan cusisïna. Ucat jan jupajj jan asqui luräw jupjjar apancaspati, jupajj janiw Laman jakenacjjar umatïpan jupanacar jaljjatasin tucqhayañ muncänti.

20. Ucat jupajj munañap phokhäna. Jupajj marca perkanac mankhanquir Nefi jake catuntatanacar armanac churäna, jupanacarusti perka mankhawjanac catuñataquiw chʼamañchäna.

21. Ucat jupamp chictʼat jakenacar jupanacat mä kawkhan jit-tayasaw Laman jakenacan nuwasiri tamanacapar muyuntayäna.

22. Ucasti arumaw lurasïna. Ucat Laman jakenacajj khepärmanthi iquit sartapcän ucqhajja, jupanacajj ankan Nefi jakenacan muyuntat mankhan catuntatanacan armanacanïtap uñjapjjäna.

23. Ucat Nefi jakenacan jupanacjjar chʼamanïtap uñjapjjäna. Uqhäm jicjjatasisin, Nefi jakenacamp nuwasiñan jan waquisitap amuyapjjäna. Ucat jilïrinacapajj nuwasiñ armanacap mayipjjäna, ucatsti ucanac apanisaw, Nefi jakenacan nayrakatapar liwnokapjjäna, qhuyapayäw mayisa.

24. Ucasti Moronin munäwipänwa. Jupajj jupanacaruw catuntayäna, ucatsti marc catuntayaraquïna, catuntat Nefi jakenacarusti antutayänwa. Jupanacasti Moronin nuwasiri tamapar mantasaw, jachʼa chʼaman nuwasiri tamar tucuyapjjäna.

25. Ucatsti catuntat Laman jakenacarojja, Gid marc muytir arjjatañanac chʼamañchañataquiw trabajañ kalltayäna.

26. Ucat munañaparjam Gid marcar chʼamañchcän uca khepatjja, catuntatanacap Jilarquir marcar irpayäna. Uqhämaraquiw uca marcarojj wali jachʼa nuwasiri tamamp uñjayaraquïna.

27. Ucat take Laman jakenacajj sallka amuyumpis take cun lurapc-chïnsa, Nefi jakenacajj take catut catuntatanacaruw catjjäsipjjäna. Uqhämaraqui cunanactejj wastat catusjjapcän uca orak catjjäsisjjapjjaraquïna.

28. Uqhämat Nefi jakenacajj wasitat atipañ kalltapjjäna, uqhämaraquiw wasitat cutjtayasjjapjjäna cunatejj jupanacar wactʼqui take ucanaca.

29. Walja cutiw Laman jakenacajj arum chʼamacan jupanacar muyuntañatac yantʼapjjäna. Ucampis uca yantʼäwinacanjj walja catuntatanac apakayasipjjäna.

30. Walja cutiraquiw vinopat Nefi jakenacarojj machjayañ yantʼapjjäna, venentʼas jiwarayañataqui, jan ucajj machcäwir jiwarayañataquisa.

31. Ucampis Nefi jakenacajj uca tʼakhesiñ pachanjja, Dios Tatitupat jucʼamp amtasipjjäna. Jupanacajj janiw Laman jakenacan sipitanacaparojj jaltʼapcänti. Janiw Laman jakenacan vinopat umapcänti, mä kawkha catuntat Laman jakenacar janïr umtʼaycasajja.

32. Uqhäm venen jan loktayasiñataquejj walpun amuyasipjjäna. Jupanacan vinopatejj mä Laman jaker venentʼaspajja, mä Nefi jakerojj venentʼaraquispawa. Uqhäm take umañanacap yantʼapjjäna.

33. Ucatsti, Moronin Morianton marcar jaljjatañapatac waquichasiñapaw waquisïna, cunalaycutejj Laman jakenacajj luräwinacapampiw Morianton marcan wali chʼaman jarcʼjjäsit pucarar tucuñapcam chʼamañchapjjäna.

34. Jupanacasti sapa cutiw machak nuwasirinaca, jucʼamp juyranaca, uca marcarojj purintayanipjjäna.

35. Uqhämaw taripirinacan Nefi jakenacjjar sarayäwipan pä tunca llätuncan marajj tucusïna.