1. Jichhasti, Helaman wawajja, nayar catuyatäcän uca kellkatanac catokañamataquiw camächit chursma.

2. Uqhämaraqui nayjama, aca marcan sarnakäwinacapat Nefin tʼalpha lekʼetanacapar kellkañamataqui, nayjam take acanacar kollanjam imañamataquiw camächit churaracsma. Ucanacasti suma amuyat amtäwit imatawa.

3. Uqhämaraqui, aca broncet lurat tʼalpha lekʼetanac catuyaracsma. Ucanacan kellkataw kollan kellkatanacajja, kalltatpach lakʼa achilanacasan sutinacapasa.

4. Awquinacasajj aqhämaw yatiyapjjäna: Aca tʼalpha lekʼetanacajj imatäsinjja, mitat mitar catuyatäniwa. Tatitun amparapaw ucanac imani, ucanacan sapa orakeru, familiaru, lajjraru, jakenacar puriñapcama, ucanacanquir Diosat jan amuyat cunanac yatiñanacapataqui.

5. Ucanacatejj imatänejja, lliphipisipcaquiñapawa. Ucanacasti lliphipisipcaquiniwa, uqhämaraquiw takpach kollan kellkatanacan tʼalpha lekʼetanacajj lliphipisipcaquini.

6. Inas jumajj ucjjat nayan lokhe amuyunïtajj amuychïta, ucampis sismawa: Jiscʼa cunaymaninac toke jan yäkcay cunaymaninac tokeraquiw jachʼa cunaymaninacajj lurasi. Jiscʼa cunanacasti walja cutiraquiw yatirinacar pejjtunti.

7. Dios Tatitojj jachʼa wiñay munäwinac lurañataquiw luri. Tatitojj wali jiscʼa cunanacamp yatirinacar pejjtuntasaw, walja jakenacar khespiyi.

8. Jichhacamajj acanacan imatäñapajj Diosan suma amuyuparjamawa; ucanacajj aca jakenacan amtasiñanacaparuw jachʼaptayi, waljaniruw luräwinacapan pantasitapar iyawsayi, almanacapan khespiyasiñapcam Diosapat yatiñar irparaqui.

9. Nayajj sismawa: Janitejj aca kellkatanacanquir cunanacajj utjcasapänjja, Ammonamp jilanacapampejj uqhäm walja warank Laman jakenacar awquinacapan pantasit saranacaparojj janiw iyawsapcasapänti. Aca kellkatanacamp jupanacan arunacapampejj juchanacapat cutiquipstañaruw irpi. Ucajj sañ muni, Dios Tatitupat yatiñaru, Jesucristo cutsuyiripat cusisiñaruw jupanacar irpi.

10. Uqhämaraqui inas aca kellkatanacajj walja warank Laman jakenacaru, walja warank jan altʼiri, jichpach juch lurañamp ñankha luräwinacapamp chuymanacap chʼollkheptayapqui uca Nefi jake jilanacajjar Cutsuyiripat yatiñar puriyapjjchispa; janiw qhitis yatcaspati.

11. Uca jan amuyatanacat janiraw takpach yatiyquituti, ucat ucjjat jan jucʼamp arscäti.

12. Inas may arsuñajjac waquischispa, take ucanacajj suma amuyata, Diosat yatit cunatac imatawa. Jupajj suma amuyumpiw yatiyi, takpach luratanacaparu. Thaquinacapajj chekawa, sarañapajj wiñayataquiw muyusqui.

13. Helaman wawajja, Diosan camächitanacapan chekätapat amtasipunim, Diosasti siwa: Camächitanacajjar phokhapjjätajja, aca orakenjj jachʼaptapjjätawa. Ucampis janitejj camächitanacapar phokhcätajja, jupa nayrakatat jarcʼakatäyätawa.

14. Uqhämaraqui wawajjay, Diosan aca kollan cunanac jumar catuyatapat amtasiraquim. Ucanacjj jupajj kollanjam imäna, suma jupan yatit cunataqui kollanjam imaraquini, jupan chʼamap jutir mitanacar uñstayañataqui.

15. Jichhajj nayajj jutir urunacat yatiyir ajayutjam jumar sisma: Diosan camächitanacaparutejj pʼaquïtajja, aca kollan cunanacajj Diosan chʼamapan jumat apakatäniwa. Jumasti Satanasaru, jupan chʼallpjam thayan qhuyuñapataquiw catuyatäyäta.

16. Ucampis jumatejj Diosan camächitanacapar phokhätajja, aca kollan cunanacamp Tatitojj camächit churctam uqhämarjam lurätajja, (jumajj Tatitur take cun acanacamp lurcät ucatac jisctʼañamawa) janiw cuna orake mankhapach chʼamas ucanacjj jumat apakquiristamti, Diosan takpach arunacapar phokher chʼamanïtap laycu.

17. Jupajj jumar arscätam take uca arsüwinacaparuw phokhätam, cunalaycutejj jupajj awquinacasar lurat arsüwinacaparojj phokhänwa.

18. Jupajj jutir mitanacar chʼamap uñstayañapataquiw acanac imañatac arsüna, jupan suma amuyat cunanacan phokhasiñapataqui.

19. Jichhajja, walja warank Laman jakenacar chekat yatïwir wastat irpasinjja, niyaw amtäwejj phokhasjje. Jupajj acanacan chʼamap uñstayi, uqhämaraqui jutir mitanacaruw chʼamap acanacan uñstayaraquini. Uqhämasti acanacajj imatäniwa.

20. Ucat Helaman wawajja, juman takpach arunacajjaru Diosan camächitanacapar kellkatäpqui uqhäm jan karis phokhañamataquiw camächit chursma.

21. Jichhajja, uca pä tunc pusin tʼalpha lekʼetanacat parläma, ucanacan jamas yatitanacapana, chʼamac luräwinacapana, jamas luräwinacapana, jan ucajja, tucqhat jakenacan jamas luräwinacapan aca marcar yatiyatäñapatac ucanac imañamataqui; takpach jupanacan jiwayäwinacapan lunthatäwinacapan lunthatjäwinacapan, takpach ñankha ajjtcañ luräwinacapan, aca marcar yatiyatäñapataqui, aca arsuyirinacar imañamataquiraqui.

22. Tatitojj marcapan chʼamac luräwinaca, jamas jiwayäwinaca, ajjtcañ luräwinac lurañ kalltatap uñjäna. Ucat Tatitojj säna: Jupanacatejj jan cutiquipstapcanejja, uc-chʼpach oraket tucqhatäpjjaniwa.

23. Tatitusti saraquïnwa: Nayajj Gazelem lokerijjatac mä kal waquichä, ucasti chʼamacan khanaruw khantani, nayar lokapquitu uca jakenacajjar jilanacapan luräwinacapa, jïsa, jamas chʼamac ñankha ajjtcañ luräwinacap uñstayañajjataqui.

24. Ucat wawajjay, aca arsuyirinacajj Diosan aqhäm satäc uca arupar phokhañataquiw waquichatäpjjäna:

25. Nayajj takpach jamas ajjtcañ luräwinacap chʼamacat khanaruw apsü. Janitejj jupanacajj cutiquipstapcanejja, jupanacarojj uc-chʼpach oraket tucqhä. Take ucatsti, jichhat ucsar aca oraken utjcan take ucan jamasat luratanacapamp, ajjtcañ luräwinacapamp khanar mistuyä.

26. Niy uñjtanwa, janiw jupanacajj juchanacapat cutiquipstapquiti; ucat jupanacajj tucqhatäpjjäna. Diosan arupasti jichhacam phokhasiwa; jïsa jupanacan jamas ajjtcañ luräwinacapajj chʼamacat apsutäsin jiwasar yatiyata.

27. Jichhasti wawajjay, takpach jupanacan juramentonacapa, arsüwinacapa, jamas ajjtcañanacapan amtäwinacap imañamataquiw camächit chursma. Takpach muspharcañanacapampi uñtʼañatac uñachtʼayañanacapampjja, janiw aca jakenacar uñstaycätati, jupanacan jan yatiñanacapataqui. Jan uqhäm lurcasmajja, inas jupanacajj chʼamacar jilantas tucqhatäpjjchispa.

28. Aca orakjjarojj mä ñankhachäwiw utji, take chʼamac luririnacajj poktʼatäpcan ucapachajja, Diosan chʼamaparjamaw tucqhatäpjjani. Ucampis nayajj aca jakenacan tucqhatäñapjj janiw muncti.

29. Ucat uca juräwinaca, arsüwinaca, jamas arustʼanac aca jakenacarojj jan uñstaycätati; jupanacan ñankha ajjtcañ luräwinacapamp jiwayäwinacapampic aca marcar uñstayäta. Uqhäm ñankha ajjtcañ luräwinacarus, jiwayäwinacarus, uñisiñ jupanacar yaticharaquïta. Uqhämaraqui jupanacan uca ñankha ajjtcañ luräwinacap jiwayäwinacap laycu tucqhatätap aca marcar yaticharaquïta.

30. Take ñankha luräwinacapat jupanacar yatiyir Tatitun arjirinacaparuw jiwayapjjäna. Jupanacan jiwayatanacan wilapajj Dios Tatituparuw jiwayirinacapar apsusiñatac artʼäna. Ucat Diosan taripäwinacapajj uca chʼamac jamas arustʼäw luririnacar purïna.

31. Uqhämaraqui janitejj chʼamac jamas arustʼäw luririnacajj janïr poktʼatäcasin juchanacapat cutiquipstapcanejja, aca orakejj jupanacatac wiñay ñankhachatäpan.

32. Jichhajj wawajja, nayajj jumar arscsma, uca arunacat amtasim. Uca ñankha arustʼanacjja, aca jakenacar jan churamti, antisas jucharu ñankha luräwinacar wiñay uñisiñ yaticham.

33. Jesucrist Tatitur iyawsañs juchanacat cutiquipstañs jupanacar yatiyam. Jupanacar chuymanacapar llampʼuchañ yaticham, ucatsti, suma chuymanïña, llampʼu chuymanïñ yaticharaquim. Supayan take yantʼanacapar Jesucrist Tatitur iyawsañapamp thurtʼasiñ yaticham.

34. Asqui luräwinacat jan karjasiñpun yaticham, llampʼüsin jan ucasti suma chuymanïña, llampʼu chuymanïñ jupanacar yaticham, cunalaycutejj uqhäm luririnacajj almanacapatac samarañ jicjjatapjjani.

35. Amtasimay wawajja, waynäsajj suma amuyump lurañ yatekam. Waynäcasin Diosan camächitanacapar phokhañ yatekam.

36. Take cunan thurtʼasiñamataquejj Diosar artʼasiraquim; take lurañanacamajj Tatitumpïpan; cawqharutejj sarcätajja, ucajj Tatitunäpan; lupʼïwinacam Tatitur uñtayam; chuymaman munasïwinacap Tatitur wiñayatac churam.

37. Take luräwinacaman Tatitump arustʼam, jupasti asquiruw irpätam. Arum iquintcät ucqhajja, Tatitun iquim, juman iquïwimar uñjañapataqui. Alwat sartcät ucqhajja, chuymamajj Diosar yuspagarañan phoktʼatäpan. Ucanac lurätajja, khep khepa urunjj aytatäyätawa.

38. Jichhajj wawajjay, awquinacasan morokʼo, jan ucajj irpiri satäqui ucat parlañajjaw wactʼaraquitu. Awquinacasan ucajj Liahona satänwa; ucajj sañ munaraqui, brujula; Tatitusti uc waquicharaquïna.

39. Janiraquiw cawquïr jakes uqhäm muspharcañ luräw lurcaspati. Ucasti awquinacasar chʼusa wasaran cawcsa tokerus sarapjjañapäcän uc uñachtʼayañatac waquichatänwa.

40. Ucasti Diosar iyawsataparjamaw jupanacar irpäna; ucat Diosan uca irpirinac cawcsa tokerus sarañajj uñachtʼayañap iyawsapcänjja, ucaw luratäna. Ucat uca muspharcañampi, walja yakha muspharcañanacampejj sapür jupanacatac Diosan chʼamapan luratänwa.

41. Ucampis uca muspharcañanacan jiscʼa cunaymananacan luratap laycuw muspharcañ luräwinac jupanacar uñachayäna. Jupanacajj jayrasisaw iyawsäwiparjam lurañ armasipjjäna. Ucat uca muspharcañ luräwinac tucusipanjja, jupanacajj saräwipanjj janiw nayrakatar sarapcänti.

42. Ucat leyinacar pʼaquitap laycuw jupanacajj chʼusa wasaran kheparapjjäna, jan ucasti chek jan sarasaw mankʼat umat tʼakhesiyatäpjjäna.

43. Jichhasti wawajjay, juman ucanacan chʼiwimpïtap amuyañam munta. Awquinacasajj uca brujular yäkañ jayrasipcän ucqhajja, (ucanacajj janchitaquïnwa) janiw sum sarapcänti. Uqhämaw lurasi cunanacatejj ajayüqui ucanacampejja.

44. Cunjämatejj awquinacasataquejj uca arsut oraker cheka sarañar uñtayir brujular yäkañajj jasaquïcänjja, uqhäm Criston wiñay cusisiñar chek sarañar uñtayir arupar yäkañajj jasaquiraquiwa.

45. Nayajj sistwa: Janit ucan mä cunar uñtatajj utjqui? Cunjämatejj uca irpirejj chekpachapun awquinacasarojj ucar arcapjjatap laycojj arsut oraker irpcänjja, uqhämaraquiw Criston arunacapajj ucanacar arcapcañän ucqhajja, chekpacha aca llaquisiñ valle qhurcatar wali jucʼamp suma arsut oraker irpistani.

46. Wawajjay, janiw jiwasajj thaquin suma jasaquïtap laycu jayrasiscañäniti. Cunalaycutejj uqhämaw awquinacasampejj lurasïna; jupanacatejj uñtapjjasapänjja, jupanacataquejj jacapjjañapatac waquichatänwa, uqhämaraquiw jiwasampejja. Thaquejj waquichatawa, jiwasatejj uñtañänejja, wiñayaw jacañäni.

47. Jichhajj wawajjay, aca kollan cunaymananac uñjasajj imam, Diosar uñtas jacaraquim. Aca jakenacar ar yatiyas chacha cancañamp saram. Jiquisiñcam wawa.