1. Jichhasti, Mosian leyipanjj aqhäm siwa: Leyirjam taripirinaca, jan ucajja, cawquïrinacatejj taripiritac ut-tʼayatäpcänjja, ucanac nayrakatar taripatäñatac irpantat jakenacaru kawkha pachatejj taripapcän ucarjamaw jupanacajj kollk catokapjjäna.

2. Jichhajja, mä jaketejj yakhan manupäcänjja, ucat janirac uca manup phokcaraquïnjja, jupatjja taripiriruw yatiyasïna. Ucat uca taripirejj take munañan cancañampiw uca jakerojj jupa nayrakatar irpañapatac jilïrinac qhitäna. Ucat leyirjam jupa contra yatiyasïwinacarjamaw juparojj taripäna; ucat manun jakejj manup phokhañatac waytʼatänwa, jan ucasti, yänacapaw jupat apakatäna, jan uqhämäpansti, sallka lunthatjamaw jakenac taypit alisnucutäjjäna.

3. Taripiristi khawkha pachatejj taripcän ucarjamaw kollk catokäna; mä urutjja mä kori senine, jan ucajja mä kollke senum catokäna; senumasti mä kori senine ucqhawa. Ucasti churat leyirjamawa.

4. Jichhajja, acanacaw cunayman koripan kollkepan sutinacapajj alaparjama. Nefi jakenacan Jerusalenanquir judionacjam jan jaqhuñap laycuw sutinacapajj Nefi jakenacan sutiñchatäna. Janiraquiw judionacjam tupupcänti, antisas sapa mita jakenacan sarnakäwiparjama, amuyuparjamaw jactʼañapa tupuñap turcapjjäna, taripirinacan sarayäwipcama; uca taripirinacan sarayäwipataqui Mosia pʼekechirejj uca tupunac jaqhuñ ut-tʼayäna.

5. Aqhäm jaqhupjjäna: kori senine, kori seon, kori shum, kori limna.

6. Mä kollke senum, mä kollke amnor, mä kollke ezrom, mä kollke onti.

7. Mä kollke senumajj kori senine ucqhänwa; ucanacat cawquïris mä tupu yaran quicpänwa, take cunayman yaran tupump quipcaraquïnwa.

8. Jichhajja, mä kori seonajj pä seninënwa.

9. Uqhämaraqui mä kori shumajj pä seonänwa.

10. Mä kori limnajj takpach ucqhänwa.

11. Mä kollke amnorajj pä senumänwa.

12. Mä kollke ezromasti pusi senumänwa.

13. Mä ontejj takpach ucqhänwa.

14. Jichhajja, acaw uca jiscʼa jaqhuñanacapajja:

15. Mä shiblonajj senuman chicatapawa; ucat mä shiblonajj yaran tupun chicatapänwa.

16. Mä shiblumasti, shiblonan chicatapänwa.

17. Uqhämaraqui mä leajj shibluman chicatapänwa.

18. Uqhämän jaqhuñanacapajja.

19. Mä kori antionajj quimsa shiblomamp sasïnwa.

20. Jichhajja, ucajj kamirïñataquiquïnwa, cunalaycutejj luräwinacaparjamaw kollk catokapjjäna. Ucat jupanacajj jakenacar chʼajjwañanacapataqui, take cunayman ñankha luräwinac lurapjjañapataqui, ojjoñanacapataquiw amtayapjjäna. Ucsti jupanacan jucʼamp taripañapataqui, jupanac nayrakatar uchatäcän uca chʼajjwamp jucʼamp kamiriptañanacapataquiw uqhäm lurapjjäna. Ucat jakenacarojj Amulec contra Alma contra saytʼapjjañapataquejj amtayapjjäna.

21. Ucat Zeezromajj Amulecar aqhäm sasaw jiscsuñ kalltäna: Mä kawkhanac jisctʼañ munsma, ucanacar sitasmati? Zeezromajj supayan luräwinacapampi asquir tʼunjañataquejj wali yatsutänwa. Ucat Amulecar säna: Cuntejj jisctʼcäm ucanacar sitätati?

22. Ucat Amulecajj jupar säna: Uca jisctʼatejj Tatitun nayanquir ajayuparjamächejja, jïsa sämawa; ucampis janiw cuns nayajj siscäti, janitejj ucajj Tatitun Ajayuparjamäcan ucajja. Ucat Zeezromajj juparojj säna: Acajj sojjta kollk ontiwa, jumatejj taket sipan jucʼamp jachʼa cancañan utjatap janiw chekäquit sätajja, ucjpach churäma.

23. Ucat Amulecajj säna: Juma mankhapachan wawapa, cunats nayar yantʼista? Asqui jakenacan uqhäm yantʼäwinacar jan jaysañapjj janit yatcta?

24. Diosan jan utjatapt iyawsta? Nayajj sismawa: Janiwa; mä Diosan utjatap yatstajjaya, ucampis jupats jucʼampejj uca kamiriptäwiruw muntajja.

25. Jumasti nayarojj Dios nayrakatan cʼarintista. Jumajj nayaruw sista: Aca walja sojjta onti jumar churäma, ucampis chuyma mankhamanjja, janiw jupar churcäti –sistawa. Uqhämaraqui, nayarojj cheka jacquir Diosajj janiw utjquit sayañ munista, nayar tucqhañamataqui. Ucampis uca jachʼa ñankhatjja, catokañamajj churatäniwa.

26. Ucat Zeezromajj jupar säna: Jumajj cheka jacquir Diosajj utjiw –sistati?

27. Ucat Amulecajj säna: Jïsa, cheka jacquir Diosajj utjiwa.

28. Ucat Zeezromajj säna: Maynit jucʼamp Diosajj utjiti?

29. Jupasti arsünwa: Janiwa.

30. Ucat Zeezromajj jupar säna: Cunjämatarac ucanac yat-tasti?

31. Jupasti sänwa: Alajjpach mä qhitaw ucanac yatiyitu.

32. Ucat Zeezromajj jupar säna: Qhitis jutañapäcän ucajja, Diosan Yokapati?

33. Juparusti siwa: Jïsa.

34. Zeezromasti wasitat jisctʼäna: Marcaparojj jupanacan jucha luräwinacapampit khespiyani? Ucat Amulecajj aqhäm sasaw juparojj arsüna: Nayajj sismawa: Janiw uqhamäcaniti, cunalaycutejj aruparojj janiw mays uñtaycaspati.

35. Ucat Zeezromajj jakenacar säna: Ucanac amtasipjjam, jupajj mä Diosaquiw utji –siwa; uqhämaraqui, Diosan Yokapaw jutan saraqui, ucampis janiw marcaparojj khespiycaniti – siw jupajja. Jupajj Diosar camächit churañatac chʼamanïcaspas uqhämaw arsu.

36. Ucat Amulecajj wastat juparojj säna: Uñjam jumajj cʼaristawa. Jupajj marcaparojj jucha luräwinacapamp janiw khespiycanit satajj laycuw, Diosarus camächit churañatac chʼamanïcaspas uqhäm arsu sasajj sistajja.

37. Wasitatampiw sisma: Jupajj jupanacar jucha luräwinacapampejj janiw khespiycaspati. Janiw nayajj jupan arupar ajjalnucquirist-ti. Jupajj siwa: Janiw cuna kʼañus alajjpach khapak marcarojj mantcaspati; ucat janitejj alajjpach khapak marca tutjam catokcätajja, cunjämarac khespiyatäsmasti? Uqhämasti, janiw jucha luräwinacampejj khespiyasipcasmati.

38. Ucat Zeezromajj jupar säna: Diosan Yokapajj wiñay Awquiti?

39. Ucat Amulecajj jupar säna: Jupajj alajjpachans acapachans take ucanquir cunaymananacans Wiñay Awquipawa; jupajj kalltäwiwa, tucuyäwiwa, nayrïriwa, khepïriraquiwa.

40. Jupasti marcapar cutsuyiriw oraker jutani; cawquïrinacatejj jupan sutipar iyawsapqui ucanacan camächit pʼaquïwinacap catjjaruni; ucanacaw wiñay jacañanïqui ucanacajja, khespiyasiñasti janiw yakhanacar purcaniti.

41. Uqhämasti, ñankhanacataquejj cutsuyäwejj jan utjcaspajj uqhämawa. Jupanacatac jiwañan phalanacapajj jararätän ucqhaqui; cunalaycutejj jiwatat jactasajj takenin Dios nayrakatan luräwinacaparjam taripatäñatac saytʼapcan uca urojj jutaniwa.

42. Jichhajja, mä janchi jiwañ sat jiwañaw utji; Criston jiwañapaw uca janchi jiwañan phalanacap jararani; ucat takpachaniw uca janchi jiwañat jactapjjani.

43. Ajayump janchimpejj wastat wali sum phokhatpach mayachthapisipjjani. Takpachajj wastat phokhatpach utjañaparuw cut-tayatäni, jichhajj utjapctan uca quipca. Jiwasanacasti Dios nayrakatar saytʼasiñataquiw irpatäjjañäni, cunjämatejj jichpachajj uñtʼctan uqhämaraquiw uñtʼañäni, ucatsti takpach juchanacasat khan amtasiñäni.

44. Uca cut-tayäwisti takeniruw purini: Chuymaniru, wawaru, catuntataru, jan catuntataru, chacharu, warmiru, ñankharu, asquiruw purini; janiraquiw mä ñicʼutapas chhaktayatäcaniti. Antisas takpachajj phokhatpach utjañapar cut-tayatäniwa, jichhajj utjquis uqhäma, jan ucajja janchinsa. Ucatsti juchanacapat arsuñataquiw sarapjjani Cristo Yokana, Dios Awquina, Kollan Ajayuna, (ucasti mä Wiñay Diosaqui), jupanacan nayrakataparuw asquipas ñankhapas uca luräwinacaparjam taripatäñataquejj irpatäpjjani.

45. Nayjj jiwir janchin jiwañapata, jiwir janchin jactäwipat jumar ars-sma. Ucatsti sismawa: Aca jiwir janchejj jan jiwir janchir jactayatäniwa, jiwañata, jïsa, nayrïr jiwañat jacañaru, jan jucʼamp jiwañapataqui; jupanacan ajayunacapajj janchinacapampiw jan cunapach jaljtañatac mayachasipjjani. Uca mayachthapisiñaw kollanaru, jan jiwquirir tucuni, janiraquiw kʼañunac jucʼamp uñjapcaniti.

46. Cunapachatejj Amulecajj uca arunac arsuñ tucuycän ucqhajja, jakenacajj wastat muspharañ kalltapjjäna. Zeezromasti qhathatiñ kalltaraquïna. Uqhämaw Amulecan arunacapajj tucuyi, jan ucajj take ucac kellkta.