1. Ucat Almajja, Gedeon jakenacar walja jan kellkcay cunaymananac yatichatapatjja, cunjämatejj nayrajj Zarahemla oraken lurcän uqhäm iyawsiri tamar sucʼatjam ut-tʼayatapatjja, jupajj Gedeon oraket cut-tʼäna. Jupasti luräwinacapat samaririw Zarahemlanquir utapar cut-tʼäna.

2. Uqhämaw taripirinacan Nefi jakenacjjar sarayäwipan llatunquïr marajj sarakawayäna.

3. Ucat taripirinacan Nefi jakenacjjar sarayäwipan tunquïr mar kalltcän ucqhajja, Almajj ucat mistusaw, Sidon jawirat inti jalant token wasar thiyanac tokenquir Melec sat oraker saräna.

4. Ucan jawsatäcän uca Diosan kollan sucʼataparjamaw, jupajj Melec jakenacar yatichañ kalltäna. Jupasti takpach Melec oraken jakenacaruw yatichañ kalltaraquïna.

5. Ucat take wasar tok thiyanacatpach jakenacajj jupan uc jutapjjäna. Ucasti take uca orakpachan bautizasipjjäna.

6. Ucat trabajop Melec oraken tucuyasajja, jupajj uca oraket mistüna, jupajj Melec oraket alay toker quimsüruw saräna. Ucat jupajj mä Ammonia sat marcar purïna.

7. Orakenacapajja, marcanacapajja, jiscʼa marcanacapajja cawquïr jakenacatejj ucan nayrakat utjcän ucanacan sutinacapanïnwa. Nefi jakenacan sarnakäwipajj uqhamänwa. Uqhämaraquïn Ammonia orakempejja.

8. Ucat Almajj Ammonia marcar purisajj Diosan arup yatiyañ jupanacar kalltäna.

9. Jichhajja, satanasajj uca Ammonia marcanquirinacan chuymanacaparojj wal catuntäna, ucat uca jakenacajj Alman arunacapar jan yäkapcänti.

10. Ucampis Almajja, jachʼa mayisïwimpi, Diosar amtayasaw jupan Ajayup uca marcanquir jakenacjjar wartañapataquejj take chuymamp mayisïna. Uqhämaraqui jupan jupanacar juchat cutiquipstañatac bautizasiñapatac mayisiraquïna.

11. Ucampis jupanacajj chuymanacapar kalaptayasajj jupar sapjjänwa: Nanacajj juman Almätamjj yatipjjtwa. Uqhämaraqui juman saramarjam walja tokenacan juman ut-tʼayat iyawsiri tamanacan jilïr sacerdotëtamjj yatipjjaractwa. Nanacasti janiw iyawsiri tamamanquirïpcti, janiraquiw uqhäm jan amuyun saranacarojj iyawsapcaracti.

12. Jichhajja, nanacan jan iyawsiri tamamancatajj laycojj janiw nanacjjarojj chʼamanïctati. Jumasti taripäw konuñjj Nefiaruw churjjtajja. Ucat jumajj janiw nanacjjar jilïr taripirïcjjtati.

13. Ucat jakenacajj uqhäm arsupcäna, take arunacapar thurtʼasipcäna, jupat ñankh parlapcäna jupar thuscatapcäna, jupar marcapat alis-suyapcän uca khepatjja, jupajj ucat mistusajj Aaron sat marcaruw sarjjäna.

14. Jupajj ucar sarascän ucapachajja, Ammonia marcanquir jakenacan ñankhätap laycuw llaquisiñajj walpun jatjjat-täna, chuymapas wal usuraquïna; arunacapar uca jakenacan jan yäkapjjatapata. Uqhäm tʼakhesis sarasquipanjam Tatitun qhitapajj jupar uñstäna, ucat säna:

15. Qhuyapayatätaw Alma, uqhämasti pʼekem waytas cusisim. Cunat cusisiñamas jichhajj utjiwa. Diosat nayrïr arsüwip catokct ucapachatjja, jupan camächitanacaparojj sum phokhtajja. Nayät uca arsüw jumar churcsma, ucajja.

16. Uqhämaraqui, Ammonia marcanquir jakenacar cut-tasin yatiñamatac camächit jumar churañatac qhitanitätwa. Jïsa, jupanacar yatiyam; ucatsti saraquim: Janitejj jumanacajj juchat cutiquipstapcätajja, Dios Tatitojj jumanacar tucqhapjjätamwa.

17. Jumanacajj jichpachaw marcaman antutatäwipar tucqhañatac arustʼapjje uqhäm siw Tatitojja, ucatsti janiw jupan marcapar churat leyinacar amtat munäwinacar camächitanacarjamäquiti.

18. Ucat Almajj Tatitun qhitapan arup catokasinjja, jupajj Ammonia orakerojj lakaw cut-täna. Jupasti marcarojj yakha thac chekaw mantäna. Jïsa, Ammonia marcan aynach tokencquejj uca mantäwip chekaw mantäna.

19. Jupajj marcar mantascän ucqhaw mankʼat awtjayasïna, ucat mä jaker säna: Jumajj mä llampʼu chuyman Diosan lokeripar mankʼa wajjtʼasmati?

20. Uca jakesti juparojj sänwa: Nayajj Nefit sarakerïtwa, Diosan kollan arjiripätamjj yat-twa, qhitapajj mä uñjäwin jumar catokañajjatac yatiyquitus uca jakëtaw jumajja, uqhämasti jin utajjar sarañäni; mankʼajjat wajjtʼaraquïma, nayasti juman nayampitac utajjampitac bendicionätamjj yat-twa.

21. Ucat uca jakejj juparojj utapar catokäna. Uca jakesti Amulec satänwa, jupasti tʼantʼamp aychamp apsunisaw Alman nayrakatapar uchi.

22. Ucat Almajj tʼantʼampejj sistʼasïna; jupasti Amulecampir utapampiruw bendicïna, Diosarusti yuspagararaquïnwa.

23. Jupajj sistʼasiñcam mankʼcän uca khepatjja, Amulecaruw säna: Nayajj Almätwa, takpach aca orakenjj iyawsiri tamatac jilïr sacerdoteraquïtwa.

24. Nayajj Diosan arup take aca marcpachanquir jakenacar yatiyañatac jawsatätwa; jutir urunacan cunatejj lurascan uca yatiyir ajayurjama; ucat aca marcarojj jut-ta, ucampis janiw catokañ munapquituti, jan ucasti ankaruquiw jakonucupjjetu. Nayasti jan mayampitaquiw aca marcat khep uñtañampïscäyäta.

25. Ucampis nayajj aca jakenacar jutir urunacat yatiyañajjataqui ñankha luräwinacapat ircatañajjataquiw camächit catokta.

26. Jichhasti Amulec, nayar mankʼayatamata, korpachatamata, jumajj qhuyapayatätawa. Walja uru ayunatajj laycuw nayarojj mankʼat awtjitäna.

27. Jakenacar janïr yatiyañ kalltcasajja, jupajj walja uruw Amulecamp kamäna.

28. Ucatsti jakenacajj ñankha luräwinacapan jucʼamp kʼañuptapjjäna.

29. Ucat arojj Almar aqhäm sasaw jutäna: Saram, uqhämaraqui Amulec lokerejjar saraquim: Aca jakenacar sarnakas aqhäm sas yatiyam: juchat cutiquipstapjjam, cunalaycutejj aqhäm siw Tatitojja: Janitejj jupanacajj juchat nayar cutiquipstapquitanejja, aca jakenacarojj colerasiñajjampiw sartʼä. Jïsa, janiw jachʼa colerasiñajj maysar uñtaycäti.

30. Ucat Almamp Amulecampejj jakenac taypirojj Diosan arunacap yatiyirejj sarapjjäna; jupanacasti Kollan Ajayun phoktʼatäpjjänwa.

31. Jupanacarusti carcelan jan catuntatäñanacapcamaw chʼamajj churatäna, janiraquiw qhitis jupanacarojj jiwayirjamäcänti. Ucampis phalanacamp ñachʼantatäsa, carcelar jakontatäpcän ucapachcamajj chʼamapamp janiw cuns lurapcänti. Ucasti, Tatitun chʼamap jupanac toke uñstayañataquiw lurasïna.

32. Ucat Tatitojj jupanacar churcän uca ajayurjama, chʼamarjama, jupanacajj jakenacar yatiyañ kalltapjjäna.