1. Ucat Almamp Amulecampejj uca marcat mistuñatac camächit catokapjjäna. Jupanacasti mistusajja, Sidon orakeruw sarapjjäna. Ucansti takpach uca Alman arunacapar iyawsatap laycu, Ammonia oraket misturi, kalamp cʼupjatäcän alisnucutäcän uca jakenacaruw jicjjatapjjäna.

2. Ucat cunatejj jupanacan warminacapar wawanacapar camachcän ucat yatiyapjjäna, uqhämaraqui jupanac pachpata, cuna chʼamatejj jupanacar khespiycän uc yatiyapjjäna.

3. Uqhämaraqui Zeezromajj ñankha luräwinacap layc amuyupan tʼakhesïwinacapat ninjam naqhir fiebrempiw Sidoman usutäna; cunalaycutejj Almamp Amulecampejj janis jucʼamp utjapcaspas uqhäm jupajj amuyasïna; jupanacajj jupan quipca ñankhätap laycus jiwayatäpcaspas uqhäm amuyasiraquïna. Uca jachʼa juchajj walja yakha juchanacapampejj amuyupar sinti usuñapcamaw jan chhuj-jtas tʼakhesiyäna; ucat jupan janchipajj wal juntʼuptañ kalltäna.

4. Ucat jupajj Almampin Amulecampin Sidon orakencatapat istʼasinjja, chuymapanjj kamas catuñ kalltäna; jupanacarusti jupan uc jutapjjañapataquiw mä yatiyäw apayaraquïna.

5. Ucat jupanacajj uca pachatpach jupanacar apayat yatiyäwir yäkasajja, jupan uc sarapjjäna. Jupanacasti, Zeezroman utaparuw mantapjjäna. Jupanacasti juparojj iquiñapan usuta, janchipas ninjam naqhir wali tʼuqha jicjjatapjjäna. Jupan amuyupajj ñankha luräwinacapat wal usuraquïna. Ucat jupanacar uñjasajj amparap loktäna, jupar kollañapatac achictʼasisina.

6. Ucat Almajj amparat catusaw juparojj säna: Criston chʼamapan khespiyirïtapar iyawstati?

7. Ucat arsusaw jupajj säna: Jïsa, takpach jumajj yatichctas uca arunacaruw iyawsta.

8. Ucat Almajj säna: Jumatejj Criston cutsuyäwipar iyawsätajja, jumajj cʼumaraptätawa.

9. Ucat jupajj säna: Jïsa, nayajj arunacamarjamaw iyawsta.

10. Ucat Almajj Tatitur aqhäm sas artʼäna: Dios Tatitujja, aca jaker qhuyapayam; jupan Cristor iyawsataparjam kollam.

11. Ucat Almajj uca arunac arscän ucspachaw, Zeezromajj cʼumarac tʼisctjjäna. Ucat sarnakañ kalltäna; uca luratatsti takpach jakenacajj wal muspharapjjäna. Uca luräwit yatïwejj takpach Sidom orakeruw chʼekentäna.

12. Ucat Almajj Zeezromar Tatitun bautizäna; Zeezromasti ucapachat ucsarojj jakenacar yatiyañ kalltäna.

13. Ucat Almajj Sidom orakenjj mä iyawsiri tama ut-tʼayäna; cawquïrinacatejj bautizasiñ munapcän ucanacar Tatitun bautizañataquiw sacerdotenacampir yatichirinacampir ut-tʼayäna.

14. Uqhäm munirinacajj waljanïnwa. Jupanacasti take Sidom orake thiyanacat wal jutapjjäna, ucat bautizasipjjäna.

15. Ucampis Ammonia orakenquir jakenacajj chʼollkhe chuyman jan altʼir marcäsipcaquïnwa. Jupanacajj Almampin Amulecampin chʼamapajj supayanquiw sasajja, janiw juchanacapat cutiquipstapcänti, cunalaycutejj jupanacajj Nehoran yatïwiparjam iyawsirinacäsaw juchanacapat jan cutiquipstañar iyawsapcänti.

16. Ucatsti, Almamp Amulecampejja, Amulecajj Diosan arup laycu Ammonia oraken utjcän uca takpach koripa, kollkepa, wali alan yänacap apanucüna. Ucatsti nayra amigonacapamp apanucutaw uñjasïna, uqhämarac awquipamp familapampisa.

17. Ucat Almajj Sidoman iyawsiri tama ut-tʼayatap khepatjja, jakenacan chuymapan jachʼa jachʼa tucuñapar saytʼayatap uñjasajja, jupanacan Dios nayrakatan chuymanacapar llampʼuchasitapa, Diosar altar nayrakatar yupaychañatac kollan yupaychañ chekanacapar tantachasitapata, Satanasata, tucqhäwit khespiyatäñatac jan tucusis uñjas mayisitap uñjasa–

18. Jichhajja, cunjamatejj nayajj siscta, Almajj take ucanac uñjasajja, Amulecaruw irpjjarüna, ucatsti Zarahemla orakeruw jutäna; ucatsti quipca utaparuw Amulecarojj irpäna. Ucatsti llaquisïwinacapan juparojj yanapäna, Tatitun juparojj chʼamañcharaquïna.

19. Uqhäm taripirinacan Nefi jakenacjjar sarayäwipan tunquïr marajj tucusiwayäna.