1. Nayajj alajjpach qhitaquïrista chuymajjan munañaparjam luraraquirista, Diosan trompetapamp parlasa, oraker thaltayañcam arump parlasaraqui, take jakenacar juchat cutiquipstapjjañapatac artʼasa!

2. Jïsa, nayajj sapakat mayniruw khejjokhejjo arumpïcaspas uqhäm juchat cutiquipstañat cutsuyir arustʼäwit yatiyirista, juchat cutiquipstasin Diosasar jutapjjañapataqui, oraken llaquisiñajj jan jucʼamp utjañapataqui.

3. Ucampis nayajj jakequïtwa, uca munañajjajj jucharaquiwa. Cuntejj Tatitojj nayar churquitu, ucaquïpan sañawa.

4. Asqui Diosan thurtʼat leyi contra lurañjja, janiw munañajjäquiti. Cunalaycutejj jupajj jakenacan munañaparjamaw lurayi, jiwañataquis jacañataquisa. Jïsa, nayajj yat-twa, jupajj munañaparjamaw jakenacarojj laquinoke khespiyasiñataquisa, tucqhatäñataquisa.

5. Nayajj asquin ñankhan take jakenac nayrakatar jutatap yat-ta. Cawquïrinacatejj asquits ñankhats jan yatipqui ucanacajja, janiw juchanïpquiti. Ucampis cawquïritejj asquits ñankhats yatqui ucarojja, munañaparjam churatawa, ascsa, ñankhsa, jacañsa, jiwañsa, cusisiñsa, chuym usuyasiñs thakañapataqui.

6. Ucanac yatcasasti, cunatarac jawsatäct uca luräw lurañats jucʼamp muniriststi?

7. Cunatarac alajjpach qhitäñajja munästi, orak thiyanacar parlañajjataquisti?

8. Tatitojj take marcaruw churi, jupanacan quipca marcapat lajjrapata jupan arup yatichañanacapataqui, jïsa, jupan amuyataparjam cuna churañapatejj asquïqui uc jupanacan suma amuyas yatichapjjañapataqui. Uqhämasti, Tatitun chekaparu asquirjam suma amuyump ewjjatap uñjtan.

9. Nayajj Tatitun nayar camächit churatap yatisaw, ucan jachʼar aptatätajj yat-ta. Janiw naya pachpat jachʼar aptascti, jan ucasti cuntejj Tatitojj lurañajj munqui, ucan jachʼar aptatätwa. Jïsa, acaw nayan jachʼar aptatätajjajja, inas Diosan amparapan mä jaker juchanacapat cutiquipstañar apaniñatac apnakatästa; ucapi cusisiñajjajja.

10. Cunapachatejj jilanacajjat waljanejj juchanacapat chekpach cutiquipstasin Dios Tatitupar jutir uñjcta ucqhajja, cusisiñajj nayan phoktʼatawa. Ucapachaw cuntejj Tatitojj nayatac lurqui ucat amtasta, mayisitajjar istʼatap amuyasiracta, ucapachaw qhuyapayäwin amparapan nayar loktatapat amtasiracta.

11. Uqhämaraquiw amtasta, awquinacajjan mitʼanïtapata. Nayajj chekpachapuniw yat-ta, Tatitun mitʼanïtapat antutayatapata. Uqhämat iyawsiri tamap ut-tʼayi. Jïsa, Dios Tatitojja, Abrahanan Diosapajja, Isaacan Diosapajja, Jacobon Diosapajj jupanacar mitʼanïtap antutayi.

12. Nayajj awquinacajjan catuntatätapat amtasipuntwa. Uqhämaraqui egipcionacan amparanacapat jupanacar antutayqui uca quipca Diosajj mitʼanïtat antutayi.

13. Uca pachpa Diosaw jupanac taypin iyawsiri tamap ut-tʼayäna. Uca pachpa Diosaw kollan jawsäwimpejj nayar jawsitu, aca jakenacar arut yatiyañajjataqui. Jupasti wali suma lurañ churitu, ucansti cusisiñajjajj phoktʼatawa.

14. Ucampis janiw quipca suma luräwijjat sapaquit cusiscta. Antisas Nefi orakencapcän uca jilanacajjan suma luratapat cusisiñajj jucʼamp phoktʼata.

15. Jupanacajj wal trabajapjjäna, walja achunac achuyapjjaraquïna. Jupanacan luräwipat pagopajj cunja jachʼänisa!

16. Jichhasti, nayajj uca jilanacajjan jachʼa luratapat lupʼisctjja, ajayujjajj janchijjat jaltcaspas uqhäm jachʼaw cusisiñajjajja.

17. Jichhajja, Diosajj aca jilanacajjar Diosan khapak marcapan konuñap churpan, uqhämaraqui cawquïrinacatejj jupanacan luräwinacapan achupäpqui ucanacajja, jupanacan jan jucʼamp mistuñanacapatac churaracpan, jupar wiñay jachʼar aptañapataqui. Diosajj parlat arunacajjarjam lurasiñap munpan. Uqhamäpan.