1. Jichhasti, acanacaw Ammonan jilanacapar aqhäm sat arunacapajja: Jilanaca, nayajj jumanacaruw sapjjsma: Cusisiñasajj wali jachʼawa. Jiwasanacajj Zarahemla oraket nayrakat mistsunipctan ucqhajja, Diosan aqhäm wali jachʼa qhuyapayäwinacap jiwasanacar churañap amuyas-snänti?

2. Jichhajj jisctʼapjjsmawa: Cuna jachʼa qhuyapayäwinacs jiwasanacar churapjjestu? Yatipjjtati?

3. Nayaw arsurapipjjäma: Laman jake jilanacasajj chʼamacancapjjänwa, jupanacajj jucʼamp chʼamac jakhencapjjänwa, ucampis waljaniw jichhajj Diosan muspharcañ khanapar uñjañar puriyatäpjje. Ucaw jiwasanacar churat qhuyapayäwejja. Jiwasanacajj uca jachʼa luräw lurañat Diosan amparapan apnakatäpjjtanwa.

4. Jupanacatjja, warank warankanacaw cusisipjje, Diosan tamapar puriyatäpjjaraqui.

5. Uca yapojj pokotäjjänwa, jumanacasti yawiñaruw uchasipjjta; chʼamanacamampiw yawsupjjta, jïsa ur jornälaw trabajapjjta, ucat bendicitäpjjtajja. Kawkhäquitejj callchanacamajj uc uñjapjjam. Ucanacasti jan chhakañapatac sejjenacar apthapitäniwa.

6. Ucanacajj khep khepa urunjj janiw chhijchhin lekʼsutäcaniti; janiraquiw tutucanacan apatäcanisa; antisas chhijchhejj purcan ucqhajja, jupanacajj ucawjapan apthapitäpjjaniwa, chhijchhin jan jupanacar puriñapataqui. Janiraquiw timajj jupanacar aptañ munqui uca chekar jachʼa thayanacamp willjatäcaniti.

7. Antisas cosechir Patronapan amparanacapancapjjewa, jupanacasti jupancapjjaraquiwa. Jupasti khep khepa urun jupanacarojj aytani.

8. Diosan sutipajj bendicitäpan. Jachʼar aptatätapat kʼochupjjañäni; kollan sutipar yuspagarapjjañäni, cunalaycutejj jupajj wiñayaw asc luri.

9. Janitejj jiwasanacajj Zarahemla oraket jutapcasänjja, wal munapquistu, aca wali munat jilanacasajj jichhacamaw jiwasanacar uñisisajj llaquisitäpjjasapäna, jupanacasti Diosan jan uñtʼatäpjjaraquisapänwa.

10. Ucat Ammonajj uca arunac arscän ucqhajja, Aaron jilapajj tokenokänwa: Ammon, cusisiñamajj jachʼa jachʼa tucuñarus puriyquiristam ucaw ajjsarayitu.

11. Ucampis Ammonajj juparojj sänwa: Quipca chʼamajjat amuyujjat janiw jachʼa jakët siscti. Antisas cusisiñajjajj phoktʼatawa; jïsa, chuymajjajj cusisiñat phullchʼirasqui, nayasti Diosajjan cusisï.

12. Jïsa nayan jan cunätajjs yat-twa; chʼamajjarjam tʼuqhätwa; ucat janiw naya pachpatjj jachʼa jakët siscäti. Antisas Diosajjat jachʼaw jupajj sä, cunalaycutejj jupan chʼamapan nayajj take cun lurirista. Jïsa, aca orakenjj walja jachʼa muspharcañanac lurtan. Ucanacat sutip wiñayaw jachʼar aptañäni.

13. Walja warank jilanacasar mankhapachan tʼakhesïwinacapat antutayi. Jupanacasti cutsuyir munasiñ kʼochunacaruw puriyatäpjje. Ucasti jiwasancqui uca arupan chʼamanïtap laycuwa. Uqhämasti janit cusisiñasajj waquisqui?

14. Jiwasan wiñayaw jupar jachʼar aptañasatac utji; jupajj Alajjpachanquir Diosawa, jilanacasarusti mankhapachan cadenanacapat antutayi.

15. Jupanacajj wiñay chʼamacan, tucqhäwin muytatäpjjänwa, ucampis jupajj wiñay khanaparu, jïsa wiñay khespiyañaruw jupanacar irpanti. Jupanacasti taket sipan jucʼamp wali churat munasiñapan muytatäpjjewa. Jiwasasti uca jachʼa muspharcañ luräw lurañataquejja, jupan amparapan apnakatätanwa.

16. Ucat jachʼar aptasiñäni, Tatitun jachʼar aptasiñapan cusisiñäni; cusisiñasan phoktʼatätap laycu, cusisiraquiñäni. Diosarojj wiñayaw jachʼarojj aptañäni. Qhitis Tatitun sint jan cusisispajja? Qhitis jachʼa chʼamapata, qhuyapayäwipata jaken wawanacapar jan mäc pʼek pasayasiñapat jucʼaquiw –saspajja? Nayajj sapjjsmawa: Cunatejj chuymajjan utjquitu ucatjja, janiw mä jiscʼs arsurjamäcti.

17. Qhitis ajjtcañ juch lurir kʼañu utjäwisat, uca jan walinacat Diosan jiwasanacar apsuñap amuyasapänjja?

18. Jiwasajj colerasiñampiw iglesiapar tucqhañataquejj wal achusisajj sarnakäyätan.

19. Cunats ajjsarcañ tucqhäwir jan qhitquistu? Cunats chekapar uñjañ espadapampejj wiñay jan cutsuyañ utjäwir sarañasat cat-thap-pachïstojja?

20. Ajayujjajj uca lupʼïwit jaltcaspas uqhämawa. Jupajj chekapar uñjañapjj janiw puriyquistänti, antisas jupajj jachʼa qhuyapayäwipanjj jiwañan tʼakhesiñan wiñay jakhepanjam maqhatayasaw mistuyistu, almanacasan khespiyatäñapcama.

21. Jichhajja, jilanaca, jan yatquis uca jakejj ucanac yatispati? Nayajj sapjjsmawa: Juchat cutiquipstiriquiw ucanacjj yati.

22. Jïsa, cawquïritejj juchanacapat cutiquipstqui, iyawsataparjam lurqui, asqui luräwinac lurqui, jan inactʼas Diosat mayisquejja, uqhäm jakenacaruw Diosat jan amuyat cunanac yatiñajj churasi, jïsa uqhäm jakeruw janipun uñstayatäcän uca uñstayañajj churatäni. Uqhäm jakeruw warank warank jaker juchanacapat cutiquipstañar puriyañajj churatäni, aca jilanacasar juchat cutiquipstañar puriñajj jiwasanacar churatäcän uqhäma.

23. Jichhasti jilanaca, janit amtasipcta cuntejj Zarahemla orakenquir jilanacasarojj sapctan ucatjja? Jupanacarojj sistanwa: Nefi orakeruw sarasipcta Laman jake jilanacajjar yatiyiri –sasa. Janit jupanacajj uc istʼasajj jiwasat larusipcänjja?

24. Jupanacasti sapjjestuwa: Laman jakenacar chekat yatïwir puriyapcasmas uqhämt amuyapjjta? Jan altʼir marcätap laycuw, jupanacan chuymanacapajj wil wartañat cusisisipqui, jupanacajj jucʼamp ajjtcañ ñankha luräwinac lurasaw urunacapan kamasipqui, kalltäwitpach juch luririn luräwinacap lurasipqui, awquinacapan jan wali saranacapar iyawsir uca Laman jakenacarut iyawsayapjjasma? Amtasipjjam jilanaca, uqhäm jupanacajj arsupjjäna.

25. Uqhämaraquiw jupanacajj sapjjaraquïna: Armanac jupanac contra aptapjjañäni, ñankha luräwinacapamp chic oraket tucqhañataqui, jiwasanacar atipjas jan tucqhapjjañapataqui.

26. Ucampis jilanaca, jiwasanacajj janiw jilanacapar tucqhañataquit wasarar jutapctan, antisas inas mä kawkhanir khespiyapjjerist sasaw jutapjjtan.

27. Ucat chuymanacasajj llaquitäcan ucqha, jiwasanacajj cut-tañampïsipcäyätan ucqhajja, Tatituw chuymachistu: Laman jake jilanacam taypir sarapjjam; tʼakhesïwinacaman llampʼu chuymamp tʼakhesipjjam, nayasti atipapjjañamataquiw yanapapjjäma.

28. Jichhasti amuyapjjam, purinisaw jupanac taypin sarnakapjjtan; tʼakhesiñasansti llampʼu chuymampiw tʼakhesipjjtan, cunayman tʼakhenac uñjapjjaractan. Jïsa, utat utaruw saräyätan, jakenacan qhuyapayäwipar alcatasa. Janiw jakenacan qhuyapayäwiparuquit alcatapctan. Jan ucasti Diosan qhuyapayäwiparuw alcatapjjaractan.

29. Jiwasanacajj utanacapar mantasaw jupanacar yatichapjjtan, uqhämaraqui, thaquinacapan jupanacar yatichapjjaractan. Kollunacapan jupanacar yatichapjjtan, uqhämaraqui kollan utanacaparu, sinagoganacapar mantasaw yatichapjjaractan; ucatsti alisnucupjjestuwa, jiscʼachapjjaraquistuwa, ucatsti thuscatapjjestuwa, ajanunacasat tʼajjlljapjjaraquistu. Jiwasanacajj kalamp cʼuphataw uñjasipjjtan, catuntat thuru phalanacamp ñachʼantata, carcelar jakontata; ucampis Diosan chʼamapampi yatiñ cancañampiw wastat antutayatäpjjtan.

30. Ucatsti cunayman tʼakhesiyäwinac tʼakhesipjjtan, inas jiwasanac tokejj mä jakejj khespiyaschispa –sasa. Ucatsti, inas mä kawkhanejj jiwasanac tok khespiyaschispa saractanwa, uqhämat cusisiñasan phoktʼatäñapataqui.

31. Jichhasti luräwinacasan achunacap uñjapjjsnawa. Ucanacasti jucʼaquiti? Nayajj sapjjsmawa: Janiwa, ucanacajj waljawa. Jïsa, uqhämaraquiw chekätapat ircatapjjsna jilanacapar munatapata, jiwasanacar munatapataraqui.

32. Jupanacajj timapar jiwayañ lantjja, quipca jacäwinacap churañ munapjjäna; jilanacapar munatap laycuw nuwasiñ armanacap orak wali mankhar imantapjjaraquïna.

33. Nayajj jisctʼapjjsmawa: Takpach aca oraken uqhäm jachʼa munasiñajj utjänti? Nayajj sapjjsmawa: Janiw utjcänti, Nefi jakenac taypins janiw utjcaraquïnti.

34. Jupanacatejj jilanacapamp nuwasiñatac armanac aptapjjaspajja, janiw jiwayayasipcaspati. Ucampis amuyapjjam, kawkha Laman jakenacas jacäwinac aptʼasipjjejja. Jupanacasti munasiñap laycu, juchar uñisipjjatap laycu Diosapar saratap yatipjjtan.

35. Janit ucat cusisiñasajj waquisqui? Nayajj sapjjsmawa: Oraken kalltäwipatjja, janiw cawquïr jakenacans jiwasanacat sipan jucʼamp cunat cusisiñapas utjcänti. Nayan cusisiñajjajj Diosajjat jachʼar aptañajjcamaw utji. Jupan take chʼamas amuyäwis amuyasïwis utji; jupajj take cun amuyi, uqhämaraqui jupan sutipar iyawsas juchanacapat cutiquipstirinacatac khespiyañ churañcam qhuyapayir cancañawa.

36. Ucatejj jachʼa jakët sañäspajja, nayajj jachʼa jakët siristwa. Ucajj nayan jacäwijjawa, khanajjawa, cusisiñajja, wiñay tʼakhesiñat cutsuyatäñajjaraquiwa. Israel alin lawapat jan uñtʼat oraken chhakat laymïqui aca marcat amtasir Diosajjan sutipajj jachʼar aptayatawa. Nayajj sistwa: Jan uñtʼat oraken sarnakerïquipan amtasquitu, uca Diosajjan sutipajj qhuyapayatäpan.

37. Jichhajja, jilanaca, Diosan take jakenacat cawquïr orakentejj utjapcaspas uqhäm amtasitapjj amuyapjjtanwa. Jupajj jakenacaparojj jactʼiwa, qhuyapayasir chuymapasti takpach orakeruw imjjäsisqui. Ucaw cusisiñajjajja, ucaraquiw jachʼa yuspagarañajjasa. Nayajj Diosajjaruw wiñayapun yuspagarä. Uqhämäpan.